JOSUÉ 13 - Quichua Chimborazo Bible

Josué manaraj japishca llajtacunami

1Josueca uni huatacunata causashpa ña yuyaj cajpimi, Mandaj Diosca paitaca cashna nirca: “Canca achca huatacunayuj ña yuyajmi cangui. Shina cajpipish, israelcunapaj cachun japinaca achca llajtacuna tiyanrajmi.

2Cai llajtacunatami israelcunaca, paicunapaj cachun japinaraj can: Filisteocuna, gesureocuna causan tucui llajtacunata,

3Egiptomanta inti llujshin ladoman caj Sihor jatun yacumanta janaj lado Ecrón puebloman tupanacuncamami japina tiyanraj. Chai llajtacunaca cananeocunapajrajmi. Chai llajtacunataca Gaza, Asdod, Ascalón, Gat, Ecrón llajtacunata pichca jatun mandaj filisteocunami mandacun. Ura ladoman caj Aveocunapaj llajtatapish japinarajmi.

4Cananeocuna causan tucui llajtatapish, sidoniocuna causan Mehara pueblomantaca, Afec pueblohuan tupanacuj llajtacunacamami israelcuna japinaraj tiyan.

5Giblitacunapaj llajtatapish, inti llujshin ladoman caj tucui Líbano llajtatapish, Baal-gat llajtamanta callarishpa Hermón urcu chaquita catishpa, Hamat puebloman yaicunacamami japina tiyanraj.

6Libanopi causajcunamanta callarishpaca, Misrefot-maimpi causajcunacamami sidoniocunatapish, urcucunapi causajcunatapish tucuicunata israelcunapaj ñaupajmanta anchuchisha. Canca ñuca ima shina mandashca shinallataj cada aillupaj sorteajpica, maipimi urman chaipi paicuna japina cashcataca cunguilla.

7Tucui cai allpacunataca iscun aillu israelcunaman, Manasespaj chaupi aillumanpish chaupishpa cungui” nircami.

Quimsa aillupaj allpacuna maillapi cashcami

8Rubenpaj, Gadpaj aillucunahuan, Manasespaj chaupi ailluhuanca ñami Jordán yacumanta inti llujshin ladoman caj llajtacunata Mandaj Diospajta ruraj Moisesllataj cujpi chasquircacuna.

9Paicunaca: Arnón yacu uripi caj Aroer pueblomantaca, pugru pamba chaupipi caj pueblotapish, Medeba tucui pambatapish Diboncamami chasquircacuna.

10Amorreocunata jatun mandaj Sehón mandacushca tucui pueblocunatapish amonitacunapaj llajtahuan tupanacuncamami chasquircacuna. Sehón shuti jatun mandajca, Hesbón pueblopimi mandashpa causarca.

11Galaad llajtatapish, gesureocuna, maacateocuna causan llajtacunatapish, tucui Hermón urcutapish, tucui Basán llajtatapish Salca pueblocamami paicunaman curca.

12Og shuti jatun mandaj mandacun Basán llajtatapishmi curca. Chai jatun mandajca Astarot pueblopi, Edrei pueblopimi causaj carca. Paica refaitacunamanta saquirishcami carca. Chaicunataca Moisesmi mishashpa ña llujshichishpa cachashca carca.

13Israelcunaca gesureocunata, maacateocunataca paicuna causacushca llajtamantaca mana llujshichishpa cacharcacunachu. Paicunaca cunan punllacamami israelcuna causacunllapitaj causacuncuna.

14Ashtahuanpish Levipaj huahua huahuacunamanca allpacunataca mana curcachu. Mandaj Dios mandashca shinallataj paicunaca israelcuna Mandaj Diosman cushpa rupachingapaj apamushcacunatami paicuna japina cashcataca japina carca.

15Moisesca Rubenpaj aillumanca mashnacunapura cajta ricushpa, causana pajtatami allpacunataca curca.

