EZEQUIEL 16 - Quichua Chimborazo Bible

Jerusalenpi causajcuna mana crishcamanta

1Mandaj Diosca ñucataca cashnami nirca:

2“Huañujlla aichayuj runalla, Jerusalenpi causajcunamanca paicuna yallitaj millananata rurashcata ricuchiyari.

3Cashna ningui: Mandaj Jatun Diosca Jerusalentaca cashnami nin: Can huacharishpa causanaca Canaán llajtami, cambaj yayaca amorreopurami carca. Cambaj mamaca heteocunapurami carca.

4Canta ricujpica, huacharipachamantami puputa mana p'itishca carcangui. Yacuhuanpish mana armachishcami carcangui, cachihuanpish mana sobashcami carcangui, mana maitushcapishmi carcangui.

5Chashna llaquinayaj cajta ricushpa llaquijca, pi mana tiyarcachu. Ashtahuanpish cantaca huacharishca punllamantami huañuchun nishpa maipipish shitashca carcangui.

6Ñucaca cambaj c'uchuta pasacushpami, yahuarlla, mapalla cashcata ricurcani. Chashna yahuarlla cashcata ricushpami, cantaca: ¡Causari, causanguimi! nircani.

7Cantaca urcupi tiyaj q'uihuata shinami mirachircani. Ña huiñashpa jatunyashpaca, sumaj huarmimi tucurcangui. Cambaj chuchucunapish, ajchapish huiñarcami. Shina cashpapish churana illaj, lluchullami carcangui.

8Cutinllataj cambaj c'uchuta pasashpami, ña casaranalla soltera tucushcata ricurcani. Chaimantaca can lluchullataj cajta ricushpami, ñuca churanahuan c'atachircani. Chashnami canhuanca ari ninacurcani. Chaimantamari ñucapajlla tucurcangui. Mandaj Jatun Diostajmi chashna nini.

9Cantaca yacuhuanmi armachircani, yahuarlla cajpipish maillachishpami, aceitehuan churarcani.

10Canmanca bordashca churanatapish, tejón nishca pargatetapish, linomanta, sedamanta rurashca churanacunatapishmi churachircani.

11Cantaca sumajcunahuanmi sumajyachircani, maquicunapica brazaletecunata, cungapica huallcacunatami apachircani.

12Singapica sumaj achij nicujcunatami apachircani, rinrincunapica zarcillocunatami apachircani, umapica sumaj coronatami churachircani.

13Canca chashnamari curihuan, cullquihuan sumajyachishca carcangui. Shinallataj alli linomanta, sedamanta rurashca sumaj bordashca churanacunatami churarircangui. Micunatapish, trigo cutata, sacha chuspi huachashca mishquita, aceitetapishmi micurcangui. Chashnami canca tucuimanta yalli sumajyachishca carcangui. Chashna cashpami, jatun mandajpish tucurcangui.

14Cantaca ñuca sumajyachijpimi, sumaj tucurcangui. Chashna alli cashcamantami, cambaj shutica shujtaj llajtacunapipish alli nishca carcangui. Mandaj Jatun Diostajmi chashna nini.

15Ashtahuanpish canca can sumaj cashcallapimi shunguta churarcangui. Chashna cashpami mashna caita purijcunahuan huainayarcangui, canca paicunapajllami causarcangui.

16Lomacunapi tiyaj altar c'uchucunapimi, cambaj churanacunahuan mantashpa chaipi huainayarcangui. Chai shinaca manataj tucurcachu, cutinpish manataj chashnaca tucungachu.

17Shinallataj curimanta, cullquimanta ima sumajcunata rurashcataca ñucami curcani. Chaicunahuanmi runaman rijchaj dioscunata rurashpa, paicunahuan huainayarcangui.

18Shinallataj cambaj churanacunatapish, tucui laya colortami paicunamanca churachircangui. Ñuca aceitetapish, ñuca inciensotapish paicunapaj ñaupajpimi churarcangui.

19Can micuchun ñuca carashca tucuimanta yalli alli cutatapish, aceitetapish, sacha chuspi huachashca mishquitapish, mishquiman ashnaj cachun rupachingapajmi paicunapaj ñaupajpi churarcangui. Chashnami rurarcangui. Mandaj Jatun Diostajmi chashna nini.

20Chashna rurashca jahuapish, ñucapajlla cachun can huachashca churicunatapish, ushushicunatapish paicunaman cushpami huañuchircangui. ¿Can huainayashca ima mana cashca yuyachijpichu,

21ima cunalla cashcata shina ñuca huahuacunatapish cungata p'itishpa huañuchishpa, chai rurashcalla dioscunaman cushpa ninapi tucuita rupachircangui imatagari?

22Tucui laya millaita rurana, huainayana yuyaicunallahuan yallitaj junda cashpami, llullu huahuaraj cashpa churana illaj lluchulla cashcatapish, yahuarpi singuricushcatapish mana yuyarircangui.

