JEREMÍAS 23 - Quichua Chimborazo Bible

Israelcunapaj huahuacunataca Judá llajtaman tigrachimushami nishcamanta

1Mandaj Diosca cashnami nin: “Ñuca oveja canllata caita chaita cachashpa chingachij michijcunalla, ¡aij imachari tucunga!” ninmi.

2Israelcunata Mandaj Diosca paipaj agllashcacunata michijcunataca cashnami nin: “Cancunamari ñuca ovejacunata cuidanapaj randica manchachishpa caita, chaita cachashcanguichij. Cancunataca chashna millaicuna cashcamanta llaquichigrinitajmi. Ñuca, Mandaj Diostajmi chashna nini.

3Tucui llajtacunaman ñuca shitashca ovejacunapaj huahuacunataca ñucallatajmi cutin tandachisha. Chashna tandachishpaca, ñucallatajmi paicuna shayanaman tigrachimusha. Caipimi achcata mirarishpa jundaringacuna.

4Paicunata ima ama manchachichun, shujllapish ama chingarichunca alli michijcunatami churasha. Ima manchai illajllami causangacuna” ninmi Mandaj Diosca.

5Mandaj Diosca cashnapishmi nin: “Shamuj punllacunapica, Davidpaj huahuapuramantami cashcata ruraj mandajta churasha. Paimi cai llajtata Jatun Mandaj canga. Paica cushicushpami cai llajtapica alli mandanga, tucuicunapajmi cashcata ruranga.

6Pai mandacui punllacunapica Judá llajtapajpish, israelcunapajpish ima llaqui mana tiyangachu. Cushicushpami causangacuna. Paitaca: Ñucanchijta mitsaj Mandaj Dios nishpami cayangacuna” ninmi.

7Mandaj Diosca cashnapishmi nin: “Shamuj punllacunapica imapajpish ña mana: Egipto llajtamanta israelcunata llujshichimuj, causaj Mandaj Diosca ricucunmi ninguichijchu.

8Ashtahuanpish ñuca tigrachimujpi, quiquin llajtapi causacushpami: Israelcunapaj huahuacunataca janaj llajtamantapish, pai maillaman shitashca tucui shujtaj llajtacunamantapish tigrachimuj, causaj Mandaj Diosca ricucunmi ninguichij” ninmi.

Llulla huillajcunata rimashcamanta

9Llulla huillajcunahuanca yallitaj p'iñarishpami, shungu p'aquirishpa llaquirini. Ñuca tullucunacama chujchucunipishmi. Jucha illaj Mandaj Diospaj shimicunata uyashpaca, paipaj ñaupajpica yuyai chingarijta vinohuan machashca shinami tucuni.

10Cai llajtaca huainayajcunahuan jundamari. Millaita ruranallatami yachancuna, mandanapipish shujtajcunata llaquichishpallami tiyacuncuna. Chaimanta Dios llaqui tucuchun nijpimi, allpapish shitashca pamba shina chaquishca, michina pambacunapish tucui chaquishcami.

11Mandaj Diosca cashnami nin: “Ñucamanta huillajpish, curapish ñucata mana manchajcunami. Paicunatacarin ñuca huasillapitaj millaita rurajtami ricuni. Paicunapajca jatun llaqui huatatami apamugrini.

12Chaipica paicunapajca, jatun lluchca ñanta amsa tutapi puricushca shinami canga. Chashna lluchcapi cajpitaj, t'angashpa shitajpi shinami llaquipi urmangacuna.

13Samaria llajtapi huillajcunapish, Baalpaj shutipi huillashpami, ñuca agllashca israelcunataca pandachircacuna. Chashna mana allita rurajtami ricurcani.

14Jerusalén pueblopi huillajcunatapish mancharina millaita rurajtami ricuni. Paicunaca huainayashpami purincuna, imatapish llullashpa umancunapishmi. Chashna rurashpami alliman ama pi cutirichunca, paicunallataj millai causaita ashtahuan yachachincuna. Tucui ñucamanta huillajcunapish, Jerusalenpi causajcunapish ñuca ñaupajpica Sodoma, Gomorra shuti pueblocunapi causajcuna shinami” ninmi.

15Chaimantami tucuita Mandaj Diosca chai huillajcunataca cashnapish nin: “Jerusalenpi huillajcunamantami tucui Judá llajtapi causajcuna mishqui shimi jayaj shungu tucuncuna. Chaimanta paicunamanca ajenjotami cashtuchigrini. Hielhuan chagrushca yacutapishmi ubyachigrini” ninmi.

16Tucuita Mandaj Diosca cashnapishmi nin: “Chaimanta chai huillajcuna huillashcataca ama uyaichijchu. Paicunaca mana ñuca shimimanta llujshishca shimicunata huillancunachu. Ashtahuanpish cancunapaj yuyai samarichun llullanllacunamari. Paicunapaj shungu yuyashcallatamari muscuipi ricushcata shina huillancuna.

17Ñucata p'iñachijcunatapish, paicunapaj shungu yuyashcata rurashpa causaj ch'ahuan runacunatapish, quiquin yuyaillamantamari paicunaca: Cancunapajca sumaj causaica mana tucuringachu, ima llaquipish mana shamungachu ninmi Mandaj Diosca nincuna” ninmi.

Ñallami Dios cachashca llaquita ricunguichij nishcamanta

18Chashna ningapajca paicunaca, ¿pitaj Mandaj Dios imata rurasha nicushcataca yachashcari? ¿Pitaj paita ricushca, pitaj paipaj shimitapish uyashcari? ¿Pitaj pai imata nishcata uyaracushcari?

