JEREMÍAS 2 - Quichua Chimborazo Bible

Israelcunaca Diosta saquishcamanta

1Mandaj Diosca ñucataca cashnami nirca:

2“Ri, Jerusalenpi causajcuna uyajta cashna caparigri: Mandaj Diosca cashnami nin: Can huambraraj cashpaca, ñucata allimi cazuj carcangui. Ñucahuan cunanlla cazarashca cashpaca, ñucata c'uyarcanguimi. Chaimantami ima tarpushca mana tiyaj, shitashca pambata pushamujpipish, ñucata catishpa shamurcanguilla. Chaitaca allimi yuyarini.

3Israelcunaca ñucapajlla ch'icanchishcami carca. Chagrapi punta p'ucushca granocunata tandashca shinami carca. Maijanpish paicunata llaquichishpaca, quiquinllatajmi llaquipi yaicurcacuna. Ñucami mitsashpa llaquichij carcani ninmi Mandaj Diosca nigri” nircami.

4Yaya Jacobopaj huahua huahua tucui israelcuna, Mandaj Dios rimashcata uyaichigari.

5Mandaj Diosca cashnami nin: “¿Cancunapaj yayacunaca ñuca ima mana allita rurajta ricushpataj ñucamanta anchurishpa, imatapish mana rurai tucuj, yanga dioscunata catishpa, yangacuna tucurcari?

6Paicunaca ña mana ñucata mashcanata yuyarircacunachu. Ñucanchijta Egipto llajtamanta llujshichishpa, shitashca, chaquishca pambacunata pushamuj, ñanllapish mana tiyaj, pi mana purishca, pi mana causashca huañunalla llajtata pushamuj Mandaj Diosca ¿maipitagari? ninataca mana yuyarircacunachu.

7Ñucamari cancunataca ima allicunatapish charichun, chagracunapi p'ucuj sumaj granocunata micushpa causachun, ima mana illaj cai llajtaman yaicuchircani. Ashtahuanpish cancunaca yaicushcahuanmari ñuca llajtataca mapayachircanguichij. Ñuca cushca cai allpataca millananatami rurarcanguichij.

8Curacunapish: ¿Mandaj Diosca maipitagari? ninallatapish mana yuyarircacunachu. Ñuca mandashcacunata charijcunallatajmi ñucataca mana rijsircacuna. Michijcunapish ñucata c'ariyancunami, ñucamanta huillajcunapish Baalpaj shutipimi imatapish huillancuna. Chashna rurashpami imata mana rurai tucuj, yanga dioscunata catincuna” ninmi.

Israelcunata llaquichisha nishcamanta

9Mandaj Diosca cashnapishmi nin: Chaimantami cancunataca p'iñarishpa llaquichigrini. Cancunapaj huahuacunapaj huahuacunatapish caita yuyachishpa llaquichishallatajmi.

10Yacu chaupipi caj Quitim llajtaman cancunallataj rishpa ricuichigari. Cedar llajtamanpish alli ricushpa tigramuchun cachaichigari. Cancuna rurashca shinata maipi ruracunchu imami, alli ricugrichij.

11Shujtaj runacunapaj dioscunaca mana dioscunatajchu. ¿Shina cajpipish paicunapaj dioscunata shitashpa, shujtaj dioscunata catijta maipi ricushcanguichijchu? Ashtahuanpish ñuca agllashcacunaca paicunata sumajyachij Diosta saquishpamari, imata mana cuj dioscunata catincuna.

12Caita ricushpaca jahua pachapish mancharishpa chujchuiyari, jatunta manchariyari. Mandaj Diostajmi chashna nini.

13Ñuca agllashcacunaca, ishqui jatun millaitami rurancuna: Puntaca causaita cuj yacu llujshicuj pugyu caj ñucatamari saquincuna. Chaimantaca yacu chaquijlla jutcucunatamari yacupaj rurancuna.

Israelcunaca Diosta mana cazushpa llaqui tucushcamanta

14Israelcunaca mana pi shujtajcunata servijcunachu carca. Huatashca shina pipaj maquipipish mana causarcachu. ¿Shinashpaca imamantashi paicunataca cashna imatapish quichuncuna?

15Malta leoncunamari huacarishpa shamurcacuna. Paicunata llaquichingapaj huacarishpa shamushpamari, chushaj llajtata saquincuna. Tucui pueblocunatamari rupachishpa, shujllapish chaipi causachun mana saquincuna.

16Menfis pueblo runacunapish, Tafnes pueblo runacunapishmi cancunataca umata p'aquircacuna.

17¿Manachu cancunata Mandaj Dios ñanta pushacujpi, cancuna paimanta anchurishcamanta, cashna llaqui tucunguichij imashi?

18Riquichij, ¿cancunaca Egiptopica imata charishpataj chai ñanta rishpa, Nilo jatun yacuta ubyanguichigari? ¿Asiria llajtapipish imata charishpataj cancunaca chai llajta ñanta rishpa, Éufrates jatun yacuta ubyanguichigari?

19Cancunapaj juchallatajmi llaquichinga. Ñucata mana cazushca juchallatajmari cancunataca llaquipi churanga. Chaipimi cancunaca ñuca cancunata Mandaj Diosmanta anchurinapish, ñucata mana cazunapish, yallitaj mana alli cashcata, llaqui tucuna cashcata yachanguichij. Tucuita Mandaj Jatun Diostajmi chashna nini.

