SALMOS 37 - Quichua Chimborazo Bible

SALMO 37Millaicunapaj ñanmiDavid rurashca Salmomi.

1Millaita rurajcunamantaca ama p'iñarichu.

Millaita rurajcunapajtaca

ama munaichu.

2Paicunaca q'uihuata shina utca p'itishcami cangacuna.

Q'uihua shinami chaquiringacuna.

3Mandaj Diospi shunguta churai,

imatapish allita rurai.

Quiquin llajtapimi causangui. Cashcata ruraj canahuan junda cai.

4Mandaj Diosllahuan cushicui.

Cambaj shungupi yuyashcataca paimi cunga.

5Cambaj purinataca Mandaj Diosman

mingai.

Paillapi shunguta churai.

Paica imatapish can munashcata rurangami.

6Can cashcata ruraj cashcataca luzta shinami ricungacuna.

Can cashcata ruraj cashcaca chaupi punlla shina achijllami canga.

7Mandaj Diospaj ñaupajpi upalla cailla.

Mandaj Diospi shunguta churashpa shuyailla.

Millaita rurajcuna charijyajta ricushpa ama huañuricuichu.

Millaita rurajcuna imata ruranata yuyaricujta ricushpa paicuna shina tucunata munashpa ama huañuricuichu.

8P'iñarinata saqui.

P'iñarinata cungari.

Ima mana allita ruranataca ama chai yuyailla caichu.

9Millaicunaca chingachishcami cangacuna.

Ashtahuanpish Mandaj Diospi shunguta churajcunaca

Dios cusha nishca llajtatami japingacuna.

10Millaicunaca ñallami mana tiyanga.

Paicuna tiyacushcapi ricujpica

ña mana ricuringachu.

11Alli shungucunami,

Dios cusha nishca allpataca japingacuna.

Yallitaj sumaj causaipimi cushicungacuna.

12Millaicunaca cashcata rurajcunata llaquichinallatami yuyarinacuncuna.

Manchanayajta cashturishpami p'iñancuna.

13Jatun Diosca, millaita rurajtaca asingami.

Millaita rurajpaj punlla ña chayamucushcamantami asinga.

14Diosta mana rijsijcunaca huajchacunata huañuchingapajmi espadata llujshichin.

Ima illajcunata huañuchingapajmi arcota chutaracuncuna.

Ima pandata mana rurajcunata huañuchingapajmi chashna purincuna.

15Millaita rurajpaj espadaca paipaj

shungullapitajmi yaicunga.

Paipaj arcopish p'aquiringallami.

16Cashcata rurajpaj charishcaca ashalla cashpapish, juchayuj runacuna charishcatapish yallimi.

17Diosta mana

rijsijcunapaj rigracunataca p'aquishcami canga.

Ashtahuanpish cashcata rurajcunataca, Mandaj Diosmi paipaj maquipi huaquichinga.

18Ima pandata mana rurajcunataca,

punllantami Mandaj Diosca huaquichinga.

Paicunaman cushcacunaca huiñaipajmi tiyanga.

19Llaqui punllacunapipish, pingai tucuchun mana

saquingachu.

Yaricai punllacunapipish huijsa pajtatami caranga.

20Ashtahuanpish Mandaj Diosta p'iñaj,

mana rijsijcunaca chingachishcacunami canga.

Mandaj Diosta p'iñajcunaca tucuchishcami canga. Carneropaj huira

shinami yacuyangacuna. Cushni shinami chingaringacuna.

21Diosta mana rijsijcunaca, piman imata mañashcatapish mana cutichinchu.

Ashtahuanpish cashcata rurajca llaquijmi imatapish cujmi.

22Mandaj Dios alli nishcacunallami Dios cusha nishca allpataca

japingacuna.

Ashtahuanpish Mandaj Dios mana alli nishcacunaca ñutuchishcacunami canga.

23Mandaj Diosca runapaj causaitaca, paipaj maquipimi charicun.

Tucui imapipish pai munashca shinami pushacun.

24Urmashpapish mana chaipi saquiringachu.

Paitaca Mandaj Diosmari paipaj maquimanta charicun.

25Ñucaca ñami yuyaj cani.

Cashcata rurajta Dios

shitashcataca, huambramantapacha cunancama manataj ricushcanichu.

Cashcata rurajpajca paipaj huahua huahuapish micunata mañashpa

purijtaca manataj ricushcanichu.

26Tucui paipaj causaipi llaquishpa imatapish mañachijmi.

Paipaj huahua huahuacunaca bendicionpajmi.

27Millaita ruranamanta anchuri.

Allita rurai.

Huiñaitami causangui.

28Mandaj Diosca, ima pandata mana

rurajtami c'uyan.

Paipaj agllashcacunataca mana saquinchu.

Paicunataca huiñaipajmi huaquichinga.

Ashtahuanpish Diosta mana rijsijcunapaj

huahuacunataca ñutuchingami.

29Cashcata rurajcunallami Dios cusha nishca llajtata japingacuna.

Tucui causaipimi chai llajtapi causangacuna.

30Cashcata rurajca, yachaisapa cashcahuanmi riman.

Paipaj c'alluca imatapish cashcatatajmi riman.

31Paipaj shungupica Taita Dios

mandashcacunami tiyan.

Chaimanta paipaj chaquicunaca mana lluchcaringachu.

32Diosta mana rijsijcunaca cashcata rurajcunataca, huashallami mashcan.

Huañuchinatami yuyancuna.

33Shina cajpipish Mandaj Diosca, paicunapaj

maquipi mana saquingachu.

Juchachingapaj apajpipish llaquichichun mana saquingachu.

34Mandaj Diospi shunguta churailla.

Paipaj ñanpi purilla.

Paica jatun canapi churangami.

Pai cusha nishca allpatapish cungami.

Juchayujcunata ña ñutushca cajpimi, canca ricungui.

35Diosta mana rijsijtaca yallitaj jatun tucushcatami ricurcani.

Verdijlla laurel

yura shina yallitaj caita chaita mirarijtami ricurcani.

36Chashna cashpapish

chingarircallami.

Pai maipi cashcapica mana carcachu.

Pai maipi cashcata mashcashpapish mana japircanichu.

37Tucuita allita rurajtaca yuyariyari.

Cashcata rurajtaca ricuhuayari.

Sumaj causaiyuj runapajca, q'uipataca

cushicunami tiyanga.

38Millaita rurajcunaca tucuicunami shuj cutin ñutuchishca canga.

Diosta mana rijsijcunapajca tucuripica, tucuita chingachishca canallami.

39Ashtahuanpish cashcata rurajcunataca,

Mandaj Diosmari quishpichinga.

Llaqui punllacunapica muyundij

pirca shinami paica huaquichin.

40Mandaj Diosmi ayudanga.

Paimi quishpichinga.

Diosta mana rijsijcunapaj maquimantapish

llujshichishpami quishpichinga.

Paipi shunguta churashcamantami chashna ruranga.