GÉNESIS 43 - Quichua Chimborazo Bible

Josepaj huauquicuna Benjaminhuan Egiptoman rishcami

1Canaanpica ashtahuan yaricai tucushpa catijpimi,

2Egiptomanta randimushca trigopish ña tucurirca. Chaimi yaya Jacobca paipaj churicunataca:

–Cutinllataj rishpa, asha granocunata ñucanchijpaj randimugrichij– nirca.

3Chaimi Judaca:

–Chai mandajca ñucanchijtaca: Cancunapaj q'uipa huauquita cancunahuan mana pushamushpaca, ñuca ñahuipica amataj ricuringuichij nishpami sinchita p'iñarishpa rimarca.

4Cunanca ñucanchij huauqui Benjaminta ñucanchijhuan cachajllapimi, granocunata randinamanca uriyashun.

5Ashtahuanpish Benjaminta ñucanchijhuan mana cachajpica, mana uriyashunchu. Chai mandajca: Cancunapaj q'uipa huauquita mana pushamushpaca, ñuca ñahuipica amataj ricuringuichij nircami– nirca.

6Chaimi Israelca:

–Ñucanchijca q'uipa huauquita charinchijmi nishpa chai runaman huillashpaca ¿ima nishpataj ñucataca yallitaj llaquichinguichij?– nirca.

7Chaimi paicunaca:

–Chai mandajca ñucanchijmantapish, ñucanchij huasi ucupuracunamantapish alli alli tapushpaca: ¿Cancunapaj yayaca causacunrajchu? ¿Shujtaj huauquitapish charinguichijchu? nijpica, pai imalla tapushcallatamari cutichircanchij. Ashtahuanpish: Cancunapaj huauquitaca pushamunami canguichij ninataca ¿imatataj yachanchijman carcari?– nircacunami.

8Judaca, paipaj yaya Israeltaca:

–Ñucanchijpish, canpish, ñucanchij huahuacunapish yaricaihuan ama huañungapajca, Benjaminta ñucahuan cachailla micunata utca randimugringapaj.

9Pai ima llaqui tucujpica, ñuca jahuami canga. Paimantaca ñucata imatapish ninguilla. Benjaminta ñuca mana tigrachimushpa, cambaj ñaupajman mana chayachimujpica, ñucami tucui causaipi llaqui causangapaj juchachishca casha.

10Mana uniyashpa utca tigrashca cashpaca, ñami ishqui cutinpish randishpa tigramunchijman carca– nircami.

11Chaimi paipaj yaya Israelca:

–Shina cajpica, chashna ruraichijlla. Chai mandajman convidangapajca, cai llajtapi tiyaj tucuimanta yalli asha balsamota, sacha chuspi huachashca asha mishquita, mishquijllata ashnaj asha jambicunata, mirrata, nuecesta, almendratapish asha ashata cancunapaj costalcunapi churashpa apaichij.

12Granocunata randina cullquitaca ishqui cutin randina shinata apaichij. Sarun tigrachishpa cachashca cullquitapish cancunapaj costalcunapi churashpa apashpa paipaj maquipitaj cunguichij. Ñataj pandarishpalla tigrachishca canman.

13Cancunapaj huauqui Benjamintapish pushashpa, chai mandajpajman tigrashpa richij.

14Pailla Tucuita Rurai Tucuj Taita Diosca, chai mandajtaca cancunata llaquina yuyaita cushca alli canman. Chai mandaj cancunata llaquishpaca Simeontapish, cai Benjamintapish cacharingapishchari. Mana chashna rurajpi huahuacuna illajlla ñuca saquirina cajpica, chashna cangatajchari– nirca.

15Chaimi Jacobpaj churicunaca convidanacunata apashpa, granota randina cullquitapish ishqui cutin randina shinata apashpa, Benjamintapish pushashpa Egiptoman uriyashpa Josepi ricurigrircacuna.

16Benjamín paicunahuan chayajta ricushpami Joseca paipaj mayordomotaca:

–Cai runacunataca ñuca huasiman pushai. Cunan chaupi punllataca paicunaca ñucahuanmi micungacuna. Chaimanta shuj huagrata huañuchishpa micunata allichigri– nirca.

17Chai runaca José mandashca shinallatajmi, paicunataca Josepaj huasiman pusharca.

