JEREMÍAS 29 - Quichua Chimborazo Bible

Babiloniapi causacujcunaman Jeremías shuj quillcata cachashcamanta

1-2Babilonia llajtata jatun mandaj Nabucodonosorca, Jerusalenmantaca Judá llajtata jatun mandaj Jeconiastapish, paipaj mama jatun mandaj huarmitapish, mandana huasipi caj shujtajcunatapish, Judá llajtata mandajcunatapish, Jerusalén pueblota mandajcunatapish, ima charinacunata rurajcunatapishmi prezu aparca. Shinallataj cunaj yuyajcunatapish, curacunatapish, Dios ima nishcata huillajcunapish tucui shujtajcunatapishmi Jerusalenmanta Babiloniaman prezu aparca. Manaraj huañushca cunaj yuyajcunamanpish, chai tucui caishujcunamanpishmi Jeremiasca, Jerusalenmanta Babiloniaman shuj quillcata cacharca.

3Chai quillcataca, Safanpaj churi Elasahuan, Hilciaspaj churi Gemariashuanmi cacharca. Paicunataca Judá llajtata jatun mandaj Sedequiasmi, Babilonia llajtata jatun mandaj Nabucodonosorpajman cacharca. Chaiman ricujpi Jeremías mingashca chai quillcapica cashnami nicurca:

4Tucuita Mandaj, israelcunapaj Diosca cashnami nin: Jerusalenmanta Babilonia llajtaman ñuca prezu cachashcacunataca, tucuicunatami cashna nini:

5Huasicunata shayachishpa chaipi causai callarichijlla. Granocunata p'ucuj yuracunata tarpushpa, chai p'ucushca granocunata micuichijlla.

6Shinallataj casarashpa churicunata, ushushicunata charichijlla. Paicunapish huahuacunayuj tucuchun casarachichijlla. Tucurinapaj randica, chai llajtapi ashtahuan mirarichijlla.

7Cancunata ñuca prezu cachashca pueblopaj allita ruraichijlla. Shinallataj chai pueblomanta ñucata mañaichij. Chai pueblopaj ima llaqui mana shamujpimi, cancunapish alli causanguichij ninmi.

8Tucuita Mandaj, israelcunapaj Diostajmi cashna nin: Cancunapaj chaupipi caj huillajcunapish, adivinajcunapish cancunata umachun ama saquichijchu. Cancunallataj muscushcapipish ama yuyaita churaichijchu.

9Paicunataca mana ñucachu huillanaman mandashcani. Llullashpallamari ñuca shutipi huillancuna ninmi Mandaj Diosca.

10Mandaj Diosca cashnapishmi nin: Babilonia llajtapi cancuna prezu causacushca ña canchis chunga huata pajtajpimi, cancunapaj allita rurasha. Ñuca cancunapaj allita rurashami nishca shinatajmi, cancunataca cai llajtaman tigrachimusha.

11Ñuca cancunapaj imallata ruranataca ñucamari yachani. Cancunapajca llaquitaca mana cachashachu, ashtahuanpish sumaj causaitami cugrini. Cancuna shuyacushcatatajmi cusha.

12Chaipica ñucata mañanguichijllami. Ñucapajman shamushpa mañashcataca ñucapish uyashallami.

13Cancunaca tucui shunguhuanmi ñucataca mashcanguichij. Chashna mashcashpaca ñucataca japinguichijllami ninmi.

14Mandaj Diosca cashnapishmi nin: Ñucatajmi cancunapi japi tucusha. Chaimantaca prezu causacushcamanta tigrachimushami. Maijan llajtacunallaman ñuca llujshichishpa cachashcamantaca tucuimantami tandachimusha. Ñuca prezu japichishpa cachashca cai llajtallamantajmi tigrachimusha ninmi Mandaj Diosca.

15Cancunaca: Mandaj Diosca cai Babilonia llajtapipishmari ñucanchijpajca pai ima nishcata huillajcunata churan ninacucunguichijmi.

16Ashtahuanpish Mandaj Diosca Davidpaj jatun tiyanapi tiyacuj jatun mandajmantapish, mana cancunahuan prezu apashcamanta cai pueblopi saquirishpa causacuj tucui cancunapuramantapish llaquitami huillan.

17Tucuita Mandaj Diosca cashnami nin: Ñucaca paicunapajca espadata, yaricaita, ungüitapishmi cugrini. Mana micui tucuipaj yallitaj ismushca higocunata shinami ruragrini.

