1Ñucapajlla cajcuna, ñuca
mandashcata uyaichij.
Ñuca rimashca shimicunataca,
cancunapaj rinrinta pascashpa uyaichij.
2Yuyachij shimicunahuanmi parlagrini.
Ñaupa huatacunamanta pacalla tiyashcacunatami rimagrini.
3Chaicunata uyashpami entendishcanchij.
Ñucanchij ñaupa yayacuna parlashcatami, chashna uyashcanchij entendishcanchij.
4Chaicunataca paicunapaj huahuacunamanca mana pacashpallami huillashun.
Mandaj Diosca alabana cashcatapish, q'uipa
huahua huahuacunamanca huillanami canchij.
Pai tucuita rurai tucuj cashcatapish, mancharinacunata rurashcatapish huillanami canchij.
5Taita Diosmi Jacobmanca,
ima shina causanata yachachirca.
Paimi israelmanca mandashcata curca.
Chaitaca huahua huahuacunaman ñucanchij ñaupa yayacuna huillachunmi mandarca.
6Q'uipa punllacuna huacharij huahua huahuacuna yachachunmi mandarca. Paicunapish ashtahuan q'uipa huahuacunaman huillachunmi chaitaca mandarca.
7Taita Diospi paicunapaj shunguta
churachunmi chashna mandarca.
Taita Dios imallata rurashcata ama cungarishpa, pai mandashcacunatapish
pajtachichunmi mandarca.
8Cancunaca cancunapaj ñaupa yayacuna shina Diosta c'ariyaj,
rumi shungucunaca ama canguichijchu. Paicuna shina shungutapish, yuyaitapish
Diosmanta anchuchijcunaca ama canguichijchu.
9Efraincunaca,
puntajlla caspicunata arcohuan shitanata
alli yachajcunami carca.
Ashtahuanpish macanacui punllaca
huashaman tigrajllacunami carca.
10Paicunaca Taita Dioshuan ari ninacushcata cungarijllacunami carca.
Pai mandashca shina mana purishun nijcunami carca.
11Ashtahuanpish pai imallata
rurashcatapish cungarircacunami.
Mancharinacunata ricuchishcatapish cungarircacunami.
12Taita Diosca Egiptopi caj Zoán
pambapimi mancharinacunata rurarca.
Paicunapaj ñaupa yayacunapaj ñaupajpimi chashna rurarca.
13Mama cuchatami ishquipi chaupirca.
Chaitami paicunataca ch'imbachirca.
Yacutaca patacunata shinami rurarca.
14Punllaca p'uyuhuan ñaupashpami pusharca.
Tutaca ninahuan achijyachishpami pusharca.
15Shitashca pambapipish peña urcutami chaupirca.
Chaimanta yacuta llujshichishpami
ubyachirca.
16Chai peña urcumantami huajiyacuj yacuta
llujshichirca.
Jatun yacumari pambacunata callparca.
17Chashna rurajpipish, paita
p'iñachishpami cutinllataj juchallircacuna.
Jahua pachapi caj Mandaj Diostami c'ariyarcacuna. Shitashca pambapimi
chashna c'ariyarcacuna.
18Diostaca paicuna munashcata
rurachun nishpami p'iñachircacuna. Paicuna munashca micunatami mañarcacuna.
19Taita Diostaca cashnami rimarcacuna:
“¿Diosca cai shitashca pambapica,
imata carai tucungachu imashi?
20Taita Diosca peña urcumanta yacuta llujshichishpa callpacuj jatun yacuta rurarcatajmari.
Paipajlla cajcunamanca tandatapish ¿carai tucungachu imashi?
¿Aichatapish maimanta cui tucungachu
imashi?” nishpami rimarcacuna.
21Chaita uyashpami,
Mandaj Diosca p'iñarirca.
Jacobhuanca nina sindirij shinami p'iñarirca.
Israelcunahuanca yallitajmi p'iñarirca.
22Paicuna mana crishcamantami paica p'iñarirca.
Pai quishpichij cashcapi shunguta mana churashcamantami chashna p'iñarirca.
23Shina cajpipish, p'uyutami jahuamanta cacharca.
