HEBREOS 10 - Quichua Chimborazo Bible

1Mandashcaca, q'uipata shamuna allicunata ricuchij llandu shinallami. Mana chai shamuna cashca shinatajchu. Mandashcapi nishca shina huatanta chai shinallataj sacrificiocunata Diosman cungapaj c'uchuyajcunataca manataj ima juchachina illajllataca rurai tucunchu.

2Chai Mandashcapi nishcacuna juchamanta chuyayachi tucujpica, ña mana juchayuj cashcata yuyanmanchu. Shinallataj sacrificiocunatapish ña mana ashtahuan cunmanchu.

3Ashtahuanpish cai sacrificiocunaca, juchayujcuna cashcata huatanta yuyachingapajllami.

4Malta torocunapaj, c'ari chivocunapaj yahuarca juchacunata mana anchuchi tucunchu.

5Chaimantami Cristoca cai pachaman shamushpaca, Diostaca cashna nirca:

“Sacrificiota, ofrendataca mana munarcanguichu.

Chaipaj randica, ñucatami aichayujta rurarcangui.

6Canman cushca animalcunata tucui rupachishcapish juchacunata anchuchichun imallata cushcacunapish can munashca shinaca manataj carcachu.

7Chaimantami: Ñuca Dioslla, can quillcachishca libropi ñucamanta nishca shinallataj can munashcata rurangapajmi shamuni nirca” nishcami.

8Ñaupaman nishca shinaca: (Mandashcapi nishca shina cushca) “Sacrificiopish, ofrendapish, Diosman cushpa tucui rupachishcapish, juchacunata anchuchichun cushcacunapish can munashca shinaca manataj carcachu. Manataj cushichircapishchu” ninmi.

9Chai q'uipaca: “Ñuca Dioslla, ñucaca can munashcata rurangapajmi shamurcani” ninmi. Chashna nishpaca, ñaupaman imalla ruracushcata anchuchishpami shujtaj mushujta churarca.

10Jesucristoca Diospaj munaita rurashpa shuj cutinlla huiñaipaj paipaj aichata ofrendata shina Diosman cujpimi, ñucanchijca jucha illajta rurashcacuna canchij.

11Curacunaca tucuicunallatajmi punllanta Diospajta rurashpaca, chai shinallataj sacrificiocunata cutin cutin cuncuna. Chai cushcacunaca juchacunataca manataj anchuchi tucunchu.

12Ashtahuanpish Cristoca, juchacunamantaca shuj cutinllami sacrificarirca. Chai q'uipaca Diospaj alli ladopimi tiyarirca.

13Chaipica, paita p'iñajcunata paipaj chaqui ucupi churangacamami shuyacun.

14Chashnami shuj cutinlla Diosman cushcahuan, jucha illajta rurashpa allicunata rurajta rurarca.

15Shinallatajmi Jucha illaj Espiritupish ñucanchijmanca cashna nin:

16“Chai punllacuna q'uipaca, paicunaman cusha nishpa ari nishcaca cashnami canga:

Ñuca mandashcacunataca, paicunapaj shungucunapimi churasha.

Paicunapaj yuyaicunapimi quillcasha” ninmi Jatun Diosca.

17Cashnapishmi nin:

“Paicunapaj juchacunata, mandashcata p'aquishcacunatapish manataj ashtahuan yuyarishachu” ninmi.

18Juchacunata chashna perdonashcacunapica, juchamanta ashtahuan Diosman cunaca ña mana tiyanchu.

Taita Diospajlla cachun yuyachishpa rimashcami

19Chashna cashcamanta huauquicuna, Jesucristopaj yahuarmantami Diospajlla ashtahuan ch'icanchishca Ucumanca, pi mana jarcashca yaicui tucunchij.

20Jarcachishca linsota pascashpami, causaiman pushaj mushuj ñanta ñucanchijpaj rurarca. Chai linsota nishpaca, paipaj aichatami nisha nin.

