HECHOS 20 - Quichua Chimborazo Bible

Macedoniaman Greciaman Pablo rishcami

1Chai bulla chulunyashca q'uipaca, Pabloca Jesusta caticujcunata tandachishpa alli catinguichij nishpami cunarca. Chashna cunashpaca ugllarishpa cayacamachij nishpaca Macedoniamanmi rirca.

2Chai llajtapi causaj crijcunata alli catinguichij nishpa achcata cunashpaca, Greciamanmi rirca.

3Chai llajtapica quimsa quillatami carca. Chai q'uipaca Siriaman ringapaj barcopi risha yuyacushpaca mana crij judiocuna paita macangapaj chapacushcatami yachaj chayarca. Chaimi Macedonia llajtallatataj chaquillahuan tigrana tucurca.

4Pablohuanca, Bereamanta Sopaterpish, Tesalonicamanta Aristarcopish, Segundopish, Derbemanta Gayopish, Asiamanta Timoteopish, Tiquicopish, Trofimopishmi Asiacama rircacuna.

5Paicunaca ñucanchijtaca Troaspimi shuyanaman ñauparcacuna.

6Ñucanchijca, levadura illajlla tandata micuna punllacuna tucurijpimi, Filiposmanta barcopi huichiyashpa, pichca punllapi Troasmanca chayarcanchij. Chaipimi paicunahuan tupashpa canchis punllacama saquirircanchij.

Troas pueblopi Pablo cashcami

7Semana callari punllapimi, Jesusta caticujcunaca Jesús huañushcata yuyarishpa tandata chaupishpa micungapaj tandanacurcacuna. Pabloca, cayandij punlla llujshina cashpami, yachachishpa chaupi tutacama huillacurcalla.

8Paicuna tandanacushca altibajo ucupica, achca lamparacunami japichishca carca.

9Chaipica, Eutico shuti huambrami ventanapi tiyacurca. Unita Pablo huillashcamantami, yallitaj dormi atijpi, quimsa altoyuj huasimanta ucuman urmarca. Paita jatarichinaman rishpaca huañushcatami japircacuna.

10Pabloca chaimanta uriyashpami, paipaj jahuapi siririshpa, ugllarishpaca:

–Ama mancharichijchu, causajmari– nirca.

11Pabloca cutin jahuaman huichiyashpami, Jesús huañushcata yuyarishpa tandata chaupishpa curca. Ña micushca q'uipapish pacaringacamami huillacurcalla, chai q'uipaca rircallami.

12Chai huambrataca, causajta pushashpami cushicushpa rircacuna.

Troasmanta Miletoman Pablo rishcami

13Pabloca chaquillahuan risha nishcamanta ñucanchijca Ason pueblopi tupashpa paita apashun nishca cashpami, barcopi huichiyashpa chaiman ñauparcanchij.

14Asonpi Pablohuan tupanacushpaca, barcopi huichiyachishpami Mitileneman shamurcanchij.

15Mitilenemanta barcopi rishpaca, yacu chaupipi caj Quío ch'imbapurata rishpami, cayandij punllataca Samospi barcocuna shayarinaman chayarcanchij. Chaimantaca Trogilio pueblopi samarishpami, cayandij punllataca Miletoman chayarcanchij.

16Pentecostés punllapaj ima shinapish Jerusalenpi casha nishpami, Pabloca Asiapi ama achcata uniyangapaj Efesotaca pasashpa rircalla.

Pabloca minchacama ningapaj Miletopi huillashcami

17Pabloca, Miletopi cashpami, Efesopi caj tandanacushca crijcunapaj cunaj yuyajcunata cayaj cacharca.

18Paicuna chayamujpica cashnami nirca:

–Asiaman chayashca pachamanta ñuca ima shina cancunahuan cashcataca cancunallataj allimi yachanguichij.

19Mana crij judiocuna ñucata llaquichijpipish, llaquihuan huacaihuanmi mana jatun tucushpalla Mandaj Jesuspajtaca ruracurcani.

