HEBREOS 12 - Quichua Chimborazo Bible

1Chashna cajpica, crijtaj cashcata ricuchijcunataca achca p'uyuta shinami achcacunata ñucanchij muyundijpica charinchij. Chaimanta ñucanchijpish llashacuj shinatapish, urmachisha nij juchatapish tucui saquishpa, chayana cashcamanca mana p'iñarishpa ñaupajman catishunchijlla.

2Crij canata callarichij, alli crijta ruraj Jesusta ricurashpa catishunchijlla. Paica huañushca q'uipaca, cushicuna cashcata yachashpami paita asicujpipish mana pingarishpa chacatashca huañurca. Chaimantaca Dios mandashpa tiyana alli ladopimi tiyarirca.

3Jesusca juchayujcuna paita p'iñashpa llaquichijpipish, cancuna ama shaicurichun, ama ña mana catisha nichun chashna llaquita apashcataca yuyarichigari.

4Cancunaca juchata mana rurangapaj macanacucushpapish huañuchishca cangacamaca llaquitaca manaraj apashcanguichijchu.

5Diosca paipaj huahuacunataj cashcamanta yuyachishpa rimashcataca ñamari cungarishcanguichij. Chaimantami Quillcashcapica cashna nin:

“Ñuca huahualla, alli tucuchun Jatun Dios llaquichijpipish ama mana uyasha ningui.

Pai sinchita rimajpipish, ama mana catisha ningui.

6Jatun Diosca, pai c'uyashcacunatami ima shinapish llaquichin.

Paipaj huahua cachuntaj, tucui chasquishcacunatami azotin” ninmi.

7Cancuna alli tucunapajllatajmi llaquichishcataca apacunguichij. Diosca paipaj huahuataj cajpimi llaquichin. ¿Maijan huahuataj paipaj yaya mana llaquichishca causan?

8Cancuna mana allita rurajpi Dios ima shinapish mana llaquichishpa saquijpica, mana paipaj huahuacunatajchu canguichij. Huainapaj huahuacunallami canguichij.

9Ñucanchij mana allita rurajpi ñucanchij yayacuna ima shinapish llaquichijpica, paicunataca allimi cazurcanchij. Shina cajpica, causaita cuj jahua pachapi caj Yayatacarin chaita yallitamari cazuna canchij. Chashna cashpami, causaita charishun.

10Ñucanchij yayacunaca ashacamallami paicunapi alli cana cashcata yuyashca shina ñucanchijtaca ima shinapish llaquichij carca. Dioscarin ñucanchij allipajllatajmi, pai shina ima jucha illaj cachun ima shinapish llaquichin.

11Llaquichishcacunaca mana cushicunapaj shinami, ashtahuanpish p'iñashpa llaquichicushca shinami yuyachin. Alli tucushpa cashcata ruraj ña tucushca q'uipami llaquichishcaca allipaj cashca ricurin.

Mana c'uyaipajta Dios c'uyashcata Diosca mana chasquijcuna ima tucuna cashami

12Chaimanta irquiyashca maquicunata, mana cuyuri tucuj cunguricunata jatarichichij.

13Shinallataj cojopish ñanmanta ama llujshichun, ashtahuanpish alliyachun cancunapaj huishtu ñancunata derechaichij.

14Tucuicunahuan sumajta causanata mashcaichij, jucha illaj canapi catichij. Mana chashna cajca, Mandaj Jesustaca pipish manataj ricungachu.

15Alli ricuraichij, ñataj maijancunaca Diospaj mana c'uyaipajta c'uyaj canata chingachinguichijman. Shinallataj jayaj q'uihua huiñaj shina cancunata muspachij yuyaicuna shamujpi, chaita rurashpa shujtajcunatapish pandachinguichijman.

16Ñataj cancunapurapica maijan huainayaj tiyanman, mana cashpaca, imapish Diospajlla cashcata Esaú shina yanganchijcuna tiyanman. Paica asha micunallapimi punta churi cana cashcataca c'aturca.

17Chai q'uipaca, allicunata japinata yayaman mañashpapish, ñaupaman mana nishcamantaca mana japircachu. Esauca huacashpa mañashpapish mana imata rurai tucushcataca yachanguichijmi.

18Israelcunaca nina rupacuj, amsa, yallitaj amsa p'uyu, huairandij tamya, tuparipajlla urcullamanpish mana chayarcacunachu. Cancunacarin mana tuparipaj urcumanmi chayashcanguichij.

19Paicunaca trompetapi tocashcata, Dios rimashcatapish mana uyai tucushpami: “Ama ashtahuan rimapaichu” nishpa rogarircacuna.

20Ima animal cashpapish, chai urcuman chayajpica, rumihuan cashpa, lanzahuan cashpa huañuchishcami canga nishpa mandashcata mana uyai tucushpami chashna rogarircacuna.

21Paicuna ricucushcaca, yallitaj mancharina cajpimi, Moisespish: “Manchaihuan chujchucunimari” nirca.

22Ashtahuanpish cancunaca Sión urcuman, causaj Diospaj jahua pacha Jerusalenman, huaranga huaranga angelcuna tandanacushpa Diosta alabacunmanmi c'uchuyarcanguichij.

23Diospaj punta churi Israelcuna tandanacushca crijcunapaj shuticuna jahua pacha libropi quillcashca tiyacunmanpishmi chayashcanguichij. Tucuicuna imalla rurashcata ricuchij Diospajman, cashcata rurajcunami nishpa alli nishca espiritucunapajmanpishmi chayashcanguichij.

24Mushuj ari nishcapi gentecunamanta Dioshuan rimaj Jesuspajman, pai jichashca yahuarmanpishmi c'uchuyashcanguichij. Chai yahuarca Abelpaj yahuarta yalli allimi.

25Riquichij, cancunata rimajtaca ama yanganchichijchu. Dios rimachishcata cai pachapi yanganchijcunaca llaquichishcatajmi carcacuna. Ñucanchijcarin jahua pachamanta rimajta yanganchishpaca llaquichishcatajmi cashun.

26Chai punllacunapi Dios rimashpaca, pambapish chujchujtami rimarca. Cunancarin Diosca: “Shuj cutinhuan rimashpaca, mana cai pachallatachu chujchuchisha, ashtahuanpish jahua pachandijmi chujchuchisha” nircami.

27Chashna: “Shuj cutinhuan chujchuchishami” nishcaca, Dios rurashca cuyuchipajcunata anchuchina cashcatami nisha nin. Chaipimi, mana cuyuchinapaj cashcacunalla saquiringa.

28Chashna cajpica Dios maipi Mandacun mana cuyuchipajta ñucanchij japishcamantaca, pagui nishunchij. Pai munashca shina manchaihuan tucui shunguhuan servishunchij.

29Ñucanchij Diosca rupachishpa tucuchij nina shinamari.