1 CRÓNICAS 17 - Quichua Chimborazo Bible

Taita Diosca Davidmanca bendiciashami nishcami(2 S 7.1-29)

1Davidca paipaj huasipi ña causacushpami, profeta Natantaca:

–Riqui, ñucaca cedro caspicunahuan rurashca huasipimari causacuni. Mandaj Diospaj arcaca linsocunahuan shayachishca ucullapimari tiyacun– nirca.

2Chaimi Natanca Davidtaca:

–Cambaj shungupi imallata yuyarishcataca chaita rurailla. Taita Diosca canhuanmari– nirca.

3Chai tutallatajmi Taita Diosca Natantaca:

4“Ñucapajta ruraj Davidpajman rishpa cashna nigri: Mandaj Diosca cashnami nin: Ñuca causana huasitaca mana canchu shayachingui.

5Egiptomanta israelcunata llujshichimui punllamanta cunan punllacamaca, huasicunapica mana causamushcanichu. Ashtahuanpish carpa huasicunallapimi shuj tucurijpica shujpi, chai tucurijpipish shujtajpi causarcani, llajtacunapipish caipi chaipimi causarcani.

6Tucui chaicunapi israelcunahuan puricushpaca, paicunataca ima shimicunata mana rimashcanichu. Ñuca israelcunata michinaman cachacushpapish Israelcunapaj juezcunataca ñucapaj huasita cedro caspicunahuan ruraichij nishpa maijanta mana nishcanichu.

7Chaimanta cunanca ñucapajta ruraj Davidtaca cashna nigri: Tucuita Mandaj Diosca cashnami nin: Ovejacunata michishpa, ovejacunapaj corralpi cuidashpa puricujta japishpami, ñuca israelcunata mandaj cachun churarcani,

8chaimantami can maita puricujpipish canhuan carcani. Canta p'iñajcunatapish cambaj ñaupajmantaca, tucuicunatami anchuchircani. Canmanca jatun shutitami curcani. Cai pachapi jatun mandajcuna shinallataj jatun mandaj cachunmi churarcani.

9Ñuca israelcunapajca shuj llajtatami paicunapajtaj cachun curcani. Chaipi causachunmi paicunataca yurata tarpuj shina churarcani. Chaimantaca pi manataj cuyuchingachu. Millaicunapish callari punllapi shina mana llaquichingachu.

10Ñuca agllashca israelcunata mandaj cachun juezcunata churashca punllamanta cunancamami llaquichircacuna. Shina cajpipish canta p'iñajcunataca cumurichishami. Mandaj Diosca caitapish canmanca yachaj chayachinmi. Canpica huasitami shayachinga.

11Cambaj causai tucurijpi, cambaj ñaupa yayacunahuan can samaricujpica, cambaj q'uipaca cambaj huahua huahuacunapuramantami shuj mandajta churasha. Paica cambaj huahua huahuacunamantami llujshinga. Paitaca paipaj mandana huiñaipaj cachunmi churasha.

12Paimi ñuca huasitaca shayachinga. Pai mandashpa tiyanataca ñucami huiñaipaj churasha.

13Ñucaca paipaj yayami casha, paica ñuca churimi canga. Paimantaca ñuca c'uyaitaca mana cambaj ñaupa mandajmanta shina anchuchishachu.

14Ashtahuanpish ñuca huasipipish, ñuca mandanapipish huiñaita causachunmi churasha. Pai mandanaca pi mana cuyuchipaj huiñaipajmi canga ninmi nigri” nircami.

15Natanca tucui cai shimicunata, muscuipi shina tucui ricushcacunataca chai shinatajmi Davidmanca huillarca.

16Chashna nijpi jatun mandaj David yaicushpa, Mandaj Diospaj ñaupajpi shayarishpaca: “Ñucata Mandaj Taita Dios, ñucaca ¿pitaj caniyari? Ñuca huasi familiapish ¿pitaj cajpi ñucanchijtaca caicama pushamunguiyari?

17Taita Dioslla, cai tucuita rurashcaca cambajca mana achca shinami cashca. Chai jahuamari cambajta ruraj ñuca huasi ucupuracuna q'uipa punllacunapi ima shina canatapish rimashcangui. Ñucatapish ima alli runata shinamari alli nihuangui, Mandaj Taita Dioslla.

18Cambajta ruraj ñucata chashna alli nijpica, cambajta ruraj Davidca ¿imatataj ashtahuan nishari? Cambajta ruraj ñucataca tucuitami rijsingui.

19Mandaj Dioslla, cai jatun ruranacunataca cambajta ruraj ñucata c'uyashcamanta, cambaj shungu yuyashca shina rurashpami, cambajta ruraj ñucamanca yachaj chayachishcangui.

20Mandaj Dioslla, can shinaca pi mana tiyanchu. Can imallata rurashcata ñucanchij uyashca shina shujtaj Diosca mana tiyanchu.

21Cai pachapica can agllashca israelcuna shinapish shujtajcunaca mana tiyanchu. Can jatun Diosca paicunallatamari cambajlla cachun agllarcangui. Chashna jatun allicunata rurashpami, canca jatun cashcata ricuchishpa pi mana rurai tucuipaj mancharinacunata rurashpa paicunataca Egiptomanta llujshichimushcangui. Cai llajtapi causacushca shujtajcunata llujshichishpa cachashpami, paicunataca caipi churashcangui.

22Cambaj israelcunataca canllataj agllashpamari huiñaipaj cambaj cachun churarcangui. Mandaj Dioslla canca paicunapaj Diosmari tucushcangui.

23Cunanca Mandaj Dioslla, cambajta ruraj ñucamanpish, ñuca huahua huahuacunamanpish huiñaipaj imallata rurasha nishcataca chaitataj pajtachinguilla”.

24Cambaj shutitaca huiñaita jatunyachicuchunlla. Paicunaca: “Tucuita Mandaj Diosca israelcunapaj Diosmi. Chai Diosmari israelcunapaj Dios” nichun. Cambajta ruraj Davidpaj huahua huahuacunaca cambaj ñaupajpica cambajlla sinchicuna cachun.

25Can ñuca Diosmi cambajta ruraj ñucamanca canpica huasitami shayachisha nircangui. Chaimantami cambajta ruraj ñucaca, cambaj ñaupajpi tucui shunguhuan canta mañani.

26Mandaj Taita Dios canca Diostajmi cangui. Cambajta ruraj ñucaman allicunata cunataca cambaj shimihuantajmi rimashcangui.

27Cambajta rurajpaj huahua huahuacunaca huiñaita cambaj ñaupajpi cambajlla cachun paicunataca can alli nichunmi rogani. Mandaj Dios ima shinami rurasha nircangui chai shinallataj can alli nishcahuanca huiñaipaj alli nishca cachun nircami.