AMÓS 8 - Quichua Chimborazo Bible

Taza junda p'ucushca granota muscuipi shina ricuchishcamanta

1Mandaj Jatun Diosca cashnatami ricuchirca: Usya punllacunapi p'ucushca granocuna taza junda tiyacujtami ricuchirca.

2Chashna ricuchishpaca:

–Amós, ¿imatataj ricungui?– nijpica ñucaca:

–Usya punllacuna p'ucushca granocunatami, taza junda tiyacujta ricuni– nircanimi.

Chashna nijpica, Mandaj Diosca cashnami nirca:

–Ñuca agllashca israelcuna tucurinami ña chayamushca. Cunantajca mana uniyashachu.

3Chai jatun llaqui punllapica, Mandaj Jatun Diospaj huasipi cantajcunapish huacangacunami, achcacunami huañungacuna. Chai huañushca aichacunatapish, chulunllacunapimi shitangacuna– nircami.

Israelcunata Dios llaquichina ñalla chayamugrishcamanta

4Imata mana charij huajchacunata quichushpa llaquichijcunalla, caita alli uyahuaichij.

5Cancunaca cashnami ninguichij: “Trigota ña c'atushun ninchijca. Quillapish ña tucurijpichari, samana punllapish ña pasajpichari granocunata huaquichishca ucumanta pascashpa c'atungapaj. Medidacunatapish uchillayachishpa c'atungapaj, manapish cashcata balanzapi pizashpami achca cullquipi c'atushun.

6Imata mana charij huajchacunapish mana pagai tucushpaca, ñucanchijpajta ruraj tucuchuncuna. Shinallataj ima illajllacunaca ishqui pargatellamantapish ñucanchijpajta ruraj tucuchun. Ch'uzu trigocamamari c'atushun ninchij” nicunguichijmari.

7Jacobpaj huahua huahuacunata sumajyachij ñucatajmi cashna nini: “Paicunata llaquichinataca manataj cungarishachu” ninmi Mandaj Diosca.

8“Ñuca llaquichicui punllapica, allpaca ¿manachu chujchunga? Cai llajtapi causajcunapish ¿manachu huacangacuna? Egipto llajta jatun yacu huashicucuj shinami allpapish huashicunga” ninmi.

9Mandaj Jatun Diosca cashnapishmi nin: “Ñuca llaquichi punllapica, intipish chaupi punllapi ña mana achijyachingachu. Achij punllatami cai pachataca amsayachisha.

10Cancunapaj cushicuna fiesta punllaca huacanami tucunga. Chai punllapica, cancunata cushichishpa cantajcunapish yupashpa yupashpami huacangacuna. Cañamazutami churachisha, uma ajchatapish lluchutami rutuchichisha. Chaipica tucuicunami shujlla c'ari huahua huañushcamanta shina huacanguichij. Chai punllaca, mana jahualla mancharina jatun llaqui punllami canga” ninmi.

11Mandaj Jatun Diosca cashnapishmi nin: “Jatun yaricai punllacunatami cachagrini. Chai punllacunapica mana micuna illashcamantachu, yaricaihuan yacunaihuan cangacuna. Ashtahuanpish ñuca shimita uyanaihuanmi yaricaihuan, yacunaihuan huañucuj shina puringacuna.

12Ñuca shimita uyanaihuan huañucushpami, shuj mama cuchamantaca caishuj mama cuchacama, janaj ladomantaca inti huashicuncama mashcashpa puringacuna. Chashna mashcashpapish, manataj japingacunachu.

13Chai punllacunapica paicunapaj sumaj ushushicunapish, sumaj churicunapish yacunaihuan pambaman urmangami.

14Samaria pueblopi caj juchapaj shutipi imatapish nishpami: Dan runacunalla, cancunapaj Diosmanta nincuna. Shinallataj: Beerseba ñanmanta nincunapishmi. Paicuna urmashpaca, manataj jataringacunachu” ninmi.