1 SAMUEL 12 - Quichua Chimborazo Bible

Israelcunaman Samuel rimashcami

1Samuelca, tucui israelcunataca:

–Ñucaca tucui cancuna imalla nishcata uyashpami, jatun mandajtaca churarcani.

2Cancunata pushaj jatun mandajca caipimi ñami charinguichij. Ñucaca ña yuyaj puzujlla umami cani. Ñuca churicunaca cancunahuanmi. Ñucapish jovenmantapacha cunan punllacamami cancunata pushacurcani.

3Caipimi cani. Cancuna imamanta ñucata rimana cashpaca, Mandaj Diospaj ñaupajpi pai churashca jatun mandajpaj ñaupajpi huillahuaichijlla. Maijanpaj huagrata, maijanpaj burrota japishca cajpipish huillahuaichijlla. Maijanta yanga juchachij caj cashca cajpipish, maijanta llaquichij caj cashca cajpipish, mana cashpaca maijanpajta camarita japishcamanta ñahuita huichcashpa shujllaman tucuj caj cashca cajpipish huillahuaichijlla. Chaitaca cunan ñuca allichingapaj– nirca.

4Chaimi paicunaca:

–Mana pita yanga juchachircanguichu. Mana pita llaquichircanguichu. Camarita japishcamanta shujllaman tucujpish mana carcanguichu– nircacuna.

5Chaimi Samuelca:

–Ima juchachinata mana charinchijchu nishpa cancuna ñucata nishcataca Mandaj Diospish, paillataj churashca jatun mandajpish ricucunmi– nijpimi paicunaca:

–Ari, chashnatajmari– nircacuna.

6Shina nijpi Samuelca israelcunataca:

–Moisestapish, Aarontapish pushaj cachun churashpa cancunapaj ñaupa yayacunata Egiptomanta llujshichij Mandaj Dios ricucunmi.

7Cunanca cancunatapish, cancunapaj ñaupa yayacunatapish Mandaj Dios quishpichingapaj tucui imalla rurashcata Mandaj Diospaj ñaupajpi cancunata yuyachishpami sinchita rimasha nini.

8Egiptoman Jacob yaicujpi cancunapaj ñaupa yayacunata llaquichijpi paicuna Mandaj Diosta caparishpa mañajpimi, Mandaj Diosca Moisesta, Aaronta cachashpa, cancunapaj ñaupa yayacunataca Egiptomanta llujshichishpa cai llajtapi churarca.

9Ñaupa yayacunaca Mandaj paicunapaj Diosta cungarijpimi, paicunataca Hazor pueblo soldadocunata mandaj Sísara runapaj maquipi, filisteocunapaj maquipi, Moabta jatun mandajpaj maquipi churajpi macanacuita rurarcacuna.

10Chaimi paicunaca Mandaj Diostaca: “Baal dioscunapajta, Astarot dioscunapajta rurashpamari Mandaj Diosta saquishpa juchallishcanchij. Mandaj Dioslla cunanca ñucanchijta p'iñajcunapaj maquimanta quishpichihuai. Quiquinpajtami rurashun ninchij” nishpa caparishpa mañarcacuna.

11Chaimi Mandaj Diosca Jerobaalta, Baracta, Jefteta, Samuelta cachashpa cancunapaj muyundijpi caj p'iñajcunapaj maquimanta quishpichijpi cancunaca sumajta causacunguichij.

12Chashna cajpipish amonitacunata jatun mandaj Nahas cancunahuan macanacungapaj shamujta ricushpami: Ñucanchijpish shuj jatun mandajtami ninchij– nishpa ñucata mañarcanguichij. Mandaj cancunapaj Dios jatun mandaj cashcata yachashca jahuamari chashna nircanguichij.

13Cunanca cancuna mañashca jatun mandajtaca ñami caipi charinguichij. Cancuna mañajpimi Mandaj Diosca paitaca cancunata mandaj cachun churarca.

14Mandaj Diosta manchashpaca paipajllata ruraichij. Pai rimashcata uyashpaca Mandaj Diospaj shimitaca ama c'ariyaichijchu. Cancunapish, cancunata jatun mandajpish Mandaj Diospajllata rurashpaca allitami ruranguichij.

15Mandaj Dios rimashcata mana uyashpa, paipaj shimita p'iñashpa c'ariyajpica, Mandaj Diospaj maquica cancunapaj ñaupa yayacunata ima shina llaquichishca shinallatajmi llaquichinga.

16Cunanca ashallata shuyashpa, Mandaj Dios cancunapaj ñaupajpi jatun mancharinata rurajta ricuichij.

17Cunanca ¿manachu trigota cozichana punllacuna? Cancunata jatun mandaj cachun jatun mandajta mañashpaca, Mandaj Diospaj ñaupajpi jatun millaita rurashcata ricuchingapajmi c'ulun nichishpa tamyachichun Mandaj Diosta caparishpa mañagrini– nircami.

18Chaimantaca Mandaj Diosta Samuel caparishpa mañajpi chai punllaca Mandaj Diosca c'ulun nichishpa tamyachijpimi, tucui israelcunaca Mandaj Diostapish, Samueltapish yallitaj mancharcacuna.

19Tucui israelcunami Samueltaca:

–Cambajta rurajcuna ama huañuchun Mandaj cambaj Diosta mañapaiyari. Tucui ñucanchijmari juchata rurashca jahua ñucanchijta mandachun jatun mandajta churai nishpa mañashpaca millaita rurashcanchij– nircacuna.

20Chaimi Samuelca israelcunataca:

–Ama manchaichijchu. Tucui chai mana allicunatatajmari rurashcanguichij. Cunanca Mandaj Diosmanta ama anchurishpa tucui cancunapaj shunguhuan paipajllata ruraichij.

21Mandaj Diosmanta anchurishpa manapish ima caj yangallataca ama catinguichijchu. Chaicunaca yangalla cashcamantaca ima allitapish mana cungachu, mana quishpichi tucungachu.

22Mandaj Diosca, pai tucuita rurai tucuj cashcata, pai agllashca israelcunapi ricuchingapaj agllashcamantaca paipaj cajcunataca manataj saquingachu.

23Ñucapish Mandaj Diosta cancunamanta mañanataca mana saquishachu. Chaita saquinaca Mandaj Diosta p'iñachishpa juchallinami canga. Cancunata saquinapaj randica alli ñanpi mana pandashpa causanatami yachachisha.

24Mandaj Diosllata manchaichij. Cancunapajca paica jatun mancharinacunata rurashcamantaca tucui shunguhuan mana nij tucushpalla paipajllata ruraichij.

25Ashtahuanpish cancunapish, cancunata jatun mandajpish mana allita ruranallapi catishpaca chingaringuichijmi– nircami.