EZEQUIEL 32 - Quichua Chimborazo Bible

Faraontaca manchanana jatun animalhuan ch'imbapurashcamanta

1Chunga ishqui huata chunga ishqui quillapaj punta punllapimi, Mandaj Diosca ñucataca cashna nirca:

2“Huañujlla aichayuj runalla, Egipto llajtata jatun mandaj faraonmanta cashna yupashpa yupashpa huacai: Canca shujtaj llajtacunapajca, malta león shinamari carcangui. Mama cucha yacucunapi causaj dragón shinamari carcangui. Jatun yacucunatapish chaquichircanguimi. Cambaj chaquicunahuan sarushpami, chai yacucunatapish mapayachircangui, yacu uricunatapishmi sarushpa purircangui.

3Mandaj Jatun Diosca cashnami nin: Ñuca linchita shitashpami cantapish, Egipto runacunatapish japisha. Ñuca linchihuanmi cantaca llujshichingacuna.

4Tucuicuna ricuchunmi allpaman llujshichishpa, chaipi shitasha. Cantaca huairata purij alasyuj animalcunamanpish, p'iña animalcunamanpishmi mana nijta carasha.

5Cambaj aichacunataca urcucunapimi churasha, cambaj huañushcacunataca pugru pambacunapimi jundachisha.

6Cambaj yahuartaca can causacun llajtallapitajmi jichasha. Cambaj yahuarca urcucunacamami regaringa, yacu rina huaicucunapipishmi jundanga.

7Canta chingachishpaca, jahua pachatapishmi tapasha. Jahua pachapi tiyaj luzerocunatapish amsayachishami, intitapish p'uyuhuanmi tapachisha, lunapish ña mana ashtahuan achijyachingachu.

8Canmantami jahua pachapi tiyaj achijyachijcunatapish amsayachisha. Can causashca llajtamanca jatun llaquicunatami cachasha. Mandaj Jatun Diostajmi chashna nini.

9Can mana rijsishca llajtacunaman cambajcunata prezu apashpaca, achca llajtacunatami llaquilla shunguhuan saquisha.

10Achij nicuj ñuca espadahuan chai punlla canta huañuchichijta ricushpami achca llajtacunapish, jatun mandajcunapish jatunta mancharishpa upayangacuna. Can llaqui tucushcamantaca manchashpami, cutin cutin chujchungacuna ninmi ningui” nircami.

11Chaimantami Mandaj Jatun Diosca cashna nin: “Babilonia llajtata jatun mandajpaj espadami cambajmanca shamunga.

12Chai c'ari c'aricunapaj espadacunahuanmi cambaj llajtapi causajcunataca huañuchichisha. Chaicunaca llajtacunamanta ashtahuan c'ari c'aricunami canga. Paicunami jatun tucushca Egipto llajtatapish, chaipi tucui causajcunatapish chingachingacuna.

13Yacucunapi causaj tucui laya animalcunatapish chingachishami. Chai yacucunataca runacunapaj chaquicunahuanpish, animalcunapaj sillucunahuanpish ña mana ashtahuan sarushpa mapayachingacunachu.

14Tucui mapacunata siquiyachishpami, chuyajlla yacucunata rurasha. Jatun yacucunaca, aceite shinami callpanga. Mandaj Jatun Diostajmi chashna nini.

15Shinallataj Egipto llajtata shitashcata saquijpi, chaipi imalla tiyajcunatapish quichushpa tucuita apajpi, chaipi causajcunatapish tucuita huañuchijpimi, ñucataca Mandaj Diostaj cashcataca yachangacuna.

16Cai shimicunaca yupashpa yupashpa huacana shimicunami. Shujtaj llajtacunapi causaj huarmicunami Egipto llajtamantapish, chaipi tucui causajcunamantapish yupashpa yupashpa huacangacuna” ninmi Mandaj Jatun Diosca.

17Chunga ishqui huata callari quillapaj chunga pichca punllapimi, Mandaj Diosca ñucataca cashna nirca:

18“Huañujlla aichayuj runalla, Egipto llajtapi causajcunamanta yupashpa yupashpa huacangui. Paitapish jatun tucushca llajtacunapi causaj huarmicunatapish, pambana jutcuman uriyajcunandij allpa ucuman cachangui.

19Canca yallitaj sumajmi cangui. Shina cashpapish, c'aricuna charishca aicha mirga carata mana p'itishcacunata, pambashcallapitajmi pambarina cangui.