18Espadahuan, yaricaihuan, ungüihuanmi llaquichigrini. Tucui cai pacha llajtacunamanmi, mancharinapish, chanzata rurashpa asinapish, c'amishpa pingachinapish cachun cugrini. Shinallataj pi llaqui tucuchun nishpaca, paicuna shina tucushca alli cachun ningacunami. Ñuca mai llajtaman shitajpipish, chashnami canga ninmi.

19Mandaj Diosca cashnapishmi nin: “Cancunallatajmari ñucata servij ñuca ima nishcata huillajcunahuan huillachishca ñuca shimicunataca mana uyashun nircanguichij. Ñaupamantapacha huasha huasha cachashpa huillachijpipish, manataj cazurcanguichijchu. Mandaj Diostajmi chashna nini.

20Jerusalenmanta Babiloniaman ñuca prezu cachashcacunaca, tucuicunallataj ñuca cancunata Mandaj Dios rimashcata uyaichigari ninmi.

21Tucuita Mandaj, israelcunapaj Diosca Colaiaspaj churi Acabmantapish, Maasiaspaj churi Sedequiasmantapish cashnami nin: Paicunaca llullashpallamari cancunamanca ñuca shutipi huillancuna. Paicunataca Babilonia llajtata jatun mandaj Nabucodonosorpaj maquipimi churagrini. Paica cancunapaj ñahui ricucuillapitajmi paicunataca huañuchinga.

22Chashna rurajpimi, Judá llajtamanta Babiloniaman prezu apashcacuna maijanta llaqui tucuchun nishpaca: Babilonia llajtata jatun mandajca Sedequiastapish, Acabtapish ninapimi cusachirca. Mandaj Diosca cantapish chashnallataj rurashca alli cachun ninguichijmi.

23Paicunaca israelcunapurapica, jatun millaitamari rurancuna. Pipaj huarmihuanpish huainayashpa puricushca jahuami, manapish ñuca huillachun cachajpi, llullashpalla ñuca shutipi huillancuna. Chaitaca tucuitami yachani, ñucatajmi tucuita ricuchigrini ninmi Mandaj Diosca” nishpami quillcashpa cacharca.

Babiloniaman shujtaj quillcata cachashpa Semaiasta rimashcamanta

24Mandaj Diosmi Jeremiastaca cashna nirca: “Nehelam pueblomanta caj Semaías runataca cashna rimashpa quillcai:

25Tucuita Mandaj, israelcunapaj Diosca cashnami nin: Canca tucui cai Jerusalén pueblopi cajcunamanpish, Maasiaspaj churi Sofonías curamanpish, tucui caishuj curacunamanpish cambaj shutipimi quillcacunata cachashca carcangui. Chai quillcacunapica, Sofoniastaca cashnami nishca carcangui:

26Mandaj Diosmi cantaca Joiada curapaj randi, paipaj huasipi tucuita ricuj cura cachun churarca. Maijan loco runa, Dios ima nishcata huillaj tucushpa, imata huillai callarijpica japishcahuanmi jutcu tablapi chaquicunata canichishpa prezu churana cangui.

27¿Imamantataj Anatot pueblomanta caj Jeremías cancunaman imata huillacujpica, mana llaquichishpa jarcanguiyari?

28Paica Babilonia llajtapica, uni huatacunatami chaipi prezu causagringuichij. Huasicunata shayachishpa tiyarichijlla. Huertacunata rurashpa, chaipi p'ucushcata micuichijlla nishpami, quillcacunata ñucanchijman cachashca nishcami carcangui nishpa quillcai” nircami.

29Semaías chashna quillcashpa cachashcataca Sofonías curaca, Dios ima nishcata huillaj Jeremías uyacujllapitajmi rezashca carca.

30Chaimantami Mandaj Diosca Jeremiastaca cashna nirca:

31“Tucui chaiman prezu apashcacunaman cashna nishpa quillcai: Mandaj Diosca chai Nehelammanta caj Semaiastaca cashnami nin: Semaiastaca mana ñuca huillanaman cacharcanichu. Llullashpallami ñuca shutipi huillacun. Cancunataca pai llullashcallapimi shunguta churachicun.

32Chashna rurashcamantaca, Mandaj Diostajmi cashna nini: Chai Nehelammanta caj Semaías runataca, paipaj huahuacunandijmi llaquichigrini. Paica ñuca runacunapurapica, paipaj huahua huahuacunaca mana causangachu. Ñuca runacunapaj ñuca ima allita rurajtaca, paipish mana ricungachu. Paimari, paicunamanca ñucata c'ariyana yuyaita curca ninmi Mandaj Diosca nishpa quillcai” nircami.