NÚMEROS 31 - Quichua Chimborazo Bible

Israelcunaca paicunata llaquichishca shinallataj madianitacunata llaquichishcami

1Mandaj Dios Moisesta mandashpaca cashnami nirca:

2“Madianitacuna israelcunata llaquichishcamanta paicunatapish llaquichichij. Chai q'uipaca cambaj yayacunahuan tandanacugringuillami” nircami.

3Chaimi Moisesca israelcunataca cashna nirca:

–Madianitacunahuan macanacunaman ringapaj cancunapuramanta maijancunata allichichij. Israelcunata llaquichishcamanta paicunatapish Mandaj Dios llaquichinata pajtachingapaj richij.

4Chai macanacuimanca, cada aillumanta 1.000 soldadocunata cachaichij– nircami.

5Shina nijpica, tucui israelcunamantaca cada aillumantami 1.000 soldadocunata allichirca. Macanacuiman rinalla cajcunaca tucuimantaca 12.000 soldadocunami carca.

6Moisesca chai macanacuimanca cada aillumanta 1.000 soldadocunatami cacharca. Eleazar curapaj churi Fineesca Diospajlla ucupi tiyaj vasocunata, tocanapaj trompetacunatapish apashcami rirca.

7Israelcunaca madianitacunahuanca Mandaj Dios Moisesta mandashca shinallatajmi macanacurca. Tucui c'aricunatami huañuchirca.

8Chaicunata huañuchishca jahuapish Madián llajtata jatun mandajcunataca Evi, Requem, Zur, Hur, Reba shuti pichca jatun mandajcunatapishmi huañuchirca. Beorpaj churi Balaamtapish espadahuanmi huañuchirca.

9Israelcunaca madianitacunapaj huarmicunata, huahuacunataca prezumi aparca. Animalcunatapish, huagracunatapish, tucui imalla charishcacunatapishmi aparca.

10Pueblocunatapish, chai muyundij llajta huasicunatapish tucuitami rupachirca.

11Ña mishashpaca imalla charishcacunatapish, gentecunatapish, animalcunatapish,

12prezumi aparca. Prezucunatapish, quichushcacunatapish Moisespaj, Eleazar curapaj, tucui israelcunapaj ñaupajmanmi aparca. Israelcunaca Jericó ch'imbapurapi caj Jordán yacu c'uchu uripi caj Moab pambapimi carpa huasicunapi tiyacurca.

13Moisespish, Eleazar curapish, israelcunata pushajcunapish macanacuimanta tigrajcunata carpa huasicunamanta canllaman tupangapajmi llujshirca.

14Macanacuimanta tigrajcunahuanca Moisesca soldadocunata mandajcunahuanpish, huaranga soldadocunata mandajcunahuanpish, patsaj soldadocunata mandajcunahuanpish p'iñarishpami,

15cashna nirca:

–Tucui cai huarmicunataca ¿ima nishpataj mana huañuchircanguichij?

16Chai huarmicunami Balaam runa mandashcata uyashpa israelcunataca Baal-peor nishca diosta adoranaman pushashpa Mandaj Diospaj ñaupajpi juchallichirca. Chaimantami Mandaj Diosca huañuchij llaquita cachashpa israelcunataca huañuchirca.

17Chaimanta cunanca c'ari huahuacunatapish, c'arihuan chayarishca huarmicunatapish tucuicunata huañuchichij.

18C'ari manaraj chayarishca huarmi huahuacunallata ama huañuchichijchu.

19Cancunapuramanta maijanpish shuj runata huañuchishca cashpa, huañushcapi tuparishca cashpaca carpa huasicunamanta canllaman canchis punllacunata saquirichun. Cancunapish, cancuna prezu apamushcacunapish, quimsa punlla tucujpipish, canchis punlla tucujpipish maillarishpa mapa illajlla tucuichij.

20Churanacunatapish, caramanta rurashca churanacunatapish, chivo millmamanta rurashca churanacunatapish tucuita tajshachuncuna. Caspimanta rurashca charinacunatapish tucuita maillashpa mapa illajlla tucunguichij– nircami.

21Eleazar curaca macanacuimanta shamuj tucui soldadocunataca cashnami nirca:

–Mandaj Dios Moisesta mandashpa cushca mandashcapica cashnami nicun:

22Curimanta, cullquimanta, broncemanta, fierromanta, estañomanta, plomo nishca fierromanta rurashca,

23ninapi mana rupaipaj cajcunataca ninapi rupachichij. Chaimi mapa illajlla canga. Mapa illajllata rurana yacuhuanpish mapa illajllata ruranguichij. Ashtahuanpish imapish ninapi rupaipaj cajcunataca mapa illajllata rurana yacuhuan maillashpa mapa illajllata ruranguichij.

24Canchis punlla tucujpica, cancunapaj churanacunata tajshashpa mapa illajlla tucuichij. Chai q'uipaca carpa huasicunaman yaicunguichijlla– nircami.

