EZEQUIEL 6 - Quichua Chimborazo Bible

Israel llajtapi tiyaj urcucunata chingachinata huillashcamanta

1Mandaj Diosca ñucataca cashnami nirca:

2“Huañujlla aichayuj runa, Israel llajtapi tiyaj urcucunaman cambaj ñahuita churashpa, paicunata llaquichina cashcata huillai.

3Paicunamanca cashna ningui: Israel llajtapi tiyaj urcucunalla Mandaj Jatun Dios ima nishcata uyahuaichij. Mandaj Jatun Diosca, urcucunatapish, lomacunatapish, larca yacucunatapish, pugru pambacunatapish cashnami nin: Riquichij, ñucami cancunapajca espadata cachasha. Shinallataj lomacunapi tiyaj altarcunatapish chingachishatajmi.

4Cancunapaj altarcunaca llaquinayajmi saquiringa, intiman rijchaj dioscunatapish p'aquishami. Cancunapaj rurashca dioscunapaj ñaupajllapitajmi huañuchishpa urmachisha.

5Huañushca israelcunataca, rurashcalla dioscunapaj ñaupajpimi churasha. Tullucunataca altar muyundijcunapimi tsirapashpa shitasha.

6Cancuna maipi causacun pueblocunapish shitashcami saquiringa. Lomacunapi tiyaj altarcunapish llaquinayajmi saquiringa. Chashnami altarcunaca shitashca llaquinayaj tucunga. Cancuna rurashcalla dioscunapish p'aquirishpami tucuringa, intiman rijchaj dioscunapish chingaringami. Chashnami cancunapaj maquihuan imalla rurashcacunaca tucui chingaringa.

7Huañushcacunapish cancunapaj chaupillapitajmi urmangacuna. Chaita ricushpami, ñucataca Mandaj Diostaj cashcataca yachanguichij.

8Shina cashpapish cancunataca mana tucuicunata huañuchishpami, ashacunallata saquisha. Chaicunataca tucui llajtacunamanmi caita chaita cachasha.

9Cancunapuramanta causaihuan saquirijcunaca, shujtaj llajtacunapi prezu causacushpami, ñucataca yuyaringacuna. Rurashcalla dioscunata paicunapaj ñahuihuan ricushpa shungupi munashpa ñucamanta anchurishcamantaca, yallitajmi llaquirini. Paicunaca chai tucui millaita rurashcamantaca, quiquinllatajmi yuyarishpa pingaringacuna.

10Cai llaquicunataca, mana yangamantachu cacharcani. Chashna llaquichijta ricushpami ñucataca, Mandaj Diostaj cashcata yachangacuna ninmi ni” nircami.

11Mandaj Jatun Diosca cashnapishmi nirca: “Cambaj maquicunahuan huajtarishpa, chaquicunahuan jaitarishpa cashna ningui: Cai tucui millaita ruraj israelcunalla, ¡aij imachari tucunguichij! ningui. Paicunataca espadapish, yaricaipish, ungüipishmi huañuchinga.

12Carupi causajcunataca ungüimi huañuchinga, c'uchullapi causajcunataca espadami huañuchinga. Maijan saquirijcunaca, paicunata llaquichijcuna muyundijta shayacujllapitajmi yaricaihuan huañungacuna. Chashna rurashpami, ñuca p'iñarishcataca paicunapi pajtachisha.

13Paicunapaj rurashcalla tucui dioscunamanca tucui lomacunapi, tucui urcucunapi, p'angasapa yura ucucunapi, p'angasapa encina yura ucucunapimi inciensota cushpa rupachincuna. Paicunapaj dioscunaman cushpa rupachishca chai tucui altarcuna muyundijpi huañushcacuna siricujta ricushpami, ñucataca Mandaj Diostaj cashcata yachangacuna.

14Paicunataca ñuca maquita cacharishpami llaquichisha. Paicuna mai llajtapi causacujpipish, Diblat shuti pueblo c'uchullapi caj shitashca pambatapish yalli shitashcatami saquisha. Chashna llaquichijta ricushpami, ñucataca Mandaj Diostaj cashcata yachangacuna” nircami.