SALMOS 50 - Quichua Chimborazo Bible

SALMO 50Cai pachapi causajcuna imalla rurashcata ricuchijca Taita DiosmiAsaf rurashca Salmomi.

1Taita Diosca dioscunapaj Diosmi.

Mandaj Diosmari rimashca.

Paimari cai pachapi causajcunataca inti llujshinmantapish, inti huashicunmantapish tandanacuchun cayashca.

2Tucuitaj alli sumaj Sionmantami Taita Diosca achijyachishca.

3Ñucanchij Taita Diosca shamungami.

Mana upajlla shamungachu.

Ñaupajpica tucuchicuj ninahuan, muyundijtaca yallitaj jatun huairandij tamyahuanmi canga.

4Jahuamantami jahua pachatapish, cai pachatapish pai agllashcacuna imalla rurashcata ricuchingapaj cashna cayanga:

5“Jucha illaj ñucapaj cajcuna tandanacuichij.

Ñucaman cushpa rupachishpa ñucahuan ari ninacujcuna tandanacuichij” ningami.

6¡Taita Dios juez cashcamanta paica cashcata rurashpami mandacun nishpami jahua pachaca huillanga! Selah

7Paica cashnami ninga: “Ñuca agllashcacuna uyaichij.

Cancunamanmi rimagrini.

Israelcuna, uyaichij.

Cancuna mana allita rurashcatami huillagrini.

Ñucaca Taita Diosmi cani, cancunapaj Diosmi cani.

8Cancuna ñucaman cushpa animalcunata rupachishcamantaca imata mana rimagrinichu.

Ñuca ñaupajpi punllanta animalcunata ñucaman cushpa tucui rupachishcamantapish imata mana rimagrinichu.

9Chashna cashpapish cambaj bizicunata cuchun mana mañanichu.

Cambaj corralmanta c'ari chivocunata cuchunpish mana mañanichu.

10Sachapi causaj tucui animalcunapish ñucapajmi.

Lomacunapi causaj huaranga huaranga animalcunapish ñucapajmi.

11Sachapi tiyaj alasyuj animalcunatapish tucuitami rijsini.

Tucui cai pacha animalcunapish ñucapajllatajmi.

12Ñucaca yaricaihuan cashpapish, mana canta ñucaman carai nimanchu.

Cai pachapish, tucui chaipi imalla tiyajcunapish ñucapajmari.

13¿Ñucataca huagracunapaj aichata micunmi yuyanguichu?

Mana cashpaca ¿c'ari chivocunapaj yahuarta ubyanmi yuyanguichu?

14Animalcunata huañuchishpa cuj shinaca Taita Diosta alabayari.

Jahua pachamanta cajman cuna tucushcacunataca pajtachiyari.

15Llaqui punllapi cashpaca, ñucata mañangui.

Ñucaca quishpichishami.

Canpish ñucataca alli” ninguimi.

16Ashtahuanpish mana allita rurajtaca Taita Diosca cashnami nin: “Ñuca mandashcacunahuan rimangapajca canca ¿imataj canguiyari?

Ñucahuan ari ninacushca shimicunahuan imata rimanatapish mana charinguichu.

17Ñuca cunajpipish canca p'iñaringuimi.

Ñuca cunashcacunataca cambaj huashamanmi shitangui.

18Shuhuata ricushpapish paihuanmi callparcangui.

Huainayajcunahuanmi shuj yuyailla tucushpa purircangui.

19Cambaj shimihuanca millaita rimanapimi satirishpa puringui.

Cambaj c'alluca umanapimi amañarishca.

20Tiyarinapi tiyarishpaca cambaj huauquipaj contrami rimarcangui.

Quiquin huauquitapish yangapimi churarcangui.

21Tucui chaicunata rurajpipish ñucaca upalla carcanillami.

Ñucataca can shinallataj cashcallatami yuyangui.

Can millaita rurashcataca canman ricuchishpatajmi sinchita rimagrini.

22Taita Diosta cungarishca cajcuna cunanca caita uyaichij, alli entendichij.

Cancunata mirga mirgata rurangacamaca ama shuyaichijchu.

Chaimantaca pi mana quishpichingachu.

23Animalcunata cunapaj randica cantashpa alabajmi ñucataca alli ninga”.

Pai purina ñanta allichijmanmi Taita Dios quishpichina cashcataca ricuchisha.