21Diospaj huasipica, shuj jatun curatami charinchij.

22Ñucanchijtaca paimi mana alli yuyaicunamanta shungucunatapish chuyayachishpa, cuerpocunatapish chuya yacuhuan armachirca. Chaimanta Diospajmanca mana nij tucushcalla shunguhuan alli crijtaj c'uchuyashunchij.

23Ñucanchijman cusha nijca pajtachijtajmi. Chaimanta ñucanchij crishpa caticushcataca, ama caita chaita yuyashpa sinchi catishunchij.

24Shinallataj caishujmanta chaishujmanta ayudanacushpa, allicunata rurangapaj c'uyaihuan yuyachinacushunchij.

25Ñucanchij tandanacuiman rina cashcallamanta puricujcuna, ña mana rij shinaca ama rurashunchijchu. Chaipaj randica, Jesucristo shamuna punlla ñalla chayamucushcata yachashcamantacarin, ashtahuan yuyachinacushunchij.

Juchata rurashpa catijcunata rimashcami

26Mana llulla shimita yachashpa chasquishca jahua quiquin munaimanta juchallijpica, chai juchallijcunamanta pi shujtaj huañujca ña mana tiyanchu.

27Ashtahuanpish chaicunataca paita p'iñaj cashcamantaca Diosmi ima shina cashcata ricuchishpa rupacuj ninapi shitajpi chai ninaca millpunga. Chaica jatunta mancharishpa ricunami canga.

28Moisés Mandashcata maijan mana cazujtaca ishqui cashpa, quimsa cashpa ricushcata huillajpica, mana llaquishpami huañuchin.

29Maijanpish cunan Diospaj Churita sarujcunaca Dios cusha nishpa ari nishca yahuarhuanmi jucha illajta rurashcacuna carca. Chai yahuartapish paicunaca yanganchinmi. Mana c'uyaipajta c'uyaj Espiritutapish c'amincunami. Chashnacunaca ¿mashna jatun llaquita apana cashcatataj yuyangui?

30Jatun Diosca cashnami nin: “Ñucami paitapish llaquichisha, pai japina cashcatapish ñucami cusha” ninmi. Shinallataj cutinmi: “Jatun Diospaj cajcunataca paillatajmi imalla rurashcacunataca ricuchinga” ninmi.

31¡Causaj Diospaj maquipi urmanaca, mancharina jatun llaquimari!

32Ñaupa punllacunapi cancunapaj yuyaita Dios achijyachijpi, ima tucushcata yuyarichij. Chai punllacunapica, jatun llaquicunataca alli macanacucuj shinamari aparcanguichij.

33Maijancunaca c'amishcacuna tucuicunapaj ñaupajpi llaquichishcacunapishmi carcanguichij. Shinallataj maijancunaca, chashna llaquichishcacunahuan tucushpa llaquita apajcunami tucurcanguichij:

34Cancunaca prezu cajcunatapish, llaquijcunami carcanguichij. Cancunapaj imalla charishcacunata quichujpipish, jahua pachapi mana tucurij charinacunata charishcamantaca cushicurcanguichijmi.

35Chaimanta cancunaca, chai yuyailla canataca amataj chingachichijchu. Chaimi cancunapaj cashca jatun japinataca japinguichij.

36Diospaj munaita ruraj cangapajca, mana p'iñarijmi cana. Chashna cashpami Dios cusha nishcataca japinguichij.

37“Chai shamuna cajca ñallami shamunga, mana uniyangachu.

38Cashcata rurajca, crishcamantami causanga. Ashtahuanpish huashaman tigrarijca, mana ñuca munashcachu” ninmi.

39Ashtahuanpish ñucanchijca huashaman tigrarij, chingarijcunapuraca mana canchijchu. Chaipaj randica, crishcamantaca quishpichishcaman chayangacama catijcunami canchij.