18Chaimi chai runacunaca Josepaj huasiman paicunata pushacujpica, achcata mancharishpa paicunaca:

–Punta cutin shamuipi cullquita ñucanchij costalcunapi tigrachishpa cachashcataca ñucanchijta apashcanguichij nij tucushpa ñucanchijtapish, ñucanchij burrocunatapish paipajta rurajcuna cachun saquichingapajllami caimanca pushamuj yuyachin– ninacurcacuna.

19Paicunaca Josepaj huasi punguman chayashpami, Josepaj mayordomohuan parlangapaj c'uchuyashpaca,

20cashna nircacuna:

–¡Aij, ñucanchij amitolla! Granocunata randinaman punta cutin shamuipimari cashna tucurcanchij. Chaitaca mana llullashpami huillagrinchij.

21Caimanta tigracushpaca, samaringapaj tiyarishpa ñucanchij costalcunata pascajpica, ñapish tucui ñucanchij costal shimicunapi cullqui tiyacushcallami carca. Mashnatami ñucanchij pagarcanchij, chaillatajmi cashca carca. Ñucanchijca chai cullquitaca tigrachingapaj apamurcanchijmi.

22Sarunca ñucanchij cullquitaca pichari ñucanchij costalcunapica tigrachishpa cacharca, mana yachanchijchu. Cunan granocunata randingapajca shujtaj cullquitami apamurcanchij– nircacunami.

23Shina nijpimi, mayordomoca:

–Chaimantaca ama llaquirichijchu ama manchaichijchu, ashtahuanpish sumaj causai cancunahuan cachun. Cancunapaj yayapajpish, cancunapajpish Taita Diosmi cancunapaj costalcunapica chai cullquitaca churashca canga. Cancuna pagashca cullquitaca ñucami chasquircani– nishpami, prezumanta Simeonta llujshichirca.

24Chai q'uipaca tucuicunata Josepaj huasiman pushashpa yacuta cujpimi, paicunapaj chaquicunata maillarcacuna. Paicunapaj burrocunamanpish cararcami.

25Paicunaca José paicunahuan chaupi punllapi chaipi micuna cashcatami uyarcacuna. Chaimi José shamunapajca, paiman convidanacunata allichishpa shuyacurcacuna.

26Huasiman José ña yaicujpica, paicunaca paicuna apamushca convidanacunata cunaman c'uchuyashpami, Josepaj ñaupajpica pambaman tupajta cumurircacuna.

27Chaimi Joseca paicunataca:

–¿Allillachu canguichij? Ñucaman huillashca cancunapaj yuyaj yayaca ¿allillachu, causacunrajchu?– nirca.

28Shina nijpimi paicunaca:

–Cambajta ruraj ñucanchij yayaca allillami, causacupanrajmi– nishpa, pambaman tupajta cutinllataj cumurircacuna.

29Joseca paicunata ricushpami mamamantapish, yayamantapish paipaj quiquin huauqui Benjaminta ricurca. Chaimi paica:

–¿Ñucaman parlacushca cancunapaj q'uipa huauquica caichu?– nishpa Benjamintaca:

–Ñuca huahualla cantaca Taita Dios llaquihuachun– nirca.

30Joseca paipaj huauquita ricushpaca, shungupi llaquirishpa huacanai atijpi pacalla huacanata mashcashpami, pai tiyana ucuman utca yaicushpa huacarca.

31Joseca huacanai tucurijpi ñahuita maillashpa llujshishpami, yanushpa carajcunataca: “Ña caraichijlla” nirca.

32Josemanca shujtaj mezapi, paipaj huauquicunamanpish shujtaj mezapi, Josepaj huasipi micuj egipciocunamanpish shujtaj mezapimi cararcacuna. Egipciocunapajca hebreocunahuan micunaca millanana cajpimi, mana chai mezallapitaj tandanacushpa micurcacuna.

33Joseca paipaj huauquicuna mezapi tiyarichunca, punta huauquimanta q'uipa huauquicamami callarishpa tiyarinata ricuchirca. Chaimi paicuna tiyarishpaca, mancharinacushpa caishuj chaishuj ñahuita ricunacucurcacuna.

34Joseca paipaj huauquicunamanca, pai micunallatatajmi carachirca. Benjaminmanca caishuj huauquicunaman carashcamanta, pichca cutinhuan yallitami carachirca. Josepish paipaj huauquicunapish tandalla micushpa ubyashpaca, achcatami cushicurcacuna.