1Sabá llajtata jatun mandaj huarmica, Salomonca Mandaj Dios paiman yachaita cujpi yallitaj yachaisapa cashcata yachashpami, mana cutichi tucuipaj tapunacunata tapunaman shamurca.
2Chai huarmica paita cuidaj achca runacunandijmi Jerusalenman shamurca. Mishquijllata ashnacujtapish, achca curitapish, sumaj rumicunatapish camellocunapi apachishcami shamurca. Salomonpajman shamushpaca, paipaj shungupi tucui imallata yuyacushcatami tapurca.
3Jatun mandaj Salomonca tucui pai tapushcatami cutichirca. Shuj tapunallapish pai mana cutichi tucuipajca mana tiyarcachu.
4Sabá llajtata jatun mandaj huarmica Salomonpaj yachai ima shina cashcatapish, pai mandashpa tiyana huasita ima shinalla rurashcatapish,
5paipaj mezapi micunacunatapish, paipajta rurajcuna causana ucucunatapish, paipajta rurajcuna ima shina cashcatapish, paicuna churarishca ima shina cashcatapish, paipaj micunata pasachijcuna ima shina cashcatapish, Mandaj Diospaj huasipi Diosman cushpa ima shina tucui rupachij cashcatapish ricushpaca yallitajmi mancharirca.
6Chaimi jatun mandajtaca: “Can yallitaj yachaisapa cashcatapish, imalla rurashcacunatapish ñuca llajtapi cashparaj uyashca shinaca chashnatajmi cashca.
7Ñuca caiman manaraj shamushpaca, chashnataj canataca mana crircanichu. Cambaj yachaitapish, imalla rurashcacunatapish cunan ñuca ñahuihuantaj ricujpica, ñuca uyashca shinaca chaupillatapish mana huillashcacunachu.
8Canhuan caj runacunapish, cambajta ruraj cai runacunapish, yachaisapa shimicunata rimajta punllanta uyashpaca cushijllami cangacuna.
9Mandaj cambaj Taita Diosca, alli nishca cachun. Canca pai munashca cajpimi israelcunata mandaj cachun churarca. Mandaj Diosca israelcunata c'uyacujlla cashcamantami cashcata rurashpa paicunata mandachun cantaca churashca” nircami.
10Chai huarmica jatun mandajmanca 120 talento curita, mishquijllata ashnacujcunata, sumaj rumicunatapish achcatami curca. Sabá llajtata jatun mandaj huarmi cushca shina yallitaj achca mishquijllata ashnacujcunataca pi manaraj Salomonpajca apamurcachu.
11Ofir llajtamantapish Hirampaj jatun barcopimi, curita apamushcacuna carca. Ofir llajtallamantatajmi achca sándalo caspicunatapish sumaj rumicunatapish apamurcacuna.
12Jatun mandajca sándalo caspicunataca balaustrecunata rurashpami Mandaj Diospaj huasipipish, pai mandashpa tiyana huasipipish churarca. Chai caspitaca tocanata yachajcunapajpish arpacunata, salteriocunatami rurarca. Jerusalenmanca sándalo caspicunataca chai shina yallitaj achcataca cutinca mana apamuncunachu, cunancama mana ricunchijllapishchu.
13Jatun mandaj Salomonca Sabá llajtata jatun mandaj huarmimanca tucui imallata ña cushca cashpapish, chai huarmi ashtahuan mañajpica, pai imata nishcata tucui imata mañashcatami curca. Chai q'uipaca chai huarmica paipajta rurajcunandij paipaj llajtaman tigrarcallami.
Salomonca yachaisapapish, yallitaj charijpish cashcami(2 Cr 9.13-24)14Salomonca huatantami, 666 talentota pezaj curita chasquij carca.
15Chaica c'atushpa randishpa causajcunatapish, shujtaj llajtamanta apamushpa c'atujcunatapish, Arabia llajtata jatun mandajcunatapish, pai mandacun llajtapi churashca punta mandajcunatapish impuestota japishcata mana yupashcami chaica caj carca.
