1Coré runaca gentecunata tandachishpami Moisesta p'iñashpa jatarirca. Paica Rubenpaj huahua huahua Datán, Abiram, On runacunahuan tucushpami tandachirca. Coatca Leví aillumantami carca. Izharca Coatpaj churimi carca. Coreca Izharpaj churimi carca. Datán, Abiram runacunaca Eliabpaj churicunami carca. On runaca Peletpaj churimi carca.
2Paicunaca israelcunapuramanta 250 runacunahuan tucushpami Moisesta p'iñashpa jatarircacuna. Chai runacunaca israelcunata pushajcuna, cunajcunapuramanta cajcuna, tucuicuna alli nishcacunami carca.
3Tucui chaicuna tandanacushpa Moisestapish, Aarontapish p'iñashpa jatarishpami:
–¡Cancunaca yallitajmi tucunguichij, ña chailla saquichij! Tucui israelcunami jucha illajcuna. Mandaj Diosca paicunapaj chaupipimi. Chashna cajpica Mandaj Diospaj tandanacushcacunapaj jahuapica ¿ima nishpataj yallitaj jatun tucushpa mandacunguichijlla?– nircacuna.
4Chaita uyashpa Moisesca pambaman tupajta cumurishpami,
5Coré runatapish, Coré runahuan tucushpa jatarijcunatapish cashnami nirca:
–Mandaj Diosca maijanlla paipaj cashcata, maijanlla jucha illaj cashcataca cayami paipajman c'uchuyachishpa ricuchinga. Mandaj Dios agllashcacunallami paipajmanca c'uchuyangacuna.
6Chaimanta caita ruraichij: Coré runapish, Corehuan tucushpa jatarijcunapish, inciensota rupachinacunata cada quiquinpajta apamushpa,
7chaipi ninata japichishpa, Mandaj Diospaj ñaupajpi chai nina jahuapi inciensota caya churaichij. Chaipi Mandaj Dios maijantami agllan chaimi jucha illaj canga. Levipaj huahua huahuacuna, ña chailla cachun– nircami.
8Moisesca Coré runataca cashnami nirca:
–Levitacuna cunanca caita uyaichij.
9Israelcunapaj Dios tucui israelcunapuramanta cancunata ch'icanyachishpa paipaj c'uchupi churashpa mandashcaca ¿yangalla cashcatachu yuyanguichij? Mandaj Diospaj carpa huasipi paipajta ruraj cachunca paimi churarca. Tucui israelcunapaj randi Mandaj Diospajta ruraj cachun paimi chashna churarca.
10Levipaj aillutaca tucuicunata paipaj c'uchupi rurachun churashca jahuachu ¿cura canatapish munanguichij?
11Aaronca ¿pi cajpitaj juchachishpa rimanguichigari? Ashtahuanpish canpish, canhuan tucushpa jatarijcunapish Mandaj Diostamari p'iñashpa rimanguichij– nircami.
12Chai q'uipami Moisesca Eliabpaj Datán, Abiram shuti churicunata cayanaman cacharca. Ashtahuanpish paicunaca:
–Ñucanchijca chaimanca mana rishunchu.
13Lechepish, sacha chuspipaj mishquipish yacu shina llujshicuj llajtamanta ñucanchijta llujshichishpa, cai shitashca pambapi huañuchun pushamushpaca ¿ima mana cashcatachu yuyangui? Chai jahuachu jatun tucushpa ñucanchijta mandasha ningui.
14Canca lechepish, sacha chuspipaj mishquipish yacu llujshicuj shina tiyan llajtamanca manapish chayachishcanguichu. Allpacunatapish, uva chagracunatapish manapish cunguichu. ¿Israelcunataca ñahui illajcuna shina canta caticuchunllachu munangui? ¡Mana rishunchu!– nircacunami.
15Shina nijpimi Moisesca paicunahuan achcata p'iñarishpa Mandaj Diostaca:
–Ñucaca paicunapaj shuj burrollatapish mana quichushcanichu. Paicunapuramanta maijantapish mana llaquichishcanichu. Chaimanta paicuna cushcataca amataj chasquipaichu– nirca.
16Chai q'uipami, Moisesca Coré runataca cashna nirca:
–Canpish, canhuan tucushpa jatarij tucuicunapish Mandaj Diospaj ñaupajman caya shamunguichij. Aaronpish chaipimi canga.
17Tucui cancuna cada quiquinpajta inciensota rupachinacunata apashpa, chaipi inciensota churashpa Mandaj Diospajman c'uchuyanguichij. Tucuimantaca 250 inciensariocunami cana can. Canpish, Aaronpish cada quiquinpajta inciensota rupachinacunata apanguichij– nircami.
18Shina nijpica, tucuicunami inciensota rupachinacunata cada quiquinpajta apashpa chaicunapi ninata japichishpa chai jahuapica inciensota churashpa Moisesndij, Aarondijllataj tucushpa Mandaj Dioshuan tupanacuna carpa huasi pungupi shayarircacuna.
19Coré runaca Moisestapish, Aarontapish p'iñashpa rimachunmi, Mandaj Dioshuan tupanacuna carpa huasi pungupi tucui israelcunata tandachishca carca. Chaipimi Mandaj Diosca paipaj sumaj cashcahuan tucui israelcunaman ricurishpa,
20Moisestapish Aarontapish mandashpa cashna nirca:
21–¡Tandanacushca cai israelcunamanta anchuichij. Paicunataca ñahui quinllaillapimi tucuchigrini!– nirca.
22Chaimi paicunaca pambaman tupajta cumurishpa:
–Taita Dios, tucuicunaman causaita cuj Dios. ¿Manachu shuj runalla juchallishca canga? ¿Ima nishpataj tucui israelcunahuan p'iñaringuiyari?– nircacuna.
23Chaimi Mandaj Diosca Moisestaca cashna nirca:
24–Coré, Datán, Abiram shuti runacuna causana carpa huasicuna chaipi caj israelcunataca tucuicunata chaimanta anchuichij nigrichij– nirca.
25Chaimi Moisesca jatarishcahuan Datán, Abiram shuti runacuna maipi canman rirca. Israelcunata cunaj yuyajcunapish catishpami rircacuna.
26Chaipimi Moisesca israelcunataca:
–Diosta mana manchaj, cai runacunapaj carpa huasi muyundijpi cajcuna, tucuicuna anchuichij. Paicuna juchallishcamanta paicunahuan ama chingaringapaj paicuna imalla charishcacunapipish ama tuparinguichij– nirca.
27Chaimi Coré runapaj, Datán runapaj, Abiram runapaj carpa huasi muyundijpi causaj israelcunaca tucuicuna anchurcacuna. Datán, Abiram runacunallami paicunapaj carpa huasi punguman llujshishpa paicunapaj huarmicunandij, churicunandij, uchilla huahuacunandij saquirircacuna.
28Moisesca cashnami nirca:
–Tucui caicunata Mandaj Dios cachajta ricushpami, tucui cai ruranacunataca mana ñuca munaimanta ruracushcata yachanguichij.
29Tucui runacuna huañuj shinallataj cai runacunapish huañujpica, ñucataca manapish Mandaj Dios cachashcatami yachana canguichij.
30Ashtahuanpish Mandaj Dios pi manaraj ricushcata rurashpa, cai allpa pascarishpa chai runacunata tucui paicuna imalla charishcacunandij millpujpi, paicunaca seolman causaj huashicujpimi, chai runacunaca Mandaj Diosta yallitaj p'iñachishcata yachanguichij– nircami.
31Moisés chashna rimashpa tucuchincami chai runacuna maipi shayacun allpaca pascarirca.
32Chaipimi allpaca paipaj shimita pascashpa Coré runatapish, tucui paihuan cajcunatapish, paicuna imalla charishcacunandij, paicunapaj huasicunandij millpurca.
33Paicunaca causaj paicuna imalla charishcacunandij seolman huashicujpi allpa tapajpimi, tandanacushca israelcunapaj chaupimanta chingarircacuna.
34Chai runacuna caparirishpa huashicujta uyashpami, chai muyundijpi shayacuj tucui israelcunaca: “Ñucanchijtapish ñataj allpa millpunman” nishpa callparcacuna.
35Mandaj Diospaj ñaupajmanta lunyacuj nina llujshishpami, inciensota cuj 250 runacunatapish huañuchirca.
36Mandaj Dios Moisesta mandashpaca, cashnami nirca:
37“Aarón curapaj churi Eleazarta cashna ni. Rupashcacunapaj chaupimanta inciensota rupachinacunata apamuchun mandai. Mandaj Diosman ch'icanchishpa cushca cashcamanta inciensariopi caj ushpataca chaimanta chaininijllaman tsirapachun mandai.
38Paicunapaj causai chingarinapajllataj juchallijcunapaj inciensariocunaca, Mandaj Diospaj ñaupajpi chai inciensariocunapi inciensota churashpa rupachicushca cashcamanta ñucapajlla ch'icanchishcami. Chaicunataca tacashpa, ñañujllata rurashpa altar jahuata pegashpa churanapaj rurachun mandai. Chaicunata altar jahuapi pegachishcaca israelcunata yuyachishpa yachachinapajmi canga” nircami.
39Shina nijpica, Eleazar curami inciensota cushpa rupachicushpa huañushcacunapaj chaupimanta bronce inciensariocunata japishpa, altar muyundijta pegachingapaj ñañujllata rurarca.
40Chaica Mandaj Diosman inciensota cushpa altarpi rupachinamanca, Aaronpaj huahua huahuacunalla c'uchuyana cashcata israelcuna ricushpa yuyarinapajmi carca. Manapish Aaronpaj huahua huahua cajcuna altarman c'uchuyashpaca Coré runa, paihuan tucushpa jatarijcunandij ima shina tucushca shinallataj tucunata ricuchijmi carca. Eleazar curaca Mandaj Dios Moisesta ima shina mandashca shinallatajmi tucuita rurarca.
41Chai cayandij punllaca, tucui israelcunami Moiseshuanpish, Aaronhuanpish p'iñarishpa paicunataca:
–Cancunaca Mandaj Diospajlla cajcunatamari huañuchishcanguichij– nishpa rimarcacuna.
42Moisestapish, Aarontapish tucui israelcuna muyundijta shayarishpa rimacujpimi, paicunaca Mandaj Dioshuan tupanacuna carpa huasita ricushpaca p'uyu tapashcata, Mandaj Diosca paipaj sumaj cashcahuan chaipi cajta ricurcacuna.
43Chaimi Moisespish, Aaronpish Dioshuan tupanacuna carpa huasi ñaupajman rijpi,
44Mandaj Diosca, Moisestaca cashna nirca:
45–Cai israelcunapaj chaupimanta anchuichij paicunataca ñahui quinllaillapimi tucuita tucuchigrini– nijpimi, paicunaca pambaman tupajta cumurircacuna.
46Chaipimi Moisesca, Aarontaca cashna nirca:
–Mandaj Diospaj ñaupajmantaca pai yallitaj p'iñarishpa llaquichina ña llujshimushcamanta huañuica ñami callarishca. Chaimanta inciensota rupachinata japishpa altarpi lunyacuj ninata chaipi japichishpa chai jahuapica, inciensota churashpa israelcuna maipi canman utca rishpa paicunapaj juchacunamanta Mandaj Diosman cugri– nirca.
47Aaronca Moisés mandashca shinallatajmi, inciensota rupachinata japishpa israelcunapaj chaupiman callpashpa rirca. Huañuica israelcunapica ñami callarishca carca. Chaimi Aaronca inciensariopi inciensota churashpa, israelcunapaj juchamanta Diosman cushpa rupachirca.
48Chai q'uipaca huañushcacunapaj, manaraj huañushcacunapaj chaupipimi shayarirca. Chaimi huañuica pararirca.
49Chai huañuipi huañujcunaca, 14.700 gentecunami carca. Coré runahuan tucushpa jatarishpa Diosta c'ariyajpi huañuchishcacunata mana yupashcami chaica carca.
50Huañui ña pararishca q'uipami Aaronca Dioshuan tupanacuna carpa huasi punguman Moisespajman tigrarca.
Who We AreWhat We EelieveWhat We Do
2025 by iamachristian.org,Inc All rights reserved.