20Cancunaca ñaupamantapachami ñuca churashca yugotaca p'aquircanguichij, cinta angucunatapish p'itircanguichij. Chashna rurashpami: Cantaca ña manataj servishachu nircanguichij. Chashna rurashca jahuapish tucui maipi tiyaj lomacunapi, tucui p'angasapa yura ucucunapimi huainayaj huarmi shina siririshpa huainayarcanguichij.

21Ñucaca cancunataca alli uva muyumanta huiñashca yuracunatamari tarpurcani. Ima sacha yurahuan chagruta mana tarpurcanichu. ¿Imamantataj sacha uva shina tucurcanguichigari?

22Cancuna lejiahuan c'acurishpa maillarijpipish, mashna jaboncuna tucurijta armajpipish, cancunapaj jucha mapaca manataj ñuca ñaupajmanta anchuringachu. Ñuca ñahuipi ricuringallami. Mandaj Jatun Diostajmi chashna nini.

23Pambacunapi cancuna imalla millaita rurashcata ricuichigari. Ima juchahuan mana mapayashcanchijchu, chai Baal dioscunapajmanca manataj rishcanchijchu nishpaca, maitataj ni tucunguichigari. Cancunaca ñanmanta llujshishcahuan maitapish callpaj huarmi dromedaria shinamari canguichij.

24Shitashca pambacunallapi causaj huarmi burro c'arinachishpa huairata mutquishpa maitapish callpaj shinami canguichij. Chai huarmi burro ruparicujtaca ¿pitaj chari tucungari? Paita mashcaj c'ari burrocunapish manataj shaicungacunachu. Ima horaspish ruparicujllatatajmi japingacuna.

25Ñucaca: Ama lluchu chaquilla maita purigrichu, ama yacunaihuan shimi chaquishpa maita purigrichu nircanimi. Ashtahuanpish canca: Manataj saqui tucunichu, ñucaca shujtajcunatami c'uyani. Paicunataca catishpa rishatajmi nircanguimi.

26Chai juchamantaca, israelcunaca shuhua japi tucushpa pingai tucuj shinami pingai tucunga. Paicunata jatun mandajcunandij, paicuna churashca mandajcunandij, curacunandij, huillajcunandijmi pingai tucungacuna.

27Paicunaca yanta caspillatami: Canmi ñucanchij yaya cangui nincuna. Shinallataj rumillatami: Canmi ñucanchijta huachaj mama cangui nincuna. Ashtahuanpish ñucamanca ñahuita ricuchinapaj randica, huashatami ricuchincuna. Jatun llaqui japijllapimi ñucataca: Quishpichinaman jataripayari nincuna.

28Judá runacunalla, cancunaca cancunapaj cai tucui llajtapi tiyaj pueblocunapimari dioscunata rurashpa charinguichij. Cunan cancuna llaquipi cajpica ¿maitaj mana ricurinca? Paicuna quishpichi tucushpaca, quishpichinaman jatarichunri.

29Tucui cancuna ñucata mana cazushpa, p'iñachishca jahuaca ¿maitataj ñucataca caita chaita nishpa juchachinguichigari? Mandaj Diostajmi chashna nini.

30Ñucaca yangamari cancunapaj huahuacunataca macashpa llaquichishcani. Manamari alli tucunguichijchu. Cancunapaj espadacunahuanmari ñuca ima nishcata cancunaman huillajcunataca, jatun p'iña león shina tucuchircanguichij.

31Cunan punlla causacuj israelcunalla, caita uyaichij. Mandaj Diostajmi cashna nini: Can israelcunaca ñuca agllashcacunamari canguichij. ¿Ñucaca cancunapajca shitashca pamba shina, mana cashpaca amsa llajta shinachu carcani imatagari? ¿Imamantataj cancunaca: Cunantajca cacharirinchijtajmi, manataj cutinca cambajman tigrashunchu ninguichigari?

32Maijan solterapish, sumajcunata churarinataca mana cungarinchu. Cazarangapaj ari ninacushca solterapish, sumajta allichirinataca mana cungarinchu. Ashtahuanpish ñuca agllashcacunaca ñamari mana yupaipaj cai tucui huatacunata ñucata cungarishpa causancuna.

33C'uyajta mashcagringapajca, sumajtamari cambaj ñantaca allichingui. Canca millaita ruranataca, millai huarmicunatapish ashtahuan yachachijmi cangui.

34Cambaj changa uri churanacunapish, ima millaita mana ruraj huajchacunata huañuchishca yahuarhuan c'ahuirishcami. Paicunataca ima juchachinallatapish mana charishca jahuami huañuchircangui. Chashna rurashca jahuami cashna ningui:

35Ñucaca ima millaita mana rurashcanichu. Diosca ñucahuanca mana p'iñarishcachu ninguimi. Mana ima juchata rurarcanichu nicujpipish, ñucatajmi canmanca can imalla rurashcata ricuchigrini.

36Canta ayudachun pita mashcashpa, ama caiman chaiman callpaichu. Cantaca Asiria llajtata jatun mandaj umashpa pingachishca shinallatajmi, Egiptota jatun mandajpish pingachinga.

37Egipto llajtamantapish ñahuita maquihuan taparishcallatajmi tigrangui. Ñuca, Mandaj Diostajmi can shunguta churashca runacunataca p'iñashpa shitarcani. Chaimanta paicunamantaca, ima allita mana chasquinguichu.