GÁLATAS 3 - Quichua Chimborazo Bible

Espiritutaca crishpami chasquishca

1¡Yuyai illaj galatacunalla! Mana llullata ama cazuchunca ¿pitaj umarcari? Jesucristotaca chacatashcata cancunapaj ñaupajpi ricuchij shinami, ña huillarcani.

2Cancunamantaca caillatami yachasha nini: ¿Mandashcapi nishcata rurashcamantachu, mana cashpaca uyashpa crishcamantachu Espiritutaca chasquircanguichij?

3¿Yallitaj yuyai illajcunachu canguichij? Espirituhuan callarishca jahuachu ¿cunanca aichapi rurashcahuan ashtahuan alli cashun ninguichij?

4¿Chai tucui llaquicunataca yangallachu aparcanguichij? Chashnataj cajpica, yangallami canga.

5Diosca cancunaman Espirituta cushpami, cancunapurapica mancharinacunata ruracun. ¿Mandashcapi nishcata rurashcamantachu, mana cashpaca uyashpa crishcamantachu chashnaca ruracun?

Abrahamman Dios ari nishcami

6Abrahamca Diostami crirca. Chaimantami cashcata rurajta shina chasquirca.

7Chaimanta caita yachaichij. Maijanpish crijmi Abrahampaj huahuacunatajca.

8Diosca, mana judiocunapish crijpi justificana cashpami, Quillcachishcapica ñaupaman ricuchirca. Chaimantami Abrahammanca: “Canmantaca tucui mama llajtacunami alli nishca canga” nishpa alli huillaitaca ñaupaman huillarca.

9Chaimantami crishpa causajcunaca, crij Abrahamhuan allicunata chasquijcuna tucun.

10Mandashcapi nishcata rurashpa alli ricurishun nijcunaca, tucuicunami llaquichishca canapaj. Cashnami quillcashca tiyacun: “Mandashcata quillcashca libropi imalla tiyacujta tucuita mana pajtachijcunaca, llaquichinapajllatajmi” ninmi.

11Caitaca ricunallami. Diospaj ñaupajpica, Mandashcata rurashcamantaca pi mana justificashca tucunchu. Ashtahuanpish: “Cashcata rurajca crishcamantami causanga”.

12Mandashcaca crishcamantaca mana shamunchu, ashtahuanpish: “Mandashcapi nishcacunata pajtachijcunallami causanga” ninmi.

13Mandashca llaquiman cachacujpimi, Cristoca randishpa cacharichirca. Ñucanchijmantami llaquichishca tucurca. Quillcachishcapipish cashnami: (“Caspipi tucui huarcushcacunaca, llaquichishcacunami” ninmi).

14Abrahamman cushca allicunaca, Cristo Jesusmanta mana judiocunapajman chayachun, cusha nishca Espirituta, ñucanchijpish crishpa chasquichunmi chashna tucurca.

15Huauquicuna, gentecuna ruraj cashcahuanmi yuyachishpa rimani: Shuj runa ari ninacushcallatapish, shuj cutin allimi ninacushpