ISAÍAS 30 - Quichua Chimborazo Bible

Egiptopi shunguta churanaca yangallami

1Aij, Mandaj Diosmanta caruyajcunalla ninmi Mandaj Diosca.

Manapish ñuca yuyachishcata yuyarinacujcunalla.

Manapish ñuca yuyachishcahuan taparinata yuyajcunalla.

Chashnami

jahuanpi jahuanpi juchata mirachincuna.

2Egiptoman uriyangapajmi caruyancuna.

Ñucataca mana tapuncunachu.

Faraonpaj fuerzatami sinchi pircata rurashun nincuna.

Egipto mitsachunmi paipi shunguta churancuna.

3Faraonpi cancuna shunguta churashcaca pingaipimi churanga.

Egiptopaj llandumi pacanga yuyashcaca musparinapajllami canga.

4Cancunapaj mandajcuna Zoanpi ña cashpapish, cancunapaj huillajcuna

Hanesman ña chayashpapish,

5tucui paicunami imapajpish mana vali llajtapi shunguta churashcamantaca umashca pingaichishca cangacuna.

Chai llajtaca paicunataca mana ayudangachu, ima allitapish mana rurangachu.

Ashtahuanpish pingaipi churangapaj, mana alli nishcapi churangapajllami canga ninmi.

6Neguevpi tiyaj animalcunamanta Mandaj Dios huillashcami:

Jatun llaqui, manchanana maimantami c'ari león, huarmi león llujshin, víbora culebra, alasyuj culebra llujshin llajtatami cancuna imalla charishcacunataca burrocunaman apachishpa apanguichij.

Tucui sumaj charinacunatapish camellocunaman apachishpami apanguichij.

Ima allitapish cancunapaj mana ruraipaj cajcunapajmi chashna apanguichij ninmi.

7Egiptocuna ayudangami yuyashcaca yangallami canga.

Imapajpish mana valingachu.

Chaimantami ñucaca: “Paicunapaj c'ari c'ari cashcahuanca mana ayudasha nishparajchari alli canman carca” nircani.

8Muscuipi shina ñuca ricuchishcataca, cunantaj paicunapaj ñaupajpi shuj tablapi quillcagri.

Q'uipa punllacunapi huiñai huiñaipaj ricuna cachun shuj libropi quillcai.

9Cai gentecunaca c'ariyajcunami. Llullacunami.

Mandaj Dios mandashcata mana uyasha nishpami,

10Dios ricuchishcata huillajcunataca: “Muscuipi shinaca ama ashtahuan ricuichijchu” nincuna.

Dios huillachishcata huillajcunatapish: “Dios huillachishca shinatajca ama huillaichijchu.

Ashtahuanpish llullashpalla ñucanchij uyanajllacunallata huillaichij nishpami,

11Mandaj Diospaj ñantaca saquichij, chai ñanta

caticushcamantaca

anchurichij.

Israelcunapaj jucha illaj Diosmanta ñucanchij ñaupajpi rimanamantaca anchuichij” nincunami.

12Chaimantami israelcunapaj jucha illaj Diosca cashna nin: “Ñuca shimicunatamari yanganchishcanguichij.

Yallitaj millaita ruranapi, mapata ruranallapimi shunguta churashcanguichij. Chaicunamantami causanchij ninguichijmi.

13Chai juchami cancunapajca, yallitaj jatun pata machiyashca urmanalla shina cancunapaj llaquipaj shamucun.

Chaica cungaillapimi ñapish cancunapaj jahuapi urmangalla.

14Chai pataca allpamanta imata ruraj rurashca vasota ñutuj shinami ñutunga.

Mana llaquishpami ñutuchinga.

Allpa vaso ñuturijpica, tullpamanta nina brazusta surcungapaj shuj mirgallapish mana saquirinchu.

Mana cashpaca pugyumanta yacuta surcungapaj shuj mirgallapish mana saquirinchu” ninmi.

15Israelcunapaj jucha illaj Mandaj Jatun Diosca cashnami nin: “Ñucaman cutirishpa, ñucallahuan tucushpaca quishpichishcami canguichij.

Ñucapi shunguta churashpa, casijlla causajpica muyujta pirca shinami casha” nircanimi. Ashtahuanpish cancunaca mana uyashpa,

16cashnami nircanguichij: Caballocunapi tiyarishcahuan miticugrishunllami nircanguichijmi.

Cunanca miticugrichijlla. Utca callpaj caballocunapi tiyarishpa callpashunllami nircanguichijmi. Chashna tiyarishpa callpanguichijlla, cancunata llaquichingapaj catijcunapish ashtahuan alli callpaj caballocunapi tiyarishpami catingacuna.

17Llaquichisha nishpa shujlla caticujpica, huaranga cancunami manchashpa miticushpa callpanguichij.