23Cai tucui millaita rurashca q'uipaca ¡aij, aij imachari tucungui! Mandaj Jatun Diostajmi cashna nini.

24Canca lomacunapipish, tucui plazacunapipish altarcunatami rurarcangui.

25Ñan callaricunapipish rurashcalla diospajmi lomacunapi altarcunata rurarcangui. Chaipimi can sumaj cashcataca mapayachircangui. Mashna chaita purijcunamanmi, cambaj aichata ricuchircangui. Chashnami ashtahuan ashtahuan huainayashpa catircangui.

26Shinallataj cambaj c'uchullapi causaj Egipto runacunahuanpishmi huainayarcangui. Paicunaca charishca aichapish yallitaj racumi carca. Ñuca p'iñaringacamami, ashtahuan ashtahuan huainayashpa catircangui.

27Chashna cashcamantami, cantaca ñuca maquihuan llaquichircani. Canmanca micunatapish ashallatami cusha. Canta p'iñaj filisteocunamanmi, paicuna munashca shina imatapish rurachun curcani. Paicunapish can millaita rurashcata ricushpaca, pingarircacunami.

28Shinallataj huainayanata mana shaicushpami, asiriocunahuanpish huainayarcangui. Paicunahuan huainayashpapish, mana amircanguichu.

29Shinallataj Canaán llajtapi causajcunahuanpish, caldeocunahuanpishmi ashtahuan huainayarcangui. Paicunahuan huainayashpapish, manataj shaicurcanguichu.

30¡Millai shungu cashpami, cai tucui mana allicunataca rurarcangui! Huainayashpalla causaj mana pingaj huarmi shinami rurarcangui. Mandaj Jatun Diostajmi chashna nini.

31Canca ñan callaricunapipish, plazacunapipishmi altarcunata rurashpa, huainayashpalla causarcangui. Chashna cashpapish, manamari huainayashpalla causaj huarmicuna shina imallatapish japingaraicu huainayarcanguichu.

32Ashtahuanpish cusayuj huarmi huainayaj shinamari cusapaj randica, shujtajcunataraj chasquingui.

33Huainayashpalla causaj huarmicunamanca, achca allicunatami cuncuna. Ashtahuanpish canca canrajmi cambaj c'uyashcacunamanca, allicunata convidarcangui. Chashna cuj cajpimari, cambajmanca tucui llajtacunamanta shamushpa huainayarcacuna.

34Canca huainayashpalla causaj shujtaj huarmicuna shinaca, mana carcanguichu. Canhuan huainayangapajca, cantaca pi mana mashcarcachu. Ashtahuanpish huainayashcamanta imata can chasquinapaj randica, paicunamanrajmi allicunata curcangui. Chashnami canca, pipish mana rurashcata rurarcangui.

35Chashna cashcamanta huainayashpalla causaj huarmi, ñuca Mandaj Dios ima nishcata uyai.

36Ñuca Mandaj Jatun Diostajmi cashna nini: Canca mana pinganachishpami, lluchulla tucushpa huainayarcangui. Canca lluchulla tucushpami cambaj c'uyashcacunahuanpish, can rurashca millanana dioscunahuanpish huainayashpa pandarircangui. Cambaj huahuacunapaj yahuartapish chai dioscunamanmi curcangui.

37Chashna rurashcamantaca, cambaj c'uyashcacunatapish, canhuan cushicujcunatapish, can p'iñashcacunatapish tandachishpami, cambaj ñaupajpi churasha. Chai tandanacushcacunapaj ñaupajpimi, cambaj churanata llujshichishpa lluchullata saquisha. Chashna rurajpimi, tucuicuna can lluchulla cashcata ricungacuna.

38Chashnami cantaca huainayaj huarmicunata, huañuchij huarmicunata imata ruranata mandashcapi nishca shina llaquichisha. Cantaca ñucapajlla causana cashcamantaca, jatunta p'iñarishpami huañuchisha.

39Cantaca paicunapaj maquipimi churasha. Rurashcalla dioscunata adorana huasicunatapish, altarcunatapish urmachingacunami. Cambaj churanacunatapish, tucui laya sumaj aparinacunatapishmi quichushpa apangacuna. Cantaca churana illaj lluchullatami saquingacuna.

40Canta llaquichij runacunataca, achcacunatami cachangacuna. Paicunami cantaca rumicunahuan shitashpa, espadacunahuanpish tujsishpa huañuchingacuna.

41Cambaj huasicunatapish ninahuanmi rupachingacuna. Achca huarmicuna ricucunpimi, cantaca llaquichingacuna. Chashna llaquichishpami, cantaca huainayashpalla causanamantapish cambaj c'uyashcacunaman allicunata cunatapish saquichisha.

42Ñucapajlla cachun munashcamantaca, jatunta p'iñarishpa llaquichishpatajmi canhuanca alli tucusha. Ña mana ashtahuan p'iñarishachu.

