1Jonasca chalhuapaj huijsa ucupi cashpami Mandaj Diostaca,
2cashna nishpa mañarca:
“Ñucaca llaquihuan cashpami,
Mandaj Diostaca mañarcani.
Paica uyahuarcami.
Huañushca shina cashpa canta
caparijpica, uyahuarcanguimi.
3Ñucataca mama cucha chaupipimari shitahuarcangui.
T'imburicuj yacumari millpurca.
Cambaj yacucunaca caiman chaiman cuyurishpamari,
ñuca jahuata pasarca.
4Chaimantami: Cambaj ñaupajmanta shitashca
cashpapish, cambajlla sumaj huasitaca
ricusharajmi nircani.
5Yacuca tucuimi millpurca.
Jatun yacu ucupimari carcani.
Yacu millmacunami ñuca umapi pillurirca.
6Urcucuna chaquimanmi uriyarcani,
ña huiñaipaj allpa tapashca shinami carcani.
Chashna cajpipish ñucata Mandaj Taita Dioslla,
canmari ñucataca pambashca
ucumanta llujshichihuarcangui.
7Ña huañugricushpami, can Mandaj
Diosta yuyarircani.
Ñuca mañashcaca cambajlla huasiman
uyarishcatajmari.
8Rurashcalla dioscunata yanga mañajcunaca,
cambaj c'uyaitami cungarincuna.
9Ashtahuanpish cantaca ñuca shimihuan
cantashpami alabasha.
Animalcunatapish cushpa huañuchishami.
Canman imata cusha nishcatapish cushatajmi.
Mandaj Dioslla, canllami quishpichij cangui”
nishpami mañarca.
10Mandaj Diosllataj cutin mandajpimi, Jonasta millpuj chalhuaca chaquishca allpaman llujshishpa, Jonasta shungu tigrarca.
Who We AreWhat We EelieveWhat We Do
2025 by iamachristian.org,Inc All rights reserved.
