1Cai tucuita cancunaman huillacushcamanta jatun yuyaica caimi: Ñucanchijca curacunata jatun pushaj curatami charinchij. Paica jahua pachapi Jatun mandajpaj tiyarina alli ladopimi tiyarirca.
2Jesusca mana gentecuna rurashca, Jatun Dios rurashca Diospajlla ucupimi curacuna rurana cashcata ruracun. Chai huasimi Diospajtaj huasica.
3Curacunata jatun pushaj curataca tucuicunatami imalla cushcacunata, sacrificiocunatapish Diosman cuchun churashca. Chashna cajpica, Jesuspish Diosmanca imallatapish cunataca charinmari.
4Mandashcapi nishca shinaca, Diosman cushca ofrendacunata cuj curacuna tiyashcaraj cajpica, pai cai pachapi cashpaca curallapish mana canmanchu carca.
5Diospaj carpa huasita Moisés ruranapajca Diosmari Moisestaca: “Riqui, chai urcupi ima shinalla ruranata ricuchishca shinataj tucuita rurangui” nishca. Chaimantami chai curacunaca jahua pachapi tiyajmanta ricuchij llandu shinalla Diospaj carpa huasipica Diospajta rurancuna.
6Ashtahuanpish Jesús Diospajta ruranaca paicuna ruracushcata mai yalli allimari. Ñaupaman cusha nishcamanta yalli allita cusha nishpa ari nishcapi caishujmanta chaishujmanta rimaj cachun churashcami.
7Dios ñaupaman cusha nishpa ari ninacushca allillataj cashca cajpica, shujtajta cusha nishpa mana ari ninmanchu carca.
8Chaimanta paicunata rimashpami cashna nirca:
“(Jatun Diosca cashnami nin) Shamuj punllapica Israelpaj, Judapaj ailluhuanca shuj mushuj ari nishcatami churasha.
9Mana cancunapaj ñaupa yayacunata maquimanta aisashpa Egiptomanta llujshichi punllapi ari ninacushca shinachu rurasha.
Ñucahuan ari ninacushcata pajtachinapi mana catijpimi paicunataca shitashcata saquircani. (Ninmi Jatun Diosca)
10Chai punllacuna q'uipaca, israelcunaman cusha nishpa ari nishcaca cashnami canga.
Ñuca mandashcacunataca paicunapaj yuyaipimi churasha, paicunapaj shungupimi quillcasha.
Chashna rurashpaca, paicunapaj Diosmi casha, paicunapish ñuca pueblomi cangacuna (ninmi Jatun Diosca)
11Chai punllacunapica uchillacunapish jatuncunapish ña ñucata rijsishcamanta paipuratapish paipaj huauquitapish “Jatun Diosta rijsinami cangui” nishpa pi mana yachachingacunachu.
12Paicuna ima mana allicunata rurashcacunatapish perdonashami.
Paicunapaj juchacunata, millaita rurashcacunatapish
manataj yuyarishachu” ninmi.
13“Mushuj ari nishcata” nishpaca, ñaupaman cusha nishpa ari nishcapaj randimi mushujta ari nishca. Chai maucaca, maucayashpa ñallami chingaringa.
Who We AreWhat We EelieveWhat We Do
2025 by iamachristian.org,Inc All rights reserved.