20Chashna cashpapish ñucaca cancunaman huillanatapish, yachachinatapish manataj saquircanichu. Cancunapaj allipajllatajmi tucuicunapaj ñaupajpipish, cancunapaj huasin huasintapish huillashpa purircani.

21Judiocunaman, mana judiocunamanpish mana allita ruracushcata saquishpa cutirichij, ñucanchijta Mandaj Jesucristota crichij nishpami huillacurcani.

22Cunanca Espíritu rinatajmi cangui nijpimi, ñucaca Jerusalenpi ima tucuna cashcata mana yachashpapish chaiman rigrini.

23Caillatami yachani. Jucha illaj Espirituca, mai pueblopipish cashnami huillan. Prezujcuna, jatunta llaquichijcunami cantaca shuyacun ninmi.

24Ashtahuanpish chaicunataca mana manchanichu. Ñuca causaitapish mana c'uyanichu. Chaipaj randica Taita Diosca mana c'uyaipajta c'uyaj cashca alli huillaita huillashpa, Mandaj Jesuspajta rurangapaj chasquishcata cushicushpa pajtachina yuyaillami cani.

25Sarun punllacuna cancunahuan cashparajmi, Taita Dios mandacujpica ima shina cashcata huillarcani. Chaita uyajcunaca cunanmanta pacha cutinca pipish ña mana ñucataca ricunguichijchu.

26Chashna tucuita huillashcamantaca, cancunapaj yahuarmantaca ima juchachina illajmi canchij.

27Taita Dios imallata munashcataca, mana pacashpami tucuita huillarcani.

28Mandaj Jesusca paipaj yahuarta jichashpami cancunataca randirca. Chaimanta cancunallatajpish alli cuidaringuichij. Cancunaman mingashca ovejacunatapish alli cuidanguichij. Cancunataca Taita Diospaj tandacushca crijcunata michij obispo cachunmi, jucha illaj Espirituca churarca.

29Ñuca rishca q'uipaca, cancunapaj chaupimanca millpuj atujcuna shina shamushpami, ovejacunataca urata janajta apangacuna.

30Chashna rurangapajca cancunapurallamantatajmi maijancunaca, paicunata catichun crijcunaman imatapish llullashpa huillajcuna ricuringa.

31Chaimanta alli yuyaihuan caichij. Quimsa huatatami tutapish, punllapish mana samashpa, huiqui ñahui shujta shujta sinchita cunacurcani. Chaitaca ama cungaringuichij.

32“Cunanca huauquicuna, Taita Diosmanpish, mana c'uyaipajta c'uyaj paipaj alli huillaimanpishmi cancunataca mingani. Chai alli huillaimi cancunataca ashtahuan ashtahuan sinchiyachishpa catinga. Jucha illajta rurashcacunapura japina cashcatapishmi tucuicunaman cunga.

33Ñucaca cullquitapish, curitapish, churanatapish maijanpajta mana munashcanichu.

34Chaipaj randica, ñucapajpish ñucahuan purijcunapajpish ima illajpica, ñuca quiquin maquihuanmi trabajarcani. Chaitaca cancunallataj yachanguichijmi.

35Chashna trabajashpa mana charijcunaman cushpa ricuchishpami yachachicurcanilla. “Imatapish cujmi, cushcata japijta yalli cushicun” nishpa Mandaj Jesús nishcatapish yuyaringuichij”– nircami.

36Pabloca tucui chaicunata nishca q'uipaca tucui paicunandij cungurishpami Taita Diosta mañarca.

37Chaimantaca tucuicunami Pablotaca minchacama nishpa achcata huacashpa ugllarishpa mucharcacuna.

38Ñuca ñahuitaca mana ashtahuan ricunguichijchu nishpa Pablo nishcamantami, yallitaj llaquirircacuna. Chaimantaca barcocamami paihuan rircacuna.