1Tucui gentecuna caita uyaichij.
Tucui cai pachapi causajcuna uyaichij.
2Yangallami nishcacunapish, alli nishcacunapish, charijcunapish, huajchacunapish tucuicuna uyaichij.
3Ñuca shimica alli yachaitami rimanga.
Ñuca shungupi yuyashcaca alli yuyaimi.
4Yuyachij shimicunataca ñuca rinrinhuanmi uyasha.
Mana yachaipaj yachaitaca arpapi tocashpami huillasha.
5Llaqui punllacuna shamujpipish ¿imamantataj manchasha?
Ñucata p'iñajcuna millai yuyaicunahuan ñuca muyundijta cajpipish
¿imamantataj manchasha?
6Paicuna charishcacunapi shunguta churajcuna, paicuna achcata charishcacunallapi shunguta churajcunaca jatun tucuncunami.
7Paicunapuramantaca shujllapish ima chaicunahuanca paipaj huauquitaca mana quishpichingachu.
Paita quishpichichunpish Taita Diosmanca mana pagai tucungachu.
8Paipaj causaita quishpichingapajca mashna tiyashcapish mana pajtangachu.
Chaicunahuanca manataj nunca quishpiringachu.
9Huiñaita causanapaj imata paganaca mana tiyanchu.
Mana ismushun nishpa imata paganaca mana tiyanchu.
10Yachaisapacunapish huañunllatajmi.
Yuyai illajcunapish chashnallatajmi chingarincuna.
Rumi shungupish chashnallatajmi chingarin.
Paicuna charishcacunaca shujtajcunapajllami saquirin.
11Paicunapaj yuyaipica, paicunapaj huasica huiñaipaj cashcatami yuyancuna.
Paicuna causanaca huahua huahuapaj cashcatami yuyancuna.
Allpatapish paicunapaj shutitami churancuna.
12Chashna cashpapish gentecunaca huiñaitaca mana alli nishca cangachu.
Huiñaitaca mana cushicungachu.
Chingarijlla animalcuna shinallatajmi.
13Quiquinllapitaj shunguta churashpa purijcunaca chashnami tucuringacuna.
Paicunapaj huahua huahuacunapish yaya mamacuna yuyashca shinallataj yuyashpami cushicuncuna. Selah
14Canlla ovejacunata shinami seolman pushanga.
Huañuimi paicunataca michinga.
Ña pararijpica ima pandata mana rurajcunami mandanga.
Paicuna sumaj cashcaca chingaringami.
Paicuna causanaca seolmi canga.
15Ashtahuanpish ñuca causaitaca Taita Diosmari seol chariracunmanta quishpichinga.
Ñucataca paimari pushanga. Selah
16Maijan achcata charij tucujpipish ama mancharichu.
Sumaj charinacunata paipaj huasipi jundachijpipish ama mancharichu.
17Huañushpaca imata mana apangachu.
Paipaj sumaj cashcacunapish mana catishpa ringachu.
18Causacushpaca pai quiquinllataj cushicucunimi niringami.
Achcata charij cashcamanta alabashca cangachari.
19Chashna cashpapish paipaj yayacunapaj huahua huahuacuna causacunllamantajmi yaicunga.
Luztaca nunca mana ricungachu.
20Runaca manapish entendishpa yangalla jatun tucujca animalcuna shinallatajmi chingaringa.
Who We AreWhat We EelieveWhat We Do
2025 by iamachristian.org,Inc All rights reserved.
