LEVÍTICO 15 - Quichua Chimborazo Bible

Quiya shina yacu cachariricuj c'aricunata mandashcami

1Mandaj Diosca Moisestapish, Aarontapish mandashpaca:

2“Israelcunamanca cashna huillaichij: Maijan c'ari cashpapish, quiya shina yacu cachariricuj cashpaca mapami canga.

3Chai quiya shina yacu cachariricujca cashna cashpami mapa canga: Paipaj charishca aichamanta quiya shina yacu cachariricuj cashpa, mana cashpaca quiya shina yacu cachariricushca ña pararishca cashpapish paica mapami canga.

4Quiya shina yacu cachariricuj runa siririshca camaca maipi cashpapish mapami canga. Chai runa tucui imapi tiyarishcapish mapami canga.

5Maijanpish chai runapaj camapi tuparijca paipaj churanata tajshachun, paillatajpish yacuhuan armachun. Tutayangacama mapami saquiringa.

6Maijanpish quiya shina yacu cachariricuj runa tiyarishcapi tiyarishca cashpaca paipaj churanacunata tajshachun, paillatajpish yacuhuan armachun. Paica tutayangacama mapami saquiringa.

7Maijanpish quiya shina yacu cachariricujpaj cuerpopi tuparishpaca, paipaj churanacunata tajshachun, paillatajpish yacuhuan armachun. Paica tutayangacama mapami saquiringa.

8Quiya shina yacu cachariricuj runa, shujtaj limpio runapi ch'ucajpica, chaica paipaj churanacunata tajshachun, paipish yacuhuan armachun. Chai q'uipaca tutayangacama mapami saquiringa.

9Quiya shina yacu cachariricuj runa montashca tucui monturacunaca mapami canga.

10Quiya shina yacu cachariricuj runa imapi tiyarishcacunapi maijanpish tuparijca, tutayangacama mapami saquiringa. Shinallataj chai runa tiyarishcacunata maijanpish apajca paipaj churanacunata tajshachun, paipish yacuhuan armachun. Chai q'uipaca tutayangacama mapami saquiringa.

11Quiya shina yacu cachariricuj runa paipaj maquita manaraj maillashpa maijanpi tuparijpica, paipaj churanacunata tajshachun, paillatajpish yacuhuan armachun. Paica tutayangacama mapami saquiringa.

12Quiya shina yacu cachariricuj runa, allpamanta rurashca imapi tuparijpica chaitaca p'aquichun. Caspimanta rurashca ima charinacunapi tuparijpica, chaicunataca yacuhuan maillachun.

13Quiya shina yacu cachariricuj runa alliyashpaca, chai alliyashca punllamanta canchis punllata yupashpa paipaj churanacunata tajshashpa, paipaj cuerpotapish callpacuj yacuhuan armashpa ima mapa illaj saquirichun.

14Pusaj punllapica, ishqui urpita cashpa, ishqui palomata cashpa japishpa, Mandaj Diospaj ñaupajman shamushpa Mandaj Dioshuan tupana carpa huasi pungupi curaman cuchun.

15Chaicunataca curami shujtaca juchamanta cuna cashcata, caishujtaca tucuita cushpa tucui rupachinata Mandaj Diosman cunga. Chashnami curaca quiya shina yacu cachariricuj runataca Mandaj Diospaj ñaupajpi ima mapa illajta ruranga.

16Maijan c'aripajpish yuraj yacu yangallamanta llujshijpica tucui paipaj cuerpota yacuhuan armachun. Paica tutayangacama mapami saquiringa.

17Maijanpaj yuraj yacu yangallamanta llujshicushca churanacunapi cashpa, carapi cashpa urmajpica chaicunataca yacupi tajshachun. Chaicunapish tutayangacama mapami saquiringa.

18Yuraj yacu llujshicuj c'ari, shuj huarmihuan chayarinacushpaca, ishquindijtaj yacuhuan armachun. Paicunaca tutayangacama mapami saquiringacuna.

19Quillapi uriyana yahuar maijan huarmipi uriyacujpica, chai huarmica canchis punllacamami pailla canga. Maijanpish chai huarmipi tuparijca, tutayangacama mapami saquiringa.

20Chai huarmi pailla ch'ican cai punllacunapi tucui imapi siririshcacunapish mapami canga. Chai huarmi tucui imallapi tiyarishcacunapish mapami canga.

21Yahuar uriyacuj huarmipaj camapi maijanpish tuparijca, paipaj churanata tajshachun, paipish yacuhuan armachun. Chai q'uipapish tutayangacama mapami saquiringa.

22Shinallataj chai huarmi ima tiyarinapi cashpapish tiyarishcapi maijanpish tuparijca paipaj churanata tajshachun, paillatajpish yacuhuan armachun. Paica tutayangacama mapami saquiringa.

23Yahuar uriyacuj huarmipaj cama jahuapi cashpa, pai tiyarishca tiyana jahuapi cashpa ima siricunpi maijanpish tuparijca tutayangacama mapami saquiringa.

24Yahuar uriyacuj huarmihuan maijanpish dormishpa chai yahuarpi tuparijca, canchis punllacamami mapa saquiringa. Paicuna dormishca camapish mapami canga.

25Shinallataj maijan huarmica quilla ungüi mashna punllata uriyana cashcallata mana uriyashpa achca punllacunata yahuar cachariricujllapica, tucui chai yahuar cachariricui punllacunami quilla ungüi shamucui punllacunapi shinallataj mapa saquiringa.

26Yahuar cachariricui punllacunapi dormishca camaca, quilla ungüi shamucui punllacuna dormishca cama shinallataj mapami canga. Pai tiyarishca tiyanapish quilla ungüi shamucui punllacunapi tiyarijpi shinallatajmi mapa canga.

27Chaicunapi maijanpish tuparijca mapami canga. Chaimanta paipaj churanatapish tajshachun, paipish yacuhuan armachun. Paica tutayangacama mapami saquiringa.

28Chai huarmipaj yahuar cachariricushca ña pararijpica, chai punllamanta canchis punllata yupachun. Chai q'uipami mapa illajlla saquiringa.

29Pusaj punllapica ishqui urpita cashpa, ishqui palomata cashpa, Mandaj Dioshuan tupana carpa huasi punguman apamushpa curaman cuchun.

30Chaicunataca curaca shujtaca juchamanta Diosman cuchun, caishujtaca tucuita cushpa tucui rupachichun. Cura chashna rurashpami yahuar cachariricushcamanta alliyashca huarmitaca Mandaj Diospaj ñaupajpi ima mapa illajllata ruranga.

31Israelpaj huahua huahuacunataca mapamanta chuyayachirashpa charinguichij. Paicunapaj chaupipi caj ñuca carpa huasita paicunapaj mapahuan mapayachishcamanta ama huañuchunmi chashna chuyata charina canguichij” nircami.

32Tucui cai mandashcacunaca quiya shina yacu cachariricujcuna, yuraj yacu yangallamanta llujshijpi mapa tucujcuna imallata ruranata mandashcami.

33Shinallataj quillanta yahuar shamucuj huarmicunapish, quiya shina yacu cacharirishpa unguj c'aricunapish, huarmicunapish, mapa huarmihuan dormij c'aricunapish ima shinalla rurachun mandashcami.