Jahua pacha pungucunatami pascarca.
24Maná shuti granotami paicuna micuchunca tamyachirca.
Jahua pacha trigotami paicunamanca curca.
25Runacunaca angelcuna micunatami micurcacuna.
Paicuna mana nijta micuchunmi Taita Diosca micunata cacharca.
26Inti llujshin ladomantami huairata cacharca.
Pai tucuita rurai tucuj cashcahuanmi ura ladomantapish huairata apamurca.
27Paicunapaj jahuamanca ñutu allpata shinami aichataca tamyachirca.
Huairata purij pajarocunatami mama
cucha t'iyuta shina tamyachirca.
28Carpa huasicuna chaupipimi urmachirca.
Paicuna causacun
carpa huasicuna muyundijpimi urmachirca.
29Taita Dios paicuna munashcata pajtachijpica micurcacunami, sajsarcacunami.
30Aichata ña shimipi charicushpapish cashtushpa manaraj mishquichijpimi,
31Mandaj Dios yallitaj p'iñarishca paicunapaj jahuaman shamurca.
Paicunapuracunataca yallitaj c'ari c'aricunatami huañuchirca.
Israelcunapuracunataca ashtahuan alli runacunatami urmachirca.
32Chashna rurajpipish, cutin juchallircallacunami. Mancharinacunata Taita Dios rurashcataca yangapimi churarcacuna.
33Chaimantami paicunapaj
causaitaca p'uyulta shinalla chingachirca.
Paicunapaj causaitaca llaquihuanmi chingachirca.
34Chashna huañuchijpimi Taita Diostaca mashcarcacuna.
Chaimi paitaca mana samashpalla mashcarcacuna.
35Paicuna miticunaca Taita Dios cashcatami yuyarircacuna.
Paicunata quishpichijca jahua pachapi caj Taita Dios cashcatami yuyarircacuna.
36Shina cashpapish, sumajta rimaj tucushpa llullana yuyaillami carcacuna.
Llulla c'allucunami carcacuna.
37Paipica manataj shunguta churarcacunachu.
Paihuan ari ninacushcapipish mana sinchi catircacunachu.
38Ashtahuanpish paica llaquijmi carca.
Paicuna millaita rurashcatapish perdonashpami mana chingachirca.
Tauca cutin llaquichinalla p'iñarishpapish mana llaquichircachu.
P'iñarishpa llaquichinatapish paica jarcarircami.
39Paicunaca huañujlla runacuna cashcatami yuyarirca.
Samai shina chingarijlla cashcatami yuyarirca.
40Mashnatajshi cutinmi c'ariyarcacuna. Shitashca pambapimi c'ariyarcacuna. Imapish mana tiyan pambapimi paitaca p'iñachircacuna.
41Cutin, cutinmi Taita Diostaca caita chaita rurachun nircacuna. Chashnami israelcunapaj
Jucha illaj Diostaca p'iñachircacuna.
42Llaquinayajta causacujpi shuj punlla
paipaj maquihuan llujshichishcataca
mana yuyarircacunachu.
43Milagrocunata Egiptopi rurashcacunatapish mana yuyarircacunachu. Mancharinacunata Zoanpi rurashcacunatapish
mana yuyarircacunachu.
44Chaipica ama ubyai tucuchunmi callpacuj yacucunataca yahuarman tigrachirca.
45Israelcunata p'iñajcunapajmanca ima tiyajta micuchunmi p'iña chuspicunata cacharca.
Chingachij sapocunatapishmi cacharca.
46Egipciocunapaj p'ucushca granocunataca oruga
c'urucunamanmi curca.
Paicunapaj trabajashca chagracunatapish langostacunamanmi curca.
47Paicunapaj uva chagracunataca,
runduhuanmi tucuchirca.
Higo chagratapish casahuanmi tucuchirca.
48Paicunapaj animalcunataca, runduhuanmi tucuchirca. Paicunapaj animalcunataca rayohuanmi
chingachirca.
49Egipciocunapaj jahuamanca nina sindirij shina pai p'iñarishcatami cacharca.
Yallitaj p'iñarishca llaquitami cacharca.
