1Chai punllaca Judá llajtapi cajcunaca cai cantotami cantangacuna:
“Sinchi pueblotami charinchij.
Taita Diosca quishpirinata churashpami muyundij pirca huashatapish ashtahuan sinchi pircata pircashca.
2Pungucunata pascaichij.
Cashcata rurajcunami yaicunga.
Chaitataj pajtachijcunallami yaicunga.
3Mandaj Dioslla, quiquinpi yuyaita churashpa chaitataj rurashpa catijtaca quiquinmi manataj pi cuyuchipaj sumaj causaipi huaquichingui.
Quiquinpi shunguta churashcamantami chashna huaquichingui.
4Tucui causaipi Mandaj Diosllapi shunguta churaichij.
Mandaj Jatun Diosca huiñai huiñaitami jatun pirca shina jarcanga.
5Jahuaman causacujcunataca paimari urmachirca.
Jatun tucushca pueblotapish cumurichircami.
Allpamanmi cumurichirca.
Ñutu allpamanmi shitarca.
6Paicunaca paicuna llaquichicushcacuna sarushcami canga.
Huajchacunapaj chaqui ucupimi canga”.
7Cashcata rurajpaj ñanca mana pandachu.
Quiquinca ima pandata mana ruranguichu.
Cashcata rurajpaj ñantaca llambuyachinguimi.
8Mandaj Dioslla, quiquinca cashcata ruraj ñanpishmi cangui.
Mandaj Dioslla quiquinllatami shuyashcanchij.
Quiquinpaj shutica quiquinpaj yuyaica ñucanchij alma munashcami.
9Tutapish ñuca almahuanmi quiquintaca munani.
Ñucapi caj espíritu ñucapi causashca camaca cada tutamantami quiquinta utca mashcasha.
Cai pachapi quiquin cashcata rurashpa mandajpimi, cai pachapi causajcunaca cashcata ruranaca ima cashcata yachangacuna.
10Yallitaj millaita rurajta paita llaquishpa mana imata rurajpica, cashcata ruraj canataca mana yachangachu.
Cashcata rurajcunapaj llajtapi cashpapish millaita rurangallami.
Mandaj Dios jatun mandaj cashcataca mana ricungachu.
11Mandaj Dioslla, quiquinpaj maquica alzashcamari.
Millaita rurajcunaca chaitaca mana ricunchu.
Chashna cushpapish chaita paicuna ricushpaca can agllashcacunata ricushpa paicuna shina tucusha nicujcunaca pingai tucungacunami.
Quiquinta p'iñajcunataca ninami tucuchinga.
12Mandaj Dioslla, quiquinmi ñucanchijmanca sumaj causaita cungui.
Tucui imata ñucanchij rurajpipish quiquinmi rurachishcangui.
13Mandaj ñucanchij Dios, quiquin ñucanchijta jatun mandaj cajpipish shujtajcunapishmari ñucanchijta mandasha nincuna.
Ashtahuanpish ñucanchijca quiquinpaj shutitami quiquinpi yuyarishun.
14Ña huañushcacunami, mana causangachu.
Huañushcacunaca ña mana causaringachu.
Paicunataca llaquichircanguimi, chingachircanguimi, paicunamanta yuyarinacunatapish tucuitami tucuchircangui.
15Mandaj Dioslla, cambajcunataca mirachircanguimi.
Canmari paicunataca achcacunata rurarcangui.
Israel llajta muyundij lindecunatapish mirachishpami quiquin jatun cashcataca ricuchircangui.
16Mandaj Dioslla, llaquihuan cashpami quiquinta mashcarcacuna.
Quiquin llaquichijpimi yallitaj mañarcacuna.
17Chichu huarmica huachana pajtamujpi nanaihuan cashpami paipaj nanaicunahuan aij nin, caparin.
Ñucanchijpish Mandaj Diospaj ñaupajpica chashnallatajmi tucushcanchij.
18Chichurcanchijmi, huachana nanaihuanmi carcanchij.
Ashtahuanpish huairallatami huacharcanchij.
Cai pachamanca quishpirinataca mana apamurcanchijchu.
Cai pachapi causajcunataca mana huacharcanchijchu.
19Cambaj caj huañushcacunaca causaringacunami.
Huañushca aichacunaca jataringacunami.
Ñutu allpapi causacujcuna rijcharichij, cantaichij.
Quiquin causachijpica huañushcacunaca, ñutu tamya shamujpi llullu granocuna huiñaj shinami allpamanta llujshingacuna.
Allpaca paipi caj huañushcacunata tigrachingami.
20Ñuca agllashcacunalla richij, cancunapaj huasiman yaicurichij.
Pai alli tucungacama punguta huichcarishpa pungu huashapi ashacama miticuichij.
21Riquichij, Mandaj Diosca cai pachapi causajcunataca paita p'iñachishpa millaita rurashcamanta llaquichingapajmari, pai causacunmanta llujshigrin.
Allpapish huañuchishpa paipi jichashca yahuartaca, ricuchingami.
Huañushcacuna paipi tiyacujtapish ña mana ashtahuan pacangachu.
Who We AreWhat We EelieveWhat We Do
2025 by iamachristian.org,Inc All rights reserved.