43Canca chairaj huambra cashpa ima shina causashcata mana yuyarishpami, cai tucui millaita rurashpa ñucataca p'iñachircangui. Riqui, chashna millaita rurashcamantami, ñucapish cantaca jatunta llaquichisha. Canca huainayana munailla puricushcataca, manamari yuyaringuichu” ninmi Mandaj Jatun Diosca.

Mama ima shina cajpica ushushipish chai shinallatajmi nishcamanta

44“Riqui, yuyarina shimicunahuan tucui rimajcunami cantaca: Mama ima shina cajpica, ushushipish chai shinallatajmi ningacuna.

45Canca cusatapish, huahuacunatapish shitashpa causaj huarmipaj ushushimari cangui. Canca cusacunatapish, huahuacunatapish shitashpa causaj huarmicunapaj ñañami cangui. Cancunapaj mamaca heteocunapurami, cancunapaj yayaca amorreocunapurami carca.

46Cambaj punta ñañaca, Samariami. Paica paipaj ushushicunandijmi, cambaj janaj ladoman causacun. Cambaj q'uipa ñañaca Sodomami, paica paipaj ushushicunandij cambaj ura ladomanmi causacun.

47Canca paicuna shinallatajmi millaita rurashpa causarcangui. Chashna rurashcapish, mana ima cajpi shinamari paicunatapish yalli millaita rurashpa causarcangui.

48Ñuca causaj Mandaj Jatun Diostajmi cashna nini: Cambaj ñaña Sodomapish, paipaj ushushicunapish, manamari can shinapish cambaj ushushicuna shinapish yallitaj millaitaca rurarcacunachu.

49Cambaj ñaña Sodomaca jatun tucushcami carca, micunatapish achcatami charirca, q'uillami carca. Chashna cashpami paipish, paipi causajcunapish, llaquihuan cajcunatapish, huajchacunatapish mana ayudarcacuna.

50Paicunaca ñuca ñaupajpica, yallitaj millaita rurashpami, jatun tucurcacuna. Chashna mana allita rurashcamantami tucuita chingachircani.

51Samariaca can rurashca cai tucui juchacunamantaca, chaupillatapish mana rurarcacunachu. Ashtahuanpish canca paicunatapish yalli millaitami rurarcangui. Cambaj juchacunahuan ch'imbapurajpica, cambaj ñañacunapaj juchacunaca mana ima cashca shinami ricurirca.

52Canca cambaj ñañacunatapish yalli juchata rurashcamantaca llaquichijpipish, chai llaquitaca apanami cangui. Cambaj juchacunahuan ch'imbapurajpica cambaj ñañacunapaj juchacunaca mana ima cashca shinami ricurin. Paicunaca manataj can shina yallitaj juchata rurarcacunachu. Canca chashna yallitaj juchata rurashcamantaca, pingachishpa muspachishcami cangui.

53Sodoma pueblomanta, paipaj muyundij pueblocunamantapish, Samaria pueblomanta, paipaj muyundij pueblocunamantapish, cambaj pueblomanta prezu apashcacunatapish ñucami tigrachimusha.

54Canca paicunata cushichij cashca cashpapish, cunanca millaita rurashcamantaca llaquita apanami cangui, pingarinami cangui.

55Sodoma pueblotapish, Samaria pueblotapish, chaipi causajcunatapish ñaupa ima shina cashca shinallatatajmi rurasha. Canpish, canpi causajcunapish ñaupa ima shina cashca shinallamantajmi tigranguichij.

56Can jatun tucushca cai punllacunaca cambaj ñaña Sodomataca, mana chanzata rurashpa asinachu canguichij.

57Chaipica cambaj juchataca manaraj ricuchircanichu. Ashtahuanpish cunanca Siria llajtapi causajcunapish, filisteocunapish tucui layami p'iñancuna. Chaimanta cunanca chai llaquitaca apanami cangui.

58Canca huainayana munailla, millaita rurana yuyailla causashcamantaca, llaquita apanallatajmi cangui” ninmi Mandaj Diosca.

59Mandaj Diosca cashnapishmi nin: “Ñucaca ari ninacushcataca, mana can shina p'aquishachu.

60Ashtahuanpish can solteraraj cajpi ari ninacushcataca yuyaricushallami. Canhuanca huiñaipajmi ari ninacurcanchij.

61Can ima shinalla causashcata yuyarishpaca, pingaringuimi. Mana canlla ari nishcamantachu cambaj ñaupa ñañacunatapish, q'uipa ñañacunatapish cambaj ushushicuna shina cachun canmanca cusha.

62Ashtahuanpish ñuca canman ari nishcata pajtachingapajmi, paicunataca canman cusha. Chashna rurajpimi ñucataca, Mandaj Diostaj cashcataca yachangui.

63Chaita yuyarishpaca, pingaringuimi. Can imalla rurashcacunata ñuca perdonajpica pingarishpami, cutinca mana imata rimangui” ninmi Mandaj Jatun Diosca.