Llaquichisha nishpa pichca caticujpicarin, tucui cancunami miticushpa callpanguichij. Lomapi shuj caspilla ricuricuj shina huaquincunalla saquiringacamami chashna callpanguichij.

Mana cashpaca, lomapi shuj banderalla ricuricuj shina huaquincunalla saquiringacamami chashna callpanguichij ninmi.

Israelcunata Dios llaquishpa cusha nishcami

18Shina cajpipish Mandaj Diosca cancunata llaquingapaj shuyacunmi. Paica cancunata chashna llaquishpaca c'uyaj cashcatami ricuchinga. Mandaj Diosca cashcata ruraj Diosmi. Paipi shunguta churajcunaca tucuicunami cushichishca canga.

19Siónpi caj Jerusalenpi causajcunataca Jatun Dios llaquishpa, cancuna caparishpa mañashcata uyaihuan cutichishcamantaca ña manataj huacangacunachu.

20Jatun Diosca cancunamanca tandapaj randi llaquita carashpapish, yacupaj randi huiquita ubyachishpapish yachachijcunataca cancunapajmantaca manataj anchuchingachu. Ashtahuanpish yachachijcunataca quiquin ñahuihuanmi ricunguichij.

21Cancunapaj rinrincunaca cancunapaj huashamantaca: “Caimari ñan, paillapi purichij. Alli ladomanpish, lluqui ladomanpish ama llujshinguichijchu” nishca shimicunatami uyanguichij.

22Chashna cashpami labrashpa rurashca dioscunata cullquihuan llihuishcacunatapish, labrashpa rurashca diostajllacunata curihuan llihuishcacunatapish mapa cashcata yuyanguichij. Millanana mapa llachapata shina anchuchishpaca: “¡Caimanta llujshi!” ninguichijmi.

23Chaipica Jatun Diosca, allpapi cancuna tarpushca chagramanpish tamyata cachajpimi, chai allpaca yallitaj granota p'ucunga. Chaica cancunaman fuerzata cujmi canga. Chai punllacunapica cancunapaj huagracunatapish, yallitaj achca q'uihuacunapimi michinga.

24Cancunapaj yapuj huagracunapish, burrocunapish palahuan aventashca jarnerohuan shushushca chuya granotami micunga.

25Yallitaj achcacunata huañuchicui punllapi torrecuna urmajpica, tucui jatun urcucuna jahuamanta yacucuna llujshishpami callpacunga. Jatun lomacuna jahuamanta jatun yacucuna llujshishpami callpacunga.

26Pai agllashcacuna chugririshcata Mandaj Dios maillashpa huatacui punllapi, carachahuan cajta jambicui punllapica, lunaca inti shinami achijyachinga. Inticarin canchis inti tandanacushpa achijyachishcata yallitami achijyachinga.

Asiria llajtata llaquichinami

27Riquichij, Mandaj Diospaj shutica carumantami shamucun. Paipaj ñahuica nina lunyacuj shinami shamucun.

Tucuchij nina lunyacuj shinami shamucun. Paipaj shimipica p'iñarishcahuan jundami.

C'alluca tucuchij nina lunyacuj shinami.

28Paipaj samaica, yacu jundashpa shamuj shinami shamucun. Cungacamami tapanga.

Paica llajtacunata shushunahuan shushushpa llaquichingapajmi shamucun.

Paicunamanca frenota amullichishpami, paicuna mana risha nishcaman apanga.

29Ashtahuanpish cancuna cantashcaca Pascua tutapi fiestata rurashpa cantashca shinami uyaringa.

Israelcuna miticuna Mandaj Diospaj urcuman flautacunapi tocashpa huichiyacujpi cushicuj shinami, cancunapaj shunguca cushicunga.

30Mandaj Diosca tucuita rurai tucuj caparishcahuanmi uyaringa.

Paipaj maquita uri chutashcatapishmi ricuchinga.

Yallitaj p'iñarishca ñahuihuan tucuchij lunyacuj nina shinami ricuringa.

Jatun acapana, huairandij tamya, rumi vali runduhuanmi ricuringa.

31Caspihuan chugrichij asiriocunaca, Mandaj Dios rimashcallahuanmi ñuturingacuna.

32Mandaj Dios ima shina cashcata ricuchij varahuan huajtacujpica, cada huajtashcapimi panderocunapi, arpacunapi tocashca uyaringa.

Mandaj Dios paicunahuan macanacucujpica yallitaj musparimi canga.

33Asiria llajtata jatun mandajta llaquichingapajca, Tofet nishca hornoca sarunmantamari allichishca tiyacun.

Chai hornoca yallitaj ucujta, anchomanpish anchomi, achca yantata churashcami yallitaj lunyacun.

Mandaj Dios p'ucushpami yacuyashca yallitaj achca azufrehuan chai hornotaca japichinga.