19Mandaj Dios cachashca jatun llaquica, jatun acapana shinami shamunga. Pai allichishpa charicushca jatun llaquica, millaicunapaj jahuapimi urmanga.

20Mandaj Diosca jatunta p'iñarishca cashpami, chashna ruragrin. Chaita rurangacama paica manataj alli tucungachu. Pai imata ruranata yuyarishcataca pajtachingatajmi. Q'uipa punllacunaca pai tucui chaicunata rurajpimi, cancunaca pai imallata rurana cashcataca tucuita yachanguichij.

Mandaj Diosca llulla huillajcunataca mana ñuca cacharcanichu nishcamanta

21“Chai llulla huillajcunataca mana ñuca cachashcanichu, paicunamanca imata mana nishcanillapishchu. Llullashpallamari, ñuca shutipi huillanaman callpancuna.

22Ñuca imata rurasha nicushcata ñuca huillacujpi uyashca cashpaca, ñuca huillachun nishcatamari ñuca agllashcacunamanca huillanmancuna carca. Chashna huillashpaca, paicunataca millai causaita, millai ruranacunata saquichishpa, alliman tigrachinmanmi carca.

23Ñucataca c'uchullapi cashpalla ricuj Dios ¿cashcatachu yuyanguichij? Ñucaca carupi cashpapish, tucuita ricuj Diosmari cani” ninmi Mandaj Diosca.

24Mandaj Diosca cashnapishmi nin: “¿Pitaj ñuca mana ricunapi miticui tucungari? Ñucaca tucui jahua pachapipish, cai pachapipish jundamari cani. Mandaj Diostajmi chashna nini.

25Ñucaca chai huillajcunataca: Muscunimari, muscunimari nishpa, llullashpalla ñuca shutipi huillajtami uyani.

26Chai huillajcunaca ¿ima horascamachari paicunapaj shungu chashna panda yuyashcallata huillashpa, umashpa puringacuna?

27Ñuca runacuna ñucata cungarichunmi, paicuna muscushcataca caishujman chaishujman parlashpa purincuna. Paicunapaj ñaupa yayacuna ñucata cungarishpa, Baalta catishca shinallatatajmi rurashun nincuna.

28Maijan huillaj muscushpaca muscunillami nishpa parlachun. Ñuca shimicunatataj chasquishpa huillajpish, ñuca shimi cashcallata huillachun. Ujshaca trigohuanca, mana chai shinallatajchu” ninmi Mandaj Diosca.

29Mandaj Diosca cashnapishmi nin: “Ñuca huillachishca shimicunaca nina shinami. Yacu rumitapish p'aquij martillo shinapishmi.

30Chashna cashcamantaca shuj ashtahuan, shuj ashtahuan quichunacushpa, ñuca shimitataj huillacuj shina llulla huillajcunataca ñucatajmi llaquichigrini.

31Diosmi huillaj cachan nishpa, paicunapaj c'allumanta llujshichishpalla chashna huillajtacunataca ñucatajmi llaquichigrini” ninmi Mandaj Diosca.

32Mandaj Diosca cashnapish ninmi: “Llulla muscuicunallata huillashpa, parlashpa, ñuca agllashcacunata pandachij huillajcunataca ñucatajmi llaquichigrini. Llulla shimicunahuan inquitashpami pandachincuna. Paicuna huillachunca mana ñuca cachashcanichu. Paicunaca cai runacunataca, ima allipi mana churashcacunachu” ninmi Mandaj Diosca.

Mandaj Diosmantataj huillashpaca ima shina huillana cashcamanta

33“Cantaca caipi causajcunapuramanta maijanpish, mana cashpaca shuj huillaj, mana cashpaca shuj curapish: ¿Mandaj Diosca imatataj huillaj cachan? nishpa tapujpica, cashna ningui: Mandaj Diosca caitami huillaj cachan: Ñucaca cancunataca shitagrinimi ninmi ningui.

34Shinallataj maijan huillajpish, maijan curapish, mana cashpaca caipi causajcunapuramanta maijan cashpapish: Mandaj Diosmi cashna huillaj cachan nijtaca paitapish, paipaj familiacunatapishmi jatunta llaquichisha ninmi.

35Cancunapaj huauquita cashpa, cancunahuan apanacujpurata cashpapish: ¿Mandaj Diosca imatataj nishcari, imatataj cutichishcari? ninallami canguichij.

36Cunanmantaca: Mandaj Diosmi huillaj cachan ninataca, ña ama yuyanguichijllapishchu. Maijan cutintaj chashna nijpica, chai shimicunallatatajmi cancunapaj llaquiman tigrachisha ninmi. Cancunallatajmari tucuita Mandaj, ñucanchij causaj Diospaj shimitaca yangacunata rimangapaj japishcanguichij.

37Maijan huillajtapish: Mandaj Diosca ¿ima nintaj, imatataj cutichin? nishpa tapunguichij.

38Mandaj Diosca ¿imatataj huillaj cachan? nishpaca ama ninguichijchu. Mandaj Diostajmi cashna nin: Ñucaca cancunamanca: Mandaj Diosmi huillaj cachan ama ninguichij nishpa ñami huillachircani. Chashna huillachishca jahua, cutintaj: Mandaj Diosmi huillaj cachan nijpica:

39Cancunataca ñuca ñaupajmanta llujshichishpa cachashpa cungarishami. Cancunapaj ñaupa yayacunamanpish, cancunamanpish cushca cai pueblotapish tucui urmachishami.

40Chashna rurashpami, cancunataca huiñaita pingai tucushpa, llaquilla causachun saquisha. Manataj cungaripajta, jatuntami pingachisha ninmi ningui” nircami.