ESDRAS 10 - Quichua Chimborazo Bible

Mana Israel huarmicunata llujshichishpa cachashcami

1Diospaj huasi ñaupajpi cungurishpa, huacashpa tucuicunapaj juchata Diosman huillashpa Esdras mañacujpica, yallitaj achca israelcunami paipaj muyundijta tandanacurcacuna. Chaipica c'aricunapish, huarmicunapish, huahuacunapish tucuicunami yallitaj huacarcacuna.

2Chaipimi Elampaj huahua huahuapura Jehielpaj churi Secaniasca, Esdrastaca: “Ñucanchijca cai llajtapi causaj manapish ñucanchijpura caj huarmicunata ñucanchij huarmicuna cachun japishpami, ñucanchij Diosta p'iñachishpa juchallishcanchij. Chashna cajpipish israelcunapajca ima shinapish alli tucuna tiyanrajmi.

3Cunanca can ñuca amopish, ñucanchij Dios mandashcata cazuj tucui caishujcunapish cunashca shinami, tucui ñucanchij huarmicunatapish, paicunahuan charishca huahuacunatapish llujshichishpa cachanata ñucanchij Dioshuan ari ninacugrinchij. Chaitaca mandashcapi nishca shinatajmi ruragrinchij.

4Jatari, chaitaca canmi rurachina cangui. Ñucanchijpish canhuanmi cashun. Chashna cashcamanta, imatapish ama manchashpa chaita utca rurailla” nircami.

5Shina nijpi Esdras jatarishpaca, curacunata mandajcunatapish, levitacunata mandajcunatapish, tucui israelcunatapish Secanías yuyaita cushcata ari nichijpimi, ari nircacuna.

6Mandaj Diospaj huasi ñaupajmanta Esdras jatarishpa rishpaca, Eliasibpaj churi Johanán tiyacun ucumanmi yaicurca. Chaipica prezu apashca cashcamanta tigramushcacuna juchallishcamanta llaquilla cashpami, micunatapish mana micushpa, yacutapish mana ubyashpa pacarirca.

7Chai q'uipaca, prezumanta tigramushca Judapi causajcunamanpish, Jerusalenpi causajcunamanpish, Jerusalenpi tandanacuchunmi huillachirca.

8Israelcunata pushajcuna, cunaj yuyajcuna yuyarishca shinallataj maijanpish quimsa punllacama mana tandanacumujpica, paicuna tucui imalla charishcacunatapish, allpacunatapish quichushpa, prezu apashcamanta tigramushcacunapurapi cashcamantapish anchuchishcami canga nishpami huillachirca.

9Chaimi Judá aillupish, Benjamín aillupish manaraj quimsa punlla tucujpi, Jerusalenpi tandanacurcacuna. Paicunaca huatapaj iscun quilla ishqui chunga punllapi Diospaj huasi canllapi tandanacushpa tiyarishpami, chai huarmicunata llujshichishpa cachana cashcamantapish, tamyacushcamantapish chujchushpa tiyacurcacuna.

10Chaipi Esdras cura jatarishpaca:

–Cancunaca manapish Israel huarmicunata cancunapaj huarmicuna cachun japishpami juchallishcanguichij. Chashnami Israelpica juchaca yallitaj mirarishca.

11Cunanca cai llajtapi causajcunamanta, mana Israel caj huarmicunamanta anchurishpa, cancunapaj ñaupa yayacunapaj Dios munashcata rurashpa Mandaj Diosta jatunyachichij– nircami.

12Chashna nijpica, tucui chaipi tandanacushcacunami:

Can nishca shina rurarichunlla nishpa sinchita caparircacuna.

13Achcacunamari canchij. Tamya punllacunapishmari. Cai ñanllapica mana cai tucunchijchu. Cashna shina juchata rurajcunaca achcacuna cashcamanta shuj punllapi ishqui punllallapica mana allichi tucuringachu.

14Tucui tandanacushcacunapaj randi ñucanchijta mandajcuna caipi saquirinachari alli canman. Mana Israel caj huarmicunayuj cajcunataca cada paicunapaj pueblomanta cunaj yuyajcuna, juezcuna ima punllapaj shamuna cashcapaj pushashpa shamushpa allichichun. Chashna chai juchamanta anchurishpami, ñucanchij Dios nina sindirij shina p'iñarishcataca anchuchi tucunchij– nircacunami.

