HEBREOS 7 - Quichua Chimborazo Bible

Melquisedecca Jesusman rijchaj curami cashca

1Cai Melquisedecca, Salem llajtata jatun mandaj, jahua pacha Diospaj curapishmi carca. Macanacuipi jatun mandajcunata mishashpa Abraham tigramucujpi tupagrishpaca, Dios allicunata cuchun nircami.

2Abrahamca macanacushpa tucui japishcacunamantaca chungamanta shujtami Melquisedecmanca cushca. Melquisedec nishpaca puntaca: “Cashcata ruraj Jatun Mandaj” nisha ninmi. Shinallataj: “Salem llajtata Jatun Mandaj” nishcapish, “Sumaj causaiyuj Jatun Mandaj” nisha ninmi.

3Melquisedecpajca yaya mamapish, paipaj ñaupa yayacunapish pi cashca mana yacharinchu. Pai huacharishcatapish, pai huañushcatapish pi mana huillanchu. Chashna cashcamantaca, Melquisedecca Diospaj Churiman rijchaj huiñaipaj curami.

4Melquisedec ima shina jatun cashcata ricuichij. Abrahamca callari yaya cashpapish, macanacuipi mishashpa apamushcacunataca, chungamanta shujtami paiman curca.

5Levipaj huahua huahuacunaca Mandashcapi nishca shinaca cura canatapish paicunallami chasquincuna. Chungamanta shujtapish tucuicunamantami japinata charincuna. Abrahampaj huahuacuna cajpipish tucuicunapajtami chungamanta shujta japincuna.

6Ashtahuanpish Melquisedecca, mana Levipuramantachu carca. Chashna cashpapish, Dios cusha nishcata japij Abrahampajtaca, chungamanta shujta japishpami Dios allicunata cuchun nirca.

7Chaimantami jatunca uchillaman Dios allicunata cuchun nishcataca, pitaj mana chashnachu ningari.

8Cunanca chungamanta shujta Diosman cushcata japij gentecunaca huañujllacunami. Ashtahuanpish huillajcunaca, Melquisedecca causacunrajmi nincunami.

9Chungamanta shujta japicuj levitacunaca Abrahampi cashpami, chungamanta shujta Melquisedecmanca curca ni tucunchijmi.

10Abrahamta Melquisedec tupanaman rijpica, levitacunaca Abrahampaj aichapimi carca.

11Israelcunamanca, (Leví curacunami Mandashcacunataca cushca). Chai curacunapaj rurashcacuna cashcata rurajta rurai tucushca cajpica, manamari Melquisedec cura cashca shina shujtaj cura shamuna canmanchu carca. Chai shamuj curaca, mana Aarón cura shinachu.

12Chaimantami shujtaj cura tiyarijpica, mandashcacunapish shujtajyarina carca.

13Paimantami quillcachishcapica, paica mana levitapuramantachu, paipuramantaca altarpica pi manataj servircachu nicun.

14Ñucanchijta Mandaj Jesusca, Judá aillumanta shamushcataca tucuicunami yachanchij. Moisespish Judá aillumanta cura tucunataca imata mana nircachu.

15Chaimantami curacunata ashtahuan yalli shujtaj cura, Melquisedec shinallataj ricurishcata yachanchij.

16Paica mandashcapi nishca shina cai aillumantami cura tucunga nishpa churashcaca, mana carcachu. Ashtahuanpish huiñaita causai tucuj cashcamantami cura tucurca.

17Diosca paimanta huillashpaca:

“Canca Melquisedec cashca shinallataj, huiñaipaj curami cangui” nishcami.

18Chaimantami ñaupa mandashcataca imata mana rurai tucuj, imapaj mana alli cajpi anchuchishca saquirin.

19(Mandashcaca, alli cajtatajca mana rurai tucurcachu). Ashtahuanpish tucuimanta yallita shuyacushcatami chasquircanchij. Chaimantami ñucanchijca Diospajman c'uchuyanchij.

20Diosca Jesustaca, ñuca shimihuantajmi cura cachun churani nishcami.

21Caishujcunataca Diosca ñuca shimihuantajmi cura cachun nishpa churani mana nishcachu. Ashtahuanpish Diosca Jesustaca:

“Ñuca shimihuantajmi curami cangui nini nishcami.

Dios Quillcachishcapica:

Canca Melquisedec cashca shinallataj huiñaipaj curami cangui” nishcami tiyacun.

Jatun Diosca paipaj shimihuantaj chashna nishcataca llaquirishpa manataj shujtajyachingachu.

22Chaimantami Jesustaca, tucuita yalli allita pai cusha nishpa ari nishcapi rurajta rurashca.

23Caishuj curacunaca huañushpa mana shuj curalla cati tucujpimi, achca curacuna tiyashca.

24Ashtahuanpish Jesusca huiñaita causaj cajpimi, pai cura canataca pi shujtajca mana japinga.

25Chaimantami maijanpish paimanta Diosman c'uchuyajtaca, huiñaipaj quishpichi tucun. Jesusca paicunamanta Diosta mañashpami huiñaita causacun.

26Chashna curacunata jatun pushaj curami ñucanchijpajca minishtirirca. Paica: Jucha illaj, millaita ruranata mana yachaj, mapa illaj, juchayujcunamanta ch'icanyashca, jahua pachacunamanta jahuaman jatunyachishpa churashcami.

27Jesusca curacunata jatun pushaj caishuj curacuna shinaca mana canchu. Chai curacunaca punllantami paicunapaj juchacunamantaraj Diosman cushpa rupachincuna. Chai q'uipami shujtajcunapaj juchacunamanta Diosman cushcacunataca rupachincuna. Ashtahuanpish Jesusca, paillatajmari shuj cutinlla tucuicunapaj juchacunamanta Diosman curishpa huañurca.

28Mandashcaca, huañujlla gentecunallatami curacunata jatun pushaj cachunca agllachun nin. Ashtahuanpish Mandashcapaj q'uipaca, Diosca huiñaipaj ima pandata mana ruraj paipaj Churitami paipaj shimihuantaj curacunata mandaj curami cangui nishpa churarca.