ISAÍAS 19 - Quichua Chimborazo Bible

Egipto llajtata llaquichinata huillashcami

1Egipto llajta ima tucuna cashcataca cashnami huillachishca:

Mandaj Diosca callpacuj p'uyupi tiyarishcami Egiptomanca yaicunga.

Egiptopi tiyaj rurashcalla dioscunaca paipaj ñaupajpimi chujchungacuna.

Egipciocunapish tucuicunami manchaihuan huañucungacuna.

2“Egipciocunataca paicunapurallataj macanacuchunmi jatarichigrini.

Cada quiquinmi paicunapaj huauquillahuantaj macanacungacuna.

Cada quiquinmi llajtapi causajcunallahuantaj macanacungacuna.

Shuj puebloca caishuj pueblohuanmi macanacunga.

Shuj llajtaca caishuj llajtahuanmi macanacungacuna.

3Egipciocunapurapica alli yuyaiyuj canaca mana tiyangachu.

Paicuna imallata ruranata yuyarishcatapish chingachishami.

Chaimi paicunaca paicunapaj rurashcalla dioscunata, paicunapaj brujocunata, huañushcacunahuan rimajcunata, adivinocunata tapungacuna.

4Egipciocunataca p'iña amopaj maquipimi churasha.

Paicunataca mana llaquishpa llaquichij jatun mandajmi mandanga” ninmi Tucuita Mandaj Jatun Diosca.

5Mama cucha yacupish chaquirishpa ucuyangami.

Jatun yacupish chaquirishpa tucuringami.

6Yacu chaquirijpi yacu larcacunapish ashnacujmi saquiringa.

Callpacuj yacucunapish chaquirishpami catinga.

Carrizocunapish, juncocunapish tucuimi chaquiringa.

7Jatun yacu c'uchupi tiyaj michina pambacunapish chaquiringami.

Nilo yacu uripi tiyaj michinacunapish chaquiringami.

Yacu uripi caj tarpushcacunapish chaquiringami.

Tucuimi chingaringa, ña mana ashtahuan tiyangachu.

8Chalhuata japijcunapish llaquillami cangacuna.

Fierro ipihuan chalhuata japijcunapish tucuicunami jatunta huacangacuna.

Linchihuan chalhuata japishpa causajcunapish tucuicunami llaquihuan huañucungacuna.

9Alli linopi trabajajcunapish, ahuajcunapish musparishcacunami canga.

10Chalhuana tucui linchicunapish yangami lliquiringa.

Chalhuacunata mirachina cuchacunata rurajcunapish, llaquillami causangacuna.

11Zoanpi mandajcunaca upacunami.

Chaica chashnatajmi.

Yachaisapa cunajcuna Faraonman yuyaita cushcaca yangamanmari tigrashca.

Chashna tucujpica, ¿ima shinataj Faraonmanca: “Ñucanchijca jatun yachajcunapaj huahua huahuacunami canchij.

Ñucanchijca ñaupa jatun mandajcunapaj huahua huahuacunami canchij” ninguichigari?

12Cambaj yachaisapacunaca cunanca ¿maipitagari?

Tucuita Mandaj Dios Egiptota ima shinalla llaquichina cashcata canman huillangapaj, canman yachaj chayachingapajca paicunaca ¿maipitagari?

13Zoán pueblota mandajcunaca upacunami tucushca.

Menfis pueblota mandajcunaca umarishcamari tucushca.

Egiptopajca paicunapaj ailluca callari rumicuna cashpapish egipciocunataca umashcamari.

14Mandaj Diosmari paicunapica muspachij espirituta churashca.

Chaimantami egiptocunaca paicunapaj rurashcacunallapitaj chingarishca.

Machashca runa shungu tigrashpa batsaj batsaj purij shinami puricuncuna.

15Uma tucushpapish, chupa tucushpapish, rama tucushpapish, junco tucushpapish Egiptopajca pi ima allita mana rurangachu.

16Chai punllapica egipciocunaca huarmicuna shinami cangacuna. Tucuita Mandaj Dios paicunata llaquichingapaj paipaj manchachij maquihuan jatarijpimi manchaihuan paipaj ñaupajpi chujchungacuna.

17Judá llajtaca Egiptopajca manchanami canga. Judá llajtapi causajcunata yuyarishpaca, tucuita Mandaj Dios paicunapaj llajtata imata rurasha nishcata yuyarishpami manchangacuna.

18Chai punllacunapica Egiptopica, pichca pueblocunapi causajcunami Canaán rimaita rimajcuna tiyanga. Paicunaca tucuita Mandaj Diospajtajmi canchij ningacunami. Chai pueblocunamanta shujca, Herez shutimi canga.

19Chai punllacunapica Egipto llajta chaupipica, Mandaj Diospajlla shuj altarmi tiyanga. Chashnallataj Israel llajtahuan, Egipto llajtahuan tupanacunpica Mandaj Diospaj shuj pircatami rurangacuna.

20Chaicunami tucuita Mandaj Diostaca, Egiptopi causajcuna paipaj tucushcata ricuchij canga. Paicunaca paicunata llaquichicujpica Mandaj Diostami mañangacuna. Mandaj Diosca quishpichishpa llujshichichunmi shuj quishpichijta cachanga.

21Chai punllacunapica Mandaj Diosca egiptocunapajca Diostaj cashcatami rijsichirirca. Egiptocunapish Mandaj Diosca Diostaj cashcatami rijsircacuna. Animalcunatapish paiman cushpa huañuchingacunami, ima shujtaj allicunatapish cungacunami. Mandaj Diospaj imata rurana tucushpaca chaitataj pajtachingacunami.

22Mandaj Diosca Egiptocunata chugrichingami. Chashna chugrichishpapish paillatajmi alliyachinga. Paicuna Mandaj Diosman cutirijpica, Mandaj Diospish llaquishpa alliyachingami.

23Chai punllacunapica, Egiptomanta Asiriacamami shuj jatun ñan tiyanga. Asiriocunaca Egiptoman yaicungallacunami. Egipciocunapish Asiriaman yaicungallacunami. Egipciocunapish, Asiriocunapish Mandaj Diospajtaca tandallami rurangacuna.

24Chai punllacunapica israelcunaca, egipciocunahuanpish, asiriocunahuanpish quimsami tucunga. Cai pachapi causajcuna israelcunamanta allicunata chasquichunmi chashna cangacuna.

25Chai punllapica Tucuita Mandaj Diosca: “Egipciocunaca alli nishca ñucapajmi nishca cachun. Asiriocunaca ñuca maquihuan rurashcami nishca cachun. Israelcunaca ñuca agllashcacunami nishca cachun” nishpami paicunataca alli nishcacuna cachun ninga.