Macanacuipi japishcacunata chaupishcami

25Mandaj Dios Moisesta mandashpaca cashnami nirca:

26“Macanacuipi imallata japimushcacunataca canhuan, Eleazar curahuan, israelcunata pushajcunahuan tucushpa tucuita yupaichij. Huarmi huambracunatapish, animalcunatapish tucuita yupaichij.

27Chai q'uipaca macanacuipi mishashpa japimushcacunataca ishquipi chaupishpa, chaupitaca macanacunaman llujshijcunaman, caishuj chaupitaca saquirij israelcunaman cunguichij.

28Macanacuiman rijcunaman paicuna japina cashcata cucushpaca: Huarmi huambracunatapish, huagracunatapish, burrocunatapish, ovejacunatapish cada pichca patsajmanta shujta Mandaj Diosman cungapaj ch'icanchinguichij.

29Chai japishcacunataca Mandaj Diosman cushpa, Eleazar curaman cunguichij.

30Macanacuiman mana rij israelcunaman paicuna japina cashcata cucushpaca: Huarmi huambracunatapish, huagracunatapish, burrocunatapish, ovejacunatapish cada pichca chungamanta shujta Mandaj Diosman cungapaj ch'icanchinguichij. Chaicunataca Diospaj carpa huasita cuidacuj levitacunaman cunguichij” nircami.

31Shina nijpica Moiseshuan Eleazar curahuanca, Mandaj Dios Moisesta ima shina mandashca shinami rurarca.

32Macanacuipi japimushcacunata tucuita yupajpica, macanacuj soldadocuna japishcacunata mana yupashcami 675.000 ovejacuna,

3372.000 huagracuna,

3461.000 burrocuna carca.

35C'ari mana chayarishca huarmi huambracunata tucuita yupajpica, 32.000mi carca.

36Macanacuiman rij soldadocunaman chaupishpa cushca ovejacunaca 337.500mi carca.

37Chaicunata japishpaca, Mandaj Diosman cungapajca 675 ovejacunatami ch'icanchirca.

38Huagracunataca: 36.000 huagracunatami japirca. Chaicunata japishpaca Mandaj Diosman cungapajca, canchis chunga ishqui huagracunatami ch'icanchirca.

39Burrocunataca: 30.500 burrocunatami japirca. Chaicunata japishpaca Mandaj Diosman cungapajca sujta chunga shuj burrocunatami ch'icanchirca.

40Huarmi huambracunataca: 16.000tami japirca. Chaicunata japishpaca Mandaj Diosman cungapajca quimsa chunga ishquitami ch'icanchirca.

41Moisesca Mandaj Dios mandashca shinallatajmi, Mandaj Diosman cungapaj ch'icanchishcacunataca Eleazar curaman curca.

42Macanacuiman rijcuna japimushcataca, macanacuiman mana rijcunapish paicuna japina cashca chaupita paicuna japichunmi, Moisesca cashna curca.

43Israelcunaman chaupishpa cushca caishuj chaupica, 337.500 ovejacuna,

4436.000 huagracuna,

4530.500 burrocunami carca.

46Huarmi huambracunaca 16.000mi carca.

47Moisesca Mandaj Dios mandashca shinallatajmi, israelcuna japishca chaupimantaca Mandaj Diosman cungapajca huarmi huambracunatapish, animalcunatapish, cada pichca chungamanta shujta japirca. Chaicunataca Mandaj Diospaj carpa huasita cuidacuj levitacunamanmi curca.

48Huaranga soldadocunata mandajcunapish, patsaj soldadocunata mandajcunapish Moisespajman c'uchuyashpaca,

49cashnami nircacuna: Ñucanchij cambajta rurajcuna ñucanchij mandachun ñucanchijman cushca soldadocunata yupajpica, ñucanchij soldadocunaca shujllapish mana illarcachu.

50Chaimantami ñucanchij japimushcacunata Mandaj Diosman cungapajca cada quiquin imallata japishcacunataca: “Curimanta rurashca sumaj charinacunata, brazaletecunata, manillacunata, sortijascunata, zarcillocunata, cadenacunatapish apamunchij. Chaicunaca ñucanchij juchacunamanta Mandaj Diosman cungapajmi” nircacunami.

51Curimanta rurashca sumaj charinacunataca, Moiseshuan Eleazar curahuanmi chasquircacuna.

52Huaranga soldadocunata mandajcunapish, patsaj soldadocunata mandajcunapish Mandaj Diosman cungapaj apamushca curica, 16.750 siclotami pezarca.

53Macanacuiman rij soldadocunaca macanacuita mishashpa japishcacunataca cada quiquin japishcatami apamurca.

54Huaranga soldadocunata mandajcuna, patsaj soldadocunata mandajcuna Mandaj Diosman cushca curita Moiseshuan, Eleazar curahuan japishpaca, Mandaj Dios israelcunata yuyarichunmi, Dioshuan tupanacuna carpa huasiman Mandaj Diospaj ñaupajman aparca.