20Egipto llajtaca espadapi huañujcuna shinallatajmi huañunga. Paitaca espadahuan huañuchichunmi curcani. Egipto llajtatapish, chaipi causajcunandij huañuchichun chai espadata apaichijlla.

21Egipto llajtata ayudajcunapish, c'aricuna charishca aicha mirga carata mana p'itishcacuna espadapi huañushcacunapishmi Seolmantaca c'ari c'ari tucushpa, Egipto llajtataca rimangacuna.

22Asiria llajtapish, chaillapitajmi pambashca siricun. Paita pambashca muyundijpica, paipaj soldadocunata pambashca jutcucunami tiyacun. Paicunapish espadallapitajmi huañurcacuna.

23Huañushcacuna tiyacun jatun jutcu ladocunapimi, chai soldadocunata pambashca jutcucunaca tiyacurca. Shinallataj paita pambashca muyundijpica paipaj soldadocunata pambashca jutcucunami tiyacun. Tucui paicunapish espadapimi huañurcacuna. Paicunaca cai pachapi causajcunata manchachijcunami carca.

24Elam llajtapish chaillapitajmi pambarirca. Paita pambashca muyundijpica, paipaj soldadocunata pambashca jutcucunami tiyacun. Paicunaca tucuicunami espadapi huañurcacuna. Paicuna charishca aicha mirga carata mana p'itichishca chai runacunaca, cai pachapi causajcunata jatunta llaquichishpa manchachishcamantami, huañushcacuna tiyacunmantaca ashtahuan ucuman pambarircacuna. Paicunapish pambashcacunapurallapitajmi pingai tucurcacuna.

25Paitapish, paipaj soldadocunatapish huañushcacunapaj chaupipimi camapi sirichircacuna. Paipaj muyundijpica paipaj soldadocunata pambashca jutcucunami tiyacun. Paicunaca charishca aicha mirga carata mana p'itichishcacunami, tucuicunami espadapi huañurcacuna. Paicunallataj caipi chaipi causajcunata manchachishcamantami, caishuj huañushcacuna shinallataj pingachishca carcacuna. Shujtaj huañushcacunapaj chaupipimi paipish tiyacun.

26Chaillapitajmi Mesec shuti, Tubal shuti llajtacunapish, chaipi causajcunapish pambarircacuna. Paita pambashca muyundijpica, paipaj soldadocunata pambashca jutcucunami tiyacun. Paicunaca charishca aicha mirga carata mana p'itichishcacunami. Tucuicunami espadapi huañurcacuna. Paicunallatajmi cai pachapi causajcunataca manchachircacuna.

27Paicuna charishca aicha mirga carata mana p'itishcacunahuanca mana pambarircacunachu. Paicunaca jatun macanacuipi macanacunacunandijmi, Seolmanca uriyarcacuna. Espadatapish saunachishpami cacharcacuna. Paicunaca cai pachapica c'ari c'aricunatapish manchachijcunami carca. Chashna millaita rurashcamantami, paicunapaj tullucunaca ismunga.

28Egipto llajtalla, canpish charishca aicha mirga carata mana p'itichishcacunallahuantajmi llaquichishca cangui. Espadapi huañujcuna shinallatajmi pambaringui.

29Chaillapitajmi Edom llajtapish, chai llajtata jatun mandajcunapish, paicuna churashca tucui mandajcunapish, espadapi huañujcuna shinallataj pambarircacuna. Paicunata jatun mandajcuna cajpipish, chaipimi pambarircacuna. Paicunaca charishca aicha mirga carata mana p'itichishcacunahuanmi pambarircacuna.

30Chaillapitajmi janaj llajtata mandajcunapish, Sidón pueblopi causajcunapish pambarircacuna. Paicunaca jatun mandajcuna cashpapish, tucuicunata mandajcuna cashpapish, caishuj huañushacunallahuajtajmi pambarircacuna. Charishca aicha mirga carata mana p'itichishcallatajmi espadapi huañujcunahuan pambarircacuna. Jutcupi pambashcacuna shinallatajmi pingachishca carcacuna.

31Cai tucui huañushcata ricushpami, faraonca mana paipaj soldadocunalla achca huañushcata ricushpa cushicunga. Faraonpish paipaj soldadocunapishmi espadapi huañurca. Mandaj Jatun Diostajmi chashna nini.

32Ñucami cai pachapi causajcunapajca, manchaita churarcani. Chaimantami faraonpish, chai llajtapi causajcunapish charishca aicha mirga carata mana p'itichishcacunallahuantaj espadapi huañujcunahuan pambaringacuna” ninmi Mandaj Jatun Diosca.