PROVERBIOS 17 - Quichua Chimborazo Bible

1Huasipi sumaj micunacuna achca tiyajpipish, p'iñanacushpalla

causanapaj randica, yangallata

micushpapish sumajta causanamari alli.

2Alli yuyaiyuj servijca, amopaj mana cazuj churitapish mandangallami.

Amoca pai imalla charishcatapish,

paipaj caishuj churicunaman

shinallatajmi chaupinga.

3Curipish, cullquipish pailapi

churashpa hornopi rupachijpimi,

alli cashcaca ricurin.

Ashtahuanpish runacunapaj shungutacarin Mandaj Diosmari ricucun.

4Millaita rurajca, llullacunatami

alli uyan.

Llulla runapica, millai yuyaicunata

cujcunatami cushicushpa uyancuna.

5Huajcha runata asijca, paita ruraj Diostamari p'iñachin.

Huajcha runapaj llaquimanta cushicujca, paipish llaqui tucungallatajmi.

6Yuyajcunapajca, nietocunaca sumaj corona shinami.

Shinallataj huahuacunapish, yaya

mamamantami cushicuncuna.

7Sumaj shimicunata rimanaca, mana rumi shungu runapajmi.

Llulla shimicunata rimanacarin mana mandajpajchu.

8Imapajpish huashalla camarij

runapajca, camarinaca achca valij sumaj rumita cushca shinami.

Huashalla camarishpaca, imatapish jahuallami japin.

9Llaquichijpipish chaita cungarishpa c'uyajca, alli tucunatami mashcan.

Ashtahuanpish parlarishpa purijca, paihuan apanacujtapish caruyachinmi.

10Yuyaisapa runataca jarcashpa

rimashcaca, rumi shungu runata

patsaj cutin azotishcatapish yallimi allichin.

11Mana cazushpa pitapish p'iñachij runaca, macanacuillatami mashcan.

Paita llaquichingapajca, millai

runami chayanga.

12Rumi shungu runa ima millaita

ruracujpi tupanapaj randica,

huahuacunata quichushcamanta p'iñarishca huarmi osohuan tupashcarajchari mana ima canman.

13Maijanpish paita ayudajta llaquichijpica, paipaj huasimantapish llaquicunaca

manataj anchuringachu.

14P'iñanacuita callarichijca, jatun

yacuta cacharij shinami.

P'iñanacui manaraj callarijpi anchuringui.

15Diosta mana manchajta cacharishpa, cashcata rurajtaraj llaquichijcunataca,

Mandaj Diosca manataj ricunachinchu.

16Rumi shungu runaca alli yachaj cangapaj, achca cullquita cushpapish, yuyaita mana japishcamantaca, mana yachai tucunchu.

17Alli apanacuj runaca paihuan apanacujtaca, tucui causaipimi c'uyan.

Ima llaqui japijpipish, quiquin huauqui

shinami llaquin.

18Yuyaita mana japij runaca, quiquinhuan

apanacuj cashcamanta garante tucunllami.

19P'iñanacuita munajca, juchata

ruranatami munan.

Punguta alli pascajpish, quiquinpajllatajmi

llaquita mashcan.

20Millai shungu runaca, manataj sumaj

causaita japingachu.

Shimi cacharishca llulla runapish,

jatun llaquipimi urmanga.

21Ch'ahuanyashca churita charij yayaca,

huacashpami causan.

Rumi shungu churita charij yayapish,

mana cushicui tucunchu.

22Cushijlla shunguhuan causanaca,

aichapajpish alli jambimi.

Ashtahuanpish llaqui shungullahuan

causajpica, tullucamami chaquichin.

23Diosta mana manchaj runaca,

camarita pacalla japishpami,

manapish mitsana cashcataraj mitsan.

24Yuyaisapa runa alli yachaj cashcataca,

ñahuillapitaj ricunallami.

Ashtahuanpish rumi shungu runaca,

tucui cai pachata muyucuj shina

imatapish yuyacunllami.

25Rumi shungu churica yayapajca,

llashaj quipi shinami.

Huachaj mamatapish huacachishpallami

causan.

26Cashcata ruraj runata huañuipi

churanaca mana allichu.

Allita ruraj, alli runacunata

chugrichinapish mana allichu.

27Alli yachajcunaca, ashallatami

rimancuna.

Yuyaisapacunaca, imapajpish alli

yuyaiyujmi.

28Uyashpalla tiyacujpica, rumi

shungu runatapish yachaisapa

cashcata yuyanllacunami.

Yuyaisapa runaca, mana shimi

cacharishcachu.