15Chaitaca Asaelpaj churi Jonatanhuan, Ticva runapaj churi Jahaziasllahuanmi chashna ruranaca mana allichu nircacuna. Mesulam, Sabetai levitacunapish manatajmari allichu nircacuna.

16Paicuna chashna nicujpipish prezu apashcamanta tigramushcacunaca, ñaupaman ima shina ari ninacushca shinallatajmi rurarcacuna. Esdras curaca ñaupa yayacunamanta mirarishca quiquinpurallata maijan mandajcunatami chaita rurachunca ch'icanchirca. Chaimi paicunaca chunga quilla callari punllapi chai huarmicunata llujshichishpa cachangapaj paicuna quiquintaj tiyarishpa alli ricui callarircacuna.

17Paicunaca mana Israel caj huarmicunata paicunapaj huarmicuna cachun japishcata tucui alli ricunataca caishuj huata callari quillapaj punta punllapimi tucuchircacuna.

18Mana Israel caj huarmicunata paicunapaj huarmicuna cachun japij curacunapaj churicunaca caicunami: Josadacpaj huahua huahuacunapuramanta Jesúa paipaj huauquicunapish: Maasías, Eliezer, Jarib, Gedalias shuticunami carca.

19Paicunami paicunapaj huarmicunata llujshichishpa cachanata ari ninacushpa maquita curcacuna. Paicuna yallitaj millaita rurashpa juchallishcata anchuchichunpish, canlla ovejacunamanta shuj carnerotami Diosman curcacuna.

20Imerpaj huahua huahuapuracunamantaca: Hanani, Zebadiasmi mana Israel huarmiyuj cashca carca.

21Harimpaj huahua huahuapuracunamantaca: Maasías, Elías, Semaías, Jehiel, Uziasmi carca.

22Pasurpaj huahua huahuapuracunamantaca: Elioenai, Maasías, Ismael, Natanael, Jozabad, Elasami carca.

23Levitacunapuramantaca: Jozabad, Simei, Kelita nishca Kelaía, Petaías, Judá, Eliezermi carca.

24Cantajcunapuramantaca: Eliasibmi carca. Pungupi cuidajcunapuramantaca: Salum, Telem, Urimi carca.

25Israelcunapuramantaca: Parospaj huahua huahuacuna: Ramía, Jezías, Malquías, Mijamín, Eleazar, Malquías, Benaiami carca.

26Elampaj huahua huahuapuramantaca: Matanías, Zacarías, Jehiel, Abdi, Jeremot, Eliasmi carca.

27Zatupaj huahua huahuapuramantaca: Elioenai, Eliasib, Matanías, Jeremot, Zabad, Azizami carca.

28Bebaipaj huahua huahuapuramantaca: Johanán, Hananías, Zabai, Atlaimi carca.

29Banipaj huahua huahuapuramantaca: Mesulam, Maluc, Adaía, Jasub, Seal, Ramotmi carca.

30Pahat-moabpaj huahua huahuapuramantaca: Adna, Quelal, Benaía, Maasías, Matanías, Bezaleel, Binúi, Manasesmi carca.

31Harimpaj huahua huahuapuramantaca: Eliezer, Isías, Malquías, Semaías, Simeón,

32Benjamín, Maluc, Semariasmi carca.

33Hasumpaj huahua huahuapuramantaca: Matenai, Matata, Zabad, Elifelet, Jeremai, Manasés, Simeimi carca.

34Banipaj huahua huahuapuramantaca: Madai, Amram, Uel,

35Benaía, Bedías, Quelúhi,

36Vanías, Meremot, Eliasib,

37Matanías, Matenai, Jaasai,

38Bani, Binúi, Simei,

39Selemías, Natán, Adaía,

40Macnadebai, Sasai, Sarai,

41Azareel, Selemías, Semarías,

42Salum, Amarías, Josemi carca.

43Nebopaj huahua huahuapuramantapish: Jeiel, Matatías, Zabad, Zebina, Jadau, Joel, Benaiami carca.

44Tucui chai runacunami, mana Israel caj huarmicunata paicunapaj huarmicuna cachun japishca carca. Maijan huarmicunaca, paicunahuan ñami huahuacunata charishca carca.