16Rubenpaj huahua huahuacunapaj allpacunaca caicunami: Arnón yacu uripi caj Aroermantaca pugru pamba chaupipi caj pueblocunandij, tucui Medeba pambacamami curca.

17Hesbón pueblotapish, chai muyundij pambacunapi caj cai tucui pueblocunandijmi curca: Dibón, Bamot-baal, Bet-baal-meón,

18Jahaza, Cademot, Mefaat,

19urcucunapi caj pugru pambacunapi tiyaj Quiriataim, Sibma, Zaret-sahar shuti pueblocunatapishmi paicunaman curca.

20Bet-peor, Bet-jesimot pueblocunatapish Pisga urcu quinricunandijmi curca.

21Chai llajtacunami amorreocunata mandashpa jatun mandaj Sehón mandana llajtacuna. Paica Hesbón pueblopi causashpami mandarca. Chai mandaj mandacun llajtacunatami Moisesca japirca. Chai jatun mandaj churashca Madianita cai jatun mandajcunatapish Evi, Requem, Zur, Hur, Reba shuti mandajcunatami misharca.

22Israelcunaca chaicunata huañuchicushpaca, Beor shuti runapaj churi Balaam shuti adivino runatapishmi huañuchircacuna.

23Jordán jatun yacu huichica, Rubenpaj aillupaj lindemi carca. Rubenpaj huahua huahuacunamanca mashna cashcapaj causana pajtatami allpacunataca curca. Chai allpacunataca pueblocunandij, pueblo muyundij llajtacunandijmi curca.

24Gadpaj aillumanpish Moisesca, mashna huasi ucupura tandanacushcata ricushpa, paicuna causana pajtatami allpacunataca chaupishpa curca.

25Paicunapaj allpacunaca Jazer pueblondij, Galaad llajtapi caj tucui pueblocunandij, amonitacunapaj chaupi llajtatapish Rabá pueblo ch'imbapurapi caj Aroercamami carca.

26Hesbonmantaca Ramat-mizpa pueblocama, Betonim pueblocamapishmi carca. Mahanaimmantaca, Debir llajtahuan tupanacuncamami carca.

27Pugru pambapi caj Bet-aram, Bet-nimra, Sucot, Zafón pueblocunapishmi carca. Chai pueblocunaca Hesbonpi causaj jatun mandaj Sehón mandacushca pueblocunami carca. Jordán yacumanta inti llujshin ladoman caj llajtacunaca Cineret cuchacamami carca.

28Chashnami Gadpaj aillumanca, paicuna japina cashcataca chai tucui pueblocuna muyundij llajtacunandij curca. Mashna familiacuna cashcata ricushpa, causana pajtatami curca.

29Moisesca, Manasespaj chaupi aillumanpishmi paicuna japina cashca allpataca ña curca. Paicunamanpish mashna familiacuna cashcata ricushpa, causana pajtatami curca.

30Paicunapaj llajtacunaca Mahanaimmantaca, Og shuti jatun mandaj mandacushca tucui Basán llajtapish, Basán llajtallapitaj caj Jair runapaj sujta chunga pueblocunandijmi paicunapaj carca.

31Basán llajtapi caj chaupi Galaad llajtandij, Astarot pueblondij, Edrei pueblondijmi jatun mandaj Og mandaj carca. Chai llajtacunataca Manasespaj churi Maquirpaj huahua huahuapuramanmi mashna familia cashcata ricushpa causana pajtata curca.

32Jordán yacu ch'imbapurapi tiyaj Moab jatun pambacunata Moisés israelcunapaj cachun chaupishpa cushca allpacunaca chai llajtacunami. Chai llajtacunaca Jericomanta inti llujshin ladomanmi.

33Mandaj Diosca, Levipaj aillupajca ñucami herencia cani nishca shinallatajmi, Moisesca paicunamanca allpacunataca mana curca.