ÉXODO 21 - Quichua Chimborazo Bible

Randishca runa ima shina canami(Dt 15.12-18)

1Israelcunaman cai mandashcacunata huillai:

2Cancunapajta ruraj cachun hebreocunapurallatataj randijpica, sujta huatacunallata cancunapajta rurachun. Canchis huatapica imata mana cushpa llujshichunlla.

3Pailla yaicushca cashpaca, pailla llujshichun. Huarmindij yaicushca cashpaca, huarmindij llujshichun.

4Paipaj amollataj huarmita cushca cajpi, chai huarmica churicunata, mana cashpaca ushushicunata charijpica, chai huarmipish chai huahuacunapish chai amopajmi canga. Paica pailla llujshichun.

5Ashtahuanpish amopajta rurajca: Ñuca amotapish, ñuca huarmitapish, ñuca huahuacunatapish c'uyashcamanta mana llujshisha ninichu nijpica,

6paipaj amoca juezcunapaj ñaupajman pushashpa pungupi cashpa, postepi cashpa paipaj rinrinta churashpa alishñahuan jutcuchun. Chashnaca paipaj tucui causaipimi paipaj amopajta ruraj canga.

7Maijanpish paipaj ushushita shujtajpajta ruraj cachun c'atungachari. Paica c'aricuna shinaca mana llujshi tucungachu.

8Chai amo mana munashcamanta paipaj huarmi cachun mana japishpaca, pagashpa llujshichichun saquichun. Mana Israel caj llujshichichunca ama saquichun.

9Ashtahuanpish paipaj churipaj huarmi cachun cushpaca, quiquin ushushipaj imallata rurana cashca shinallataj rurachun.

10Chai amoca paipaj huarmi cachun shujtaj huarmita japishpapish, ñaupa huarmimanca micunatapish, churanatapish ima shina caracushca, churachicushca shinallataj cuchun. Chayarinatapish ñaupaman shinallataj chayarichun.

11Cai quimsa mandashcacunamanta maijantapish mana pajtachijpica, chai huarmica imata mana pagashpa llujshichunlla.

Huañuchijcunata mandashcami

12Maijanpish shujtajta macashpa huañuchijca, paipish huañungami.

13Maijanpish mana huañuchina yuyaihuan cajpish, Dios paipaj maquipi churajpi huañuchingachari. Pai maipi miticugrinataca ñucami ricuchisha.

14Maijanca shujtajta p'iñashpa huañuchina yuyaihuantaj cashpa huañuchijpica, ñuca altar c'uchupi miticujpipish paitapish huañuchichun ñuca altar c'uchumanta anchuchichun.

15Maijanpish paipaj yayata cashpa, paipaj mamata cashpa huañuchijca paipish huañungami.

16Maijanpish genteta shuhuashpa c'atushca cajpi, paipaj maquillapitaj charicushcata japishpapish paitaca huañuchichun.

17Maijanpish paipaj yayata cashpa, paipaj mamata cashpa llaqui tucushca canman nijca huañunami can.

18Maijancuna shujtajhuan p'iñanacushpa rumihuan cashpa mana cashpaca huajtashpa chugrichijpi mana huañushpa camapi siricushpa,

19taunallahuan canllaman ña puricujpica, chai macaj runataca mana huañuchinachu. Ashtahuanpish ungushpa jambirishcamanta chai punllacunapi imata mana rurashcamanta tucuita pagachun.

20Maijanpish paipajta ruraj c'arita cashpa, huarmita cashpa caspihuan macacujpi paipaj maquipi huañujpica paitaca llaquichishca cachun.

21Macashcamanta punlla q'uipa, mana cashpaca ishqui punlla q'uipa huañujpica paipaj randishca cashcamanta paitaca ama llaquichishca cachun.

22Maijancuna p'iñanacushpa macanacucushpa, shuj chichu huarmitaraj macangachari. Chai huarmi mana huañushpapish shullujpica, chai huarmipaj cusa mashnata juchachishcata juezcuna ricushpa mashnata cuchun nijpica chaitataj cuchun.

23Chai huarmi huañujpica, paitapish huañuchichun.

24Ñahuita llujshichijtaca paitapish ñahuita llujshichichun. Quiruta llujshichijtaca paitapish quiruta llujshichichun. Maquita p'aquijtaca paitapish maquita p'aquichun. Chaquita p'aquijtaca paitapish chaquita p'aquichun.

25Rupachijtaca paitapish rupachichun. Chugrichijtaca paitapish chugrichichun. Huajtajtaca paitapish huajtachun.

Animalcuna llaquichijpi animalyujhuan ima shina ruranami

26Maijanpish paipajta ruraj c'arita cashpa, huarmita cashpapish ñahuita surcujca chai ñahuimantaca llujshishpa richun saquichunlla.

27Maijanpish paipajta ruraj c'aripaj, paipajta ruraj huarmipaj quiruta llujshichishpaca, chai quirumantaca llujshishpa richun saquichunlla.

28C'arita cashpa, huarmita cashpa shuj huagra sagmajpi huañungachari. Chai huagrataca rumihuan shitashpa huañuchishpa, aichataca ama micuchun. Ashtahuanpish huagrayujca juchachina illajllami canga.

29Maijan runa paipaj huagra sagmajlla cashcata yachashpa ñuca huagraca sagmajllami nishpa huillashca cashpapish huagrata mana alli huatajpi chai huagraca c'arita cashpa, huarmita cashpa sagmashpa huañuchijpica chai huagratapish, huagrayujtapish rumicunahuan shitashpa huañuchichun.

30Huagrayuj runataca paipaj huagra huañuchishca runamantaca paita ama huañuchingapaj cullquita cuchun ningachari. Huagrayujca pai mashna valishcamanta mañajpica chaitataj cuchunlla.

31Maijanpaj churita cashpa, ushushita cashpa huagra tsagmashpa huañuchijpica, cai mandashcacunapi nishca shinallataj chai huagrayujtaca rurachuncuna.

32Shujtajpajta ruraj c'arita cashpa, huarmita cashpapish huagra sagmashpa huañuchijpica chai huagrataca rumicunahuan shitashpa huañuchichun. Huagrayujca shujtajpajta rurajmantaca quimsa chunga siclo cullquita pagachun.

33Maijanpish paipaj pugyuta pascashcata saquishpa mana cashpaca yacuta tandangapaj allashcata mana tapajpi burro cashpa huagra cashpa chaipi huashicujpica,

34chai yacu tandarinapaj allajca chai animalmantaca mashna valishcata pagachun. Huañushca animalhuanca pai saquirichun.

35Maijanpaj huagrapish shujtajpaj huagrata macashpa huañuchijpica, huañuchij huagrata c'atushpa, cullquitaca ishquindijtaj chaupinacuchun. Huañushca huagra aichatapish chashnallataj chaupinacuchun.

36Maijanpaj huagra macajlla cashcata shujtajcuna yachangachari. Ashtahuanpish huagrayuj mana alli huatajpi shujtajpaj huagrata huañuchijpica, huañushca huagrayujmanca huagrallatataj pagachun. Huañushca huagrataca pai japichun.