1Tiro pueblota jatun mandaj Hiramca, paipaj randi parlanacujcunatami Davidpajman cacharca. Davidpaj huasita shayachichunpish cedro caspicunata, albañilcunata, carpinterocunatapishmi cacharca.
2Chaimi Davidca israelcunata jatun mandaj cachun Mandaj Dios churashca cashcata, pai agllashca tucui israelcunata pai mandacuntaca jatunyachishcatapish yacharca.
Jerusalenpi David cashpa charishca churicunami(2 S 5.13-16; 1 Cr 3.5-9)3Davidca, Jerusalenpipish paipaj quiquin huarmi cachunca shujtaj huarmicunata japircarajmi. Chai huarmicunapipish ashtahuan churicunata, ushushicunata charircarajmi.
4Jerusalenpi huacharishca Davidpaj churicunaca caicunami: Samúa, Sobab, Natán, Salomón,
5Ibhar, Elisúa, Elpelet,
6Noga, Nefeg, Jafía,
7Elisama, Eliada, Elifelet shuticunami carca.
Filisteocunata David mishashcami(2 S 5.17-25)8Tucui israelcunata jatun mandaj cachun Davidta aceitehuan churashcatami, filisteocunaca yachaj chayarca. Chaimi tucui filisteocuna Davidta mashcanaman huichiyarcacuna. David chaita yachashpaca paicunahuan macanacungapajmi rirca.
9Filisteocuna shamushpaca, Refaim pugru pambapimi rigarishpa tiyarircacuna.
10Chaimi Davidca Mandaj Diostaca:
–¿Filisteocunahuanca macanacugrishachu? ¿Paicunataca ñuca maquipi churanguichu?– nishpa tapujpi Mandaj Diosca Davidtaca:
–Huichiyailla, paicunataca ñucami cambaj maquipi churasha– nirca.
11Shina nijpi David huichiyashpaca, Baal-perazim pambapi macanacushpa paicunata mishashpami Davidca: “Taita Diosca jatun yacu jatun pircata t'unij shinami ñucata p'iñajcunataca ñuca ñaupajmanta anchuchin” nishpami, chai pambataca Baal-perazimta shutichirca.
12Filisteocunaca paicunapaj rurashcalla dioscunata chaipi shitashpami rircacuna. Davidca, chaicunataca rupachichircami.
13Filisteocunaca cutinllataj shamushpa, chai pugru pambapi rigarishpa tiyarijpimi,
14Davidca Taita Diosta cutinllataj tapujpi Taita Diosca:
–Ch'imbapura macanacungapajca ama huichiyaichu. Ashtahuanpish paicunapajman shamungapajca bálsamo yuracuna tiyan ch'imbanijpi muyundijta shayaringuichij.
15Bálsamo yuracuna puntacunata puricuj shina salajnijta uyashpaca, macanacunaman llujshinguichijlla. Taita Diosmi canta ñaupashpa rishpa filisteocunapaj soldadocunataca huañuchinga– nircami.
16Davidca Taita Dios mandashca shinallataj rurashpami, filisteocunapaj soldadocunataca Gabaonmanta callarishpa Gezercama huañuchirca.
17David tucui rurashcacunaca tucui llajtacunapimi huashan huashan yacharirca. Mandaj Diosca tucui shujtaj llajtacunamanmi Davidta manchana yuyaita curca.
Who We AreWhat We EelieveWhat We Do
2025 by iamachristian.org,Inc All rights reserved.
