ÉXODO 25 - Quichua Chimborazo Bible

Diospaj carpa huasita ruranapaj imallata cushcami(Ex 35.4-9)

1Mandaj Diosca Moisestaca:

2“Israelcunataca: Ñucaman cujcunapajta tandachichij. Ñucaman cunata munashcamanta tucui shunguhuan cujcunapajta tandaichij.

3Paicuna cushcacunataca caicunatami japina canguichij: Curita, cullquita, cobreta,

4azul millmata, morado millmata, amsa puca millmata, ashtahuan alli linota, chivo millmata,

5pucajllata tinishca carnero carata, tejoncunapaj caracunata, acacia caspita,

6lamparapi churashpa rupachina aceiteta, imata Diospajlla ch'icanyachina aceiteta ruranata, mishquijllata ashnacuj inciensota ruranapaj chagruna jambicunatapish japinguichij.

7Efodpi, pectoralpi churanapaj ónice rumicunata, shujtaj sumaj rumicunata japinguichij.

8Tucui chaicunahuan ñucapajlla shuj carpa huasita ruraichij. Chaipimi ñucaca paicunapaj chaupipi causasha.

9Diospaj carpa huasitapish, chaipi tucui imalla tiyajcunatapish ima shinalla ruranata ñuca ricuchishca shinataj rurangui.

Dioshuan ari ninacushcata ricuchij quillcata huaquichina arcata rurachun mandashcami(Ex 37.1-9)

10Acacia caspimanta shuj arcata rurangui. Chai arcataca sunimanca shuj metro chunga ishqui chaupi centimetrota, anchomanca sujta chunga canchis chaupi centimetrota, altomanca sujta chunga canchis chaupi centimetrota rurangui.

11Chai arcataca ucutapish jahuatapish alli curihuan llihuingui. Muyundij filocunataca curi ribeteta churangui.

12Chai arcapajca chuscu curi argollacunata rurashpa, chuscu esquinacunapi churangui. Ishquitaca shuj ladoman, ishquitaca caishuj ladoman churangui.

13Acacia suni caspicunatapish rurashpa chai jahuataca curihuan llihuingui.

14Chai caspicunataca arcata huandushpa apanapaj churashca argollacunapi churangui.

15Chai caspicunaca arcapi churashca argollacunallapitaj saquirichun. Chaimantaca mana anchuchishcachu canga.

16Ñucahuan ari ninacushcata ricuchij quillcata canman cushcataca chai arcapi huaquichingui.

17Arcapaj propiciatoriotaca sunimanca shuj metro chunga ishqui chaupi centímetrota, anchomanca sujta chunga canchis chaupi centimetrota alli curita rurangui.

18Martillohuan tacashpa curi ishqui querubincunatapish rurangui. Chaitaca arcapaj propiciatorio ishqui ladoman churangui.

19Chai ishqui querubincunataca, arcapaj propiciatoriollapitaj tandachishpa rurangui. Shujtaca shuj lado filoman, caishujtaca caishuj lado filoman rurangui.

20Chai querubincunaca arcapaj propiciatoriota urilla ricushpa cumulla ch'imbapura tiyacuj cachun. Paicunapaj alascunaca arcapaj propiciatoriota llandungapaj jahuata chutashca cachun.

21Chai propiciatoriotaca arcapaj jahuapi churangui. Arca ucupica ñucahuan ari ninacushcata ricuchij ñuca cushca mandashcata churangui.

22Chai arcamanta canman ricurishpami, arcapaj propiciatorio jahuamanta canhuan rimasha. Israelcunata tucui ñuca imalla mandashcataca ñucahuan ari ninacushcata ricuchij quillcata huaquichina arca jahuapi caj ishqui querubincunapaj chaupimanta arcapaj propiciatorio jahuallamantatajmi canman huillasha” nircami.

Taita Diospaj ñaupajpi punllanta cachun tandata churana mezami(Ex 37.10-16)

23Acacia caspihuan shuj mezatapish rurangui. Chaica sunimanca iscun chunga centímetro, anchomanca chuscu chunga pichca centímetro, altomanca sujta chunga canchis chaupi centímetro cachun.

24Chai mezataca alli curihuan tucuita llihuingui. Chai muyundij filotaca curi ribeteta rurangui.

25Chai muyundijtaca canchis chaupi centímetro ancho jarcata churangui. Chaitapish muyundijta curi ribeteta rurangui.

26Curi chuscu argollacunata rurashpa, chaicunataca chai meza chaquipaj chuscu esquinapi churangui.

27Chai argollacunataca meza filota jarcashca ucunijllapi churashca cachun. Chai argollacunaca huanduna caspicunata churachishpa, mezata apangapaj chashna churashca cachun.

28Chai mezata huanduna caspicunatapish acacia caspimanta rurashpa, jahuataca curihuan llihuingui.

29Platocunata, cucharacunata, trinchicunata, cuchillocunata, vasocunatapish ashtahuan alli curita rurangui. Tasacunaca yacu shinacunata tallinapajmi canga.

30Chai mezapica ñuca ñaupajpi punllanta cana tanda ama illachun churarangui.

Curi candeleromi(Ex 37.17-24)

31Chai candelerotaca chaquiyujta, chai troncotapish copacunatajllayujta, manzanacunatajllayujta, sisacunatajllayujta ashtahuan alli curita martillohuan tacashpa rurangui.

32Chaitaca sujta maquicunayujta rurangui. Chai maquicunaca quimsaca shuj ladoman, quimsaca caishuj ladoman llujshishca cachun.

33Cada maquicunapi almendro sisatajlla quimsa copacunata, shuj manzanata, shuj sisatapish rurangui. Caishuj lado maquipajpish quimsa copacunata, shuj manzanata, chai puntapica almendro sisatajllata rurashca cachun. Sujta maquicunapitaj chashna rurashca cachun.

34Tucuita aparij troncopipish almendro sisatajlla chuscu copacunata rurangui. Shuj manzanatajllatapish, shuj sisatajllatapish rurangui.

35Chai troncomanta llujshij quimsa maquicunaca cada maqui puntapi shuj shuj manzanatajllatami charinga.

36Candelero troncopish, chaimanta llujshij maquicunapish alli curita candelero troncopi shujllata rurashcami cana can. Candelero troncopi, chaimanta llujshij maquicunapica manzanatajllacunata martillohuan tacashpa rurashca cachun.

37Canchis lamparacunata rurashpa, ñaupaj ladota achijyachichun candelero maquicuna jahuapi churangui.

38Mecha rupashca ushpata anchuchinacunatapish, chai ushpata tandana platocunatapish alli curillamantataj rurangui.

39Chaipi tucui imalla ruranacunataca shuj talento alli curihuan rurangui.

40Ima shinalla ruranata Sinaí urcupi ñuca ricuchishca shinallataj tucuita rurangui.