HEBREOS 2 - Quichua Chimborazo Bible

Quishpichij cachun cushcaca tucuimanta yalli jatunmari

1Chaimanta ñanta chingachij shina ama pandaringapaj ñucanchij imata uyashcataca ashtahuan chai yuyailla catirashunchij.

2Angelcunata ñaupa huillachishcaca, chashnatajmi carca. Chai huillashcata mana cazushpa mandashcata p'aquijcunaca, llaquita apana cashca shinallatatajmi chasquirca.

3Shina cajpica, quishpichij cachun cushcaca tucuimanta yalli jatunmari. Chaita mana chasquishpa saquishpaca ¿ima shinataj ñucanchijca quishpirishun? Chaitaca, Mandaj Jesusrajmi huillarca. Chaita uyajcunami ñucanchijmanca chashnataj cashcata huillarcacuna.

4Diosca señalcunata, pi mana ruraipajcunata, ch'ican ch'ican milagrocunata paicunata rurachishpami chai huillashcacuna chashnataj cashcataca ricuchirca. Pai munashca shina paipaj Jucha illaj Espirituta cushpami chaicunataca chashna rurachirca.

Cristoca quishpirinata rurajmi

5Ñucanchij parlacushca mushuj pachata q'uipa punllapi mandachunca, Diosca mana angelcunamanchu curca.

6Ashtahuanpish Quillcachishca maijantajshica cashnami nishca:

“Runaca ¿ima cajpitaj paitaca yuyaringuiyari?

Huañujlla runataca ¿imapajtaj ricuj shamunguiyari?

7Ashacamallami paitaca angelcunata yalli yangallata rurashcangui.

Chashna cajpipish paitaca sumaj, alli nishcatami rurashcangui.

Cambaj maquihuan rurashcacunata mandachunpishmi churashcangui.

8Tucuita pai cazuchichunmi, paipaj chaqui ucupi churarcangui” ninmi.

Chaimantami tucui imatapish, imata mana saquishpa paipaj chaqui ucupi churarca. Shina cajpipish, tucuicuna paita cazucujtaca manaraj ricunchijchu.

9Ashtahuanpish Jesustaca ashacamallami angelcunata yalli yangallata rurashcata ricunchij. Diosca mana c'uyaipajta c'uyaj cashpami, tucuicunamanta huañuita rijsichun nirca. Llaquita apashpa huañushcamantaca, tucuicunata yalli sumaj alli nishcatami rurashcangui.

10Tucui imalla tiyajcunapish Dios rurashcami. Paillamantatajmi tucui imapish tiyan. Diosca tucui paipaj huahuacunata paipaj sumaj llajtaman pushanatami munan. Chaipajca Cristotami llaquita apashpa, cashcata ruraj paicunapaj quishpichij cachun churarca.

11Jucha illajta rurajpish, jucha illajta rurashcacunapish tucuicunami shuj Yayapajlla. Chaimantami Jesusca ñucanchijtaca huauquicuna ninataca mana pinganachin.

12Paillatajmi:

“Cambaj shutitaca ñuca huauquicunaman huillashami.

Tandanacushcacunapaj chaupipimi, cantaca alabasha” nirca.

13Shinallataj:

“Ñucaca paipimi shunguta churasha” nircami.

Cutinmi:

“Ñucaca Dios cushca huahuacunahuanmi caipi cani” nirca.

14Gentecunaca aichayuj, yahuaryujmi, chai shinallatajmi Jesuspish aichayuj yahuaryuj tucurca. Huañuiman apacujta pai huañushpa chingachingapajmi chashna aichayuj tucurca. Chai apacujca diablomi.

15Tucui paicunapaj causaipi huañuita manchaihuan canapi huatashca cajcunata cacharichingapajmi chashna tucurca.

16Mana angelcunata ayudangapajchu shamurca, ashtahuanpish Abrahampaj huahua huahuata ayudangapajmi shamurca.

17Chaipajmi tucuipi paipaj huauquicuna shina tucuna carca. Diospajta ruraj, c'uyaj, tucuita pajtachij, curacunata jatun pushajmi tucuna carca. Tucuicunapaj juchacunata anchuchingapajmi chashna tucurca.

18Paita umasha nij llaquicunata apaj cashcamantami, umasha nij llaquicunahuan cajcunamanca mishachun poderta cui tucun.