1 SAMUEL 19 - Quichua Chimborazo Bible

Davidta ima shina huañuchinata Saúl yuyarishcami

1Saulca paipaj churi Jonatantapish, paipajta rurajcunatapish Davidta huañuchichij nishpami mandarca. Ashtahuanpish Saulpaj churi Jonatanca, Davidtaca yallitaj c'uyashpami,

2Davidmanca:

–Ñuca yaya Saulca, cantaca ima shinapish huañuchinatatajmi yuyacun. Caya tutamantacama yuyaihuan cuidarishpa pacallapi miticugri.

3Ñucaca ñuca yayahuan ishqui tucushpami, can maipi can c'uchullaman rishun. Chaipimi ñuca yayahuan canmanta parlasha. Pai imata nijpipish, canmanca cutinllataj huillashallami– nirca.

4Jonatanca paipaj yaya Saulhuanca Davidpaj allipajmi:

–Jatun mandajlla, cambajta ruraj Davidta llaquichishpaca ama juchallichu. Paica canta llaquichingapaj ima juchata mana rurashcachu. Ashtahuanpish cambaj allipajmari achca allicunata rurarca.

5Davidca quiquin causaitapish mana llaquishpami, filisteotaca huañuchirca. Chaimi Mandaj Diosca tucui israelcunata quishpichirca. Ima mana allitapish mana ruraj Davidta huañuchishpaca, manapish millaita rurajpaj yahuarta jichashpamari juchallingui– nircami.

6Jonatán chashna nishcata uyashpami Saulca:

–Causaj Mandaj Diospaj shutipimi nini. Davidca manataj huañungachu– nirca.

7Jonatanca, Davidta cayashpami, Saúl imallata nishcata tucuita huillarca. Paillataj Davidta Saulpajman pushajpimi, ñaupaman imata ruraj cashcallapitaj Davidca saquirirca.

8Chai q'uipa cutinllataj macanacui tiyajpimi, Davidca filisteocunahuan macanacungapaj llujshishpa, paicunataca achcacunata huañuchishpa mishajpi, paipaj ñaupajmanta callpashpa miticugrircacuna.

9Llaquichichun Mandaj Dios saquishca millai espíritu Saulta japijpimi, Davidca arpapi tocashpa Saulpaj ñaupajpi tiyacurca. Saulca paipaj lanzata aisashca tiyacushpami,

10Davidtaca pataman pasajta lanzahuan shitagrirca. Ashtahuanpish Davidca Saulpaj ñaupajmantaca anchushpami rirca. Lanzataca pata quinrillapimi shitarca. Davidca chai tutapish miticushpami quishpirirca.

11Chai q'uipami Saulca, huillashpa purijcunata Davidpaj huasiman rishpa tutaca cuidashpa pacarishpa cayandij tutamantaca Davidta huañuchichun cacharca. Chaimi paipaj huarmi Micalca:

–Cunan tuta cambaj causaita mana quishpichishpaca, caya tutamantaca huañushcami cangui– nishpa Davidman huillarca.

12Shina nishpaca Micalca, Davidtaca huasi ventanamanta huascapi huatashpa uri cacharijpimi, Davidca callpashpa miticushpa quishpirirca.

13Chai q'uipami Micalca, gentetajllata rurashcata japishpa Davidpaj cama jahuapi churashpa, umataca chivo millmata saunata rurashcahuan saunachishpa churanahuanca c'atachishpa churarca.

14Huillashpa purijcunata Davidta japinaman Saúl cachashcacuna chayajpica Micalca:

–Davidca ungushcamari– nircami.

15Saulca huillashpa purijcunataca:

–Davidta ricushpa camandij apamugrichij huañuchichun– nishpami, cutinllataj cacharca.

16Huillashpa purijcuna yaicushpaca, genteman rijchajta rurashcalla chivo millma saunahuan saunachishca siricujtami Davidpaj camapica japircacuna.

17Chaimi Saulca Micaltaca:

–¿Ima nishpataj ñucataca chashna umanguiyari? ¿Ima nishpataj ñucata p'iñajtapish miticushpa richun saquircanguiyari?– nijpimi Micalca Saulmanca:

–Paimari ñucataca: Richun saqui, mana saquijpica huañuchishami nirca– nircami.

18Davidca miticushpa rishpami quishpirirca. Chaimantaca Ramá pueblomanmi Samuelpajman rirca. Chaipimi Saúl paita imallata rurashcata tucuita parlarca. Chai q'uipaca Samuelpish, Davidpish Naiot pueblopimi causanaman rircacuna.

19Saulmanca: “Davidca Ramá pueblopi caj Naiot pueblopimi” nishpami huillarcacuna.

20Chaimi Saulca huillashpa purij runacunataca Davidta pushamuchun cacharca. Paicunaca Dios huillachijpi huillaj achcacuna huillacujtami ricurcacuna. Samuelpish chaipi cajta, paicunataca Samuel pushacujtami ricurca. Ashtahuanpish Saúl cachashca huillashpa purijcunapaj jahuamanpish Diospaj Espíritu shamujpimi, paicunapish Dios huillachishcata huillarcacuna.

21Chaita Saúl yachaj chayashpaca, paipaj huillashpa purij shujtajcunatapish cachajpica paicunapish caishujcuna shinallatajmi Dios huillachishcata huillarcacuna. Chaimantami Saulca huillashpa purij shujtaj runacunata caihuanca quimsa cutin cachajpi, paicunapish caishujcuna shinallataj Dios huillachishcata huillarcacuna.

22Chaimantami Saulca Ramá puebloman pai quiquintaj rishpaca, Secú pueblopi caj jatun pugyuman chayarca. Chaipimi: “Samuelpish, Davidpish ¿maipitaj?” nishpa tapujpi shujca: “Ramá pueblopi caj Naiot pueblopimi” nishpa huillarca.

23Ramá pueblopi caj Naiotman Saúl ricujpica, paipaj jahuamanpish Diospaj Espíritu shamujpimi, paipish Ramá pueblopi caj Naiotman chayangacama Dios huillachishcata huillaihuan chayagrirca.

24Chaipimi Saulca paipaj churanacunata llujshichirishpa, caishujcuna shinallataj Samuelpaj ñaupajpi Dios huillachishcata huillarca. Chaipica tucui punlla tucui tutami Samuelpaj ñaupajpi lluchulla carca. Chai punllamanta pachami: “Saulpish Dios huillachishcata huillajcunapuramari” nincuna.