Tucuchij huaranga huaranga
angelcunatami cacharca.
50Pai p'iñarishpaca yallitaj llaquichinami tucurca.
Paicunataca huañuimantaca manataj quishpichircachu. Ashtahuanpish huañuiman cushpatajmi alli carca.
51Egipciocunapaj punta churicunataca tucuicunatami huañuchirca.
Cam runapaj punta churicunataca paicunapaj carpa huasicunallapitajmi huañuchirca.
52Ashtahuanpish Taita Diosca, paipaj cajcunataca ovejacunata shinami llujshichimurca.
Canlla ovejata shinami shitashca pambata pushamurca.
53Alli cuidashpami ñaupamurca.
Ima manchai illajlla cachunmi chashna pushamurca.
Ashtahuanpish paicunata p'iñajcunataca
mama cuchami millpurca.
54Chai q'uipaca paipajlla caj cai llajta lindemanmi chayachimurca.
Paipaj alli maquihuan mishashca cai urcumanmi pushamurca.
55Llajtacunataca israelcunapaj ñaupajmantami llujshichishpa cacharca.
Allpacunataca paicunapaj cachunmi cordelhuan p'itishpa curca. Paicuna causacushca huasicunapica Israel aillucunatami causachun
churarca.
56Ashtahuanpish israelcunaca jahua pacha Taita Diostaca caita chaita rurai nishpami yallitaj p'iñachircacuna.
Ima shina causachun pai yachachishcatapish
mana huaquichircacunachu.
57Ashtahuanpish huashatami ricuchircacuna. Paicunapaj ñaupa
yayacuna shinallatajmi
c'ariyarcacuna.
Pandaman shitaj arco shinami huishturircacuna.
58Lomacunapi altarcunata
rurashpami p'iñachircacuna. Labrashpa rurashca dioscunahuanmi yallitaj p'iñachircacuna.
59Taita Diosca chaita uyashpami yallitaj p'iñarirca. Israelcunahuanca yallitajmi p'iñarirca.
60Chaimantami Silopi caj
carpa huasipi canataca saquirca.
Runacunapaj chaupipi pai causacushca carpa huasimantaca anchurcami.
61Pai tucuita rurai tucuj cashcata
ricuchijtaca prezu apachunmi curca.
Sumaj cashcata ricuchijtapish p'iñajcunapaj
maquipimi churarca.
62Paipaj cajcunataca espadahuan
huañuchichunmi curca.
Paipaj cajcunahuanca yallitajmi p'iñarirca.
63Paicunapaj q'uipa huiñaicunataca ninami tucuchirca. C'arihuan manaraj chayarishcacuna cazarajpi cantanapish mana tiyarcachu.
64Paicunapaj curacunapish espadapimi
huañurcacuna.
Paicunapaj viuda huarmicunapish mana huacai tucurcacunachu.
65Chaipimi Jatun Diosca, dormicuj rijcharij shina jatarirca.
C'ari c'ari runa vinohuan machashca shinami
caparirirca.
66Paicunata p'iñajcunataca huashamantami
chugrichirca.
Paicunataca paicunapaj tucui causaipajmi pingachirca.
67Josepaj huahua huahuacunataca Efrainpaj
aillucunatami mana agllashpa shitarca.
68Ashtahuanpish Judapaj aillutami
agllarca.
Pai c'uyashca Sión urcutami agllarca.
69Paipajlla huasitami shayachirca. Tucuita
yalli jatuntami shayachirca.
Cai pachata huiñaipaj sinchita
churashca shinallatajmi churarca.
70Paipajta ruraj Davidtami agllarca.
Canlla ovejacunapajmantami pushamurca.
71Cunanlla huacharishca bachujcunapaj ladomantami apamurca.
Pai agllashca Jacobpaj huahua huahuacunata
michichunmi apamurca.
Paipaj israelcunata michichunmi pushamurca.
72Davidca tucui shunguhuanmi israelcunataca tucuipi alli pusharca.
Paipaj sinchi maquihuanmi michirca.
Who We AreWhat We EelieveWhat We Do
2025 by iamachristian.org,Inc All rights reserved.
