JUECES 15 - Quichua Chimborazo Bible

1Chai asha punllacuna q'uipami, trigota tandana punllacunapi Sansonca paipaj huarmita ricunaman shuj chivitota apashpa rishpa chayashpaca:

–Ñuca huarmita ricungapajmi pai tiyacun ucuman yaicusha nini– nijpi, huarmipaj yayaca mana yaicuchisha nirca.

2Ashtahuanpish cashnami nirca:

–Mana ninchu yuyashpami canhuan apanacujllahuantaj cazarachircani. Paipaj randica, paipaj q'uipa ñañahuan cazarai. ¿Manachu paicari paita yalli sumaj?– nirca.

3Chaimi Sansonca:

–Cunanca filisteocunata ima llaquita rurashpapish, ima juchachina illajllami casha– nirca.

4Chaimanta rishpami Sansonca 300 zorracunata japishpa, ishqui ishquita chupacunapura tinguishpa nina sindina mechata tinguishca chupacunapi huatarca.

5Chai q'uipaca nina sindita japichishpa tinguishca zorracunapi huatashpami filisteocunapaj chagracunapi cacharishpa, paicunapaj trigotaca chagrapi shayacujtapish, ña tandashpa parbashcatapish tucui rupachirca. Uva chagracunatapish, olivos yuracunatapishmi tucui rupachirca.

6Filisteocunaca:

–¿Pishi chaitaca rurarca?– nishpa tapui callarijpimi,

–Timnat pueblopi causaj runamari, Sansonpaj huarmi caj paipaj ushushitaca, Sansonhuan apanacuj runahuan cazarachirca. Chaimanta Sansón p'iñarishpamari chashna rurashca– nishpa huillajpimi, filisteocunaca chai huasiman rishpa chai runataca paipaj ushushindij rupachircacuna.

7Chaimi Sansonca:

–Cancuna chashna rurashcamantaca, ñucapish cancunata llaquichingacama manataj samarishachu– nirca.

8Chashna yallitaj p'iñarishpami, Sansonca filisteocunataca tucui tullucuna p'aquirijta macashpa huañuchishpa, paica Etam jatun peña quinripi tiyaj jutcupi causagrirca.

Burro jashlinhuan filisteocunata Sansón Lehipi mishashcami

9Filisteocunaca Judá aillupaj llajtaman huichiyashpami, Lehipi carpa huasicunata shayachishpa tucuipi jundarircacuna.

10Chaimi Judá ailluca:

–¿Ima nishpataj ñucanchijhuan macanacunaman huichiyamurcanguichij?– nijpi filisteocunaca:

–Ñucanchijca Sansonta prezu japingapajmari huichiyamurcanchij. Pai ñucanchijta llaquichishca shinallataj llaquichingapaj– nircacuna.

11Chaimi Judá aillupaj, 3.000 runacuna Etam jatun peña quinripi tiyaj jutcuman Sansonpajman rishpaca:

–Filisteocuna ñucanchijta mishashpa, paicuna mandacushcataca ¿manachu yachangui? ¿Ima nishpataj chashna ruranguiyari?– nijpi Sansonca:

–Ñucata llaquichijpimi, ñucapish paicunataca chai shinallataj rurarcani– nirca.

12Shina nijpi paicunaca:

–Ñucanchijca canta japishpa, filisteocunapaj maquipi churangapajmi shamunchij– nijpi Sansonca:

–Cancunallataj ñucata huañuchishun nicunguichijman, ama llullashpalla huillaichij– nirca.

13Chaimi paicunaca:

–Mana huañuchishunchu. Canta japishpa filisteocunapaj maquipi churangapajllami shamunchij– nishpami ishqui mushuj huascacunahuan huatashpa, chai peñamantaca llujshichishpa pusharcacuna.

14Lehiman chayajpica, filisteocunaca caparirinacushpami paita tupanaman llujshircacuna. Mandaj Diospaj Espíritu Sansonpaj jahuaman shamujpimi, maquicunapi huatashca huascacunaca linota ninahuan rupachishca shinalla tucurca. Chaimantami paipaj maquicunata huatashca huascacunaca pambaman urmarca.

15Chaimantami manaraj alli chaquishca burro jashlin tulluta chai pambapi ricushpaca, chaita japishpa huaranga filisteocunata huañuchirca.

16Chaipimi Sansonca:

“Burro jashlinllahuanmari shuj montonta, ishqui montonta huañuchini.

Burro jashlinllahuanmari huaranga runacunata huañuchini” nirca.

17Chashna nishcahuan chai pamballapitaj chai tulluta shitashpami, chai pambataca, Ramat-lehita shutichirca.

18Sansonca yallitaj yacunaihuan cashpami, Mandaj Diostaca: “Canca cambajta ruraj runata mishachishpamari jatun quishpirinata cushcangui. Chashna cashca jahua yacunaihuan huañucushpa circuncisionta mana rurashcacunapaj maquipi japitucuchun ama saquihuaichu” nishpami mañarca.

19Chaimi Jatun Diosca, Lehipi caj jutcuta pascajpi yacu llujshijpi, Sansonca chai yacuta ubyashpa, cutinllataj fuerzata japirca. Chaimantami Lehipi cunancama caj pugyutaca, En-hacoreta shutichirca.

20Sansonca filisteocuna mandacui punllacunapica, ishqui chunga huatacunatami israelcunata mandarca.