JEREMÍAS 21 - Quichua Chimborazo Bible

Jatun mandaj Nabucodonosor Jerusalén pueblota urmachishcamanta

1-2Judá llajtata jatun mandaj Sedequiasca: “Babilonia llajtata jatun mandaj Nabucodonosormari ñucanchijhuan macanacungapaj shamushca. Mandaj Diosta ñucanchijmanta tapupai. Paica tucuita rurai tucuj cashcamanta ima jatun mancharinata rurajpi, chai jatun mandajca ñucanchijmanta anchuringapishchari” nichunmi, Malquiaspaj churi Pasurtapish, Maasiaspaj churi Sofonías curatapish Jeremiaspajman cacharca. Chashna tapuchun cachai punllami Mandaj Diosca, Jeremiastaca cai shimicunata huillachun mandarca:

3Jeremiasca paicunamanca cashnami nirca: “Sedequiasman cashna huillagrichij:

4Israelcunata Mandaj Diosca cashnami nin: Ñucaca cancunapaj maquipi charicun macanacunacunataca imapaj mana valijtami rurani. Chai Babilonia llajtata jatun mandajtaca pirca huashamanta ama yaicuchun, ña mana ch'imbapura macanacushpa jarcai tucunguichijchu. Jatun pirca huasha muyundijta shayashpa cancunata chapacuj chai caldeo soldadocunataca tucuicunatami cai puebloman yaicuchisha.

5Ñucaca cancunahuanca yallitaj p'iñarishca, llaquirishcami cani. Chaimanta ñucatajmi cancunahuanca, tucuita rurai tucuj ñuca sinchi maquihuan macanacugrini.

6Tucui cai pueblopi causajcunatami jatunta llaquichigrini. Runacunapish, animalcunapish jatun ungüihuanmi huañungacuna.

7Chai q'uipaca, Judá llajtata jatun mandaj Sedequiastapish ungüipi, espadapi, yaricaipi mana huañushpa, cai pueblopi causacujraj paita servijcunatapish, Babilonia llajtata jatun mandaj Nabucodonosorpaj maquipimi churasha. Paicunata p'iñashpa huañuchingapaj shamushca chai mandajpaj maquipi churajpica, espadahuanmi huañuchichinga. Paica pita mana llaquingachu, pimanta mana nanaringachu. Japishcahuan huañuchingallami ninmi nigrichij ningui.

8Tucui Judá runacunamanca cashna huillai: Mandaj Diosca cashnami nin: Cunanca cancunamanca causanata, mana cashpaca huañunata agllachunmi ricuchini.

9Cai pueblopi saquirijcunaca espadapi cashpa, yaricaihuan cashpa, ungüihuan cashpapish huañungacunatajmi. Ashtahuanpish caimanta llujshishpa, cancunata muyujta chapacuj caldeo soldadocunapajman rishpaca causangacunami. Quiquin chaquihuan llujshishpa, paicunapaj maquipi yaicugrijcunaca huañunallamantapish quishpiringuichijmi.

10Ñucaca llaquichingapajmi tigrashpa ricurcani, mana ima allita cungapaj ricucunichu. Babilonia llajtata jatun mandajpaj maquipimi churani. Paimi ninata japichishpa tucuchinga ninmi Mandaj Diosca ningui.

11Judá llajtata jatun mandajtaca, paipaj familiandijta cashna ningui: Mandaj Dios rimashcata uyaichij:

12Davidpaj tucui huasi ucupuracunataca, Mandaj Diosca cashnami nin: Cada tutamanta mandanapi tiyarishpaca, huajchacunata llaquichijcunapaj maquimanta mitsashpa allita ruraichigari. Ñataj cancuna mana chashna rurajpica, cancuna millaita rurashcamanta ñuca yallitaj p'iñarijpi nina lunyanman. Chaitaca pi mana huañuchi tucungachu ninmi.

13Mandaj Diosca cashnapishmi nin: Pugru pamba chaupipi caj jatun rumi jahuapi causajcunalla, ñucatajmi cancunata llaquichingapaj shayarini. Cancunaca: ¿Pitaj ñucanchijhuan macanacungapaj huichiyai tucungari? Ñucanchij causacunmanca ¿pitaj yaicui tucungari? ninguichijmi.

14Ñucamari cancuna millaita rurashcamanta llaquichina shinataj llaquichigrini. Ñucamari paipaj jatun sachacunataca tucui rupachichisha. Tucui muyundijpi ima tiyajcunatapishmi rupachichisha ninmi Mandaj Diosca ningui” nircami.