16Jatun mandaj Salomonca 200 jatun escudocunatami curimanta rurachirca. Cada escudopimi, 600 siclo curita churachirca.
17300 uchilla escudocunatapish curillamantatajmi rurachirca. Chai escudocunapica cada escudopi quimsa libra curitami churachirca. Jatun mandajca chai escudocunataca, Líbano nishca huasipimi churarca.
18Jatun mandajca jatun tiyarinatapish marfilmantami rurachirca. Chaitaca alli curihuanmi jahuata llihuichirca.
19Chai tiyarinaca sujta gradacunatami charirca. Chai tiyarinapi tiyarishpa huashaman arrimarina ladoca redondomi carca. Chai tiyarinapica shuj ladomanpish, caishuj ladomanpish rigracunatajllatami charirca. Chai rigratajllacunapica ishquindij ladoman shuj shuj leontajllacunata churashcami carca.
20Gradacunapipish, ishquindij lado uripi chunga ishqui leontajllacunata churashcami carca. Shujtaj llajtacunapaj mandana huasicunapica, chai shina jatun tiyarinaca mana tiyarcachu.
21Jatun mandaj Salomón ubyana vasocunapish, Líbano nishca huasipi tiyaj tucui platocunapish curimanta rurashcami carca. Cullquimanta rurashcacunaca ima mana tiyarcachu. Salomón mandacui punllacunapica cullquica yanga shinallami carca.
22Jatun mandajca Tarsisman purij barcocunatami Hirampaj barcocunahuan tandalla mama cuchapi charirca. Chai barcocunapimi Tarsismantaca cada quimsa huatapi shuj cutin curita, cullquita, marfilta, monocunata, pavo realcunatapish apashpa shamujcuna carca.
23Chashnami jatun mandaj Salomonca, tucui shujtaj llajtacunata jatun mandajcunata yalli charijpish, jatun yachajpish tucushpa catirca.
24Salomonpaj shungupi Taita Dios yachaita churashcahuanca ima shina rimaj cashcata uyangapajca, tucui llajtapi causajcunami Salomonpaj ñahuita ricunata munarcacuna.
25Salomonman cungapaj rijcunaca huatantami curimanta, cullquimanta rurashca charinacunata, churanacunata, macanacunacunata, mishquijllata ashnacujcunata, caballocunata, machucunata apajcuna carca.
Salomonca carrocunata caballocunata randijpish c'atujpish cashcami(2 Cr 1.14-17; 9.25-28)26Salomonca carrocunata, caballopi tiyarij gentecunatapish ashtahuanmi tandachirca. Paica, 1.400 carrocunata, caballopi tiyarijcunatapish 12.000 gentecunatami charirca. Chaicunamanta shujcunataca carrocunata maillapi huaquichishca pueblocunapimi churarca. Caishujcunataca Jerusalenpimi pai jatun mandajta cuidachun churarca.
27Jatun mandajca Jerusalenpica, yallitaj cullquiyujmi tucushpa catirca. Paipajca cullquica rumicuna shina yallitajmi tiyarca. Cedro caspicunatapish, Sefela pambapi tiyaj sacha higo yuracuna shina yallitaj achcatami charirca.
28Jatun mandaj Salomonpaj randishpa c'atushpa purijcunaca caballocunatapish, linsocunatapish randishpa purijcuna cashcamantami, Egiptomantapish caballocunata, linsocunata Salomonpajca apamurcacuna.
29Egipto llajtapica carroca, 600 cullquimi valij carca, caballoca 150 cullquimi valij carca. Chaicunataca Salomonpaj randishpa, c'atushpa purijcuna Egiptomanta apamujpimi heteocunata, Siriocunata jatun mandajcunaca paicunaman randijcuna carca.
Who We AreWhat We EelieveWhat We Do
2025 by iamachristian.org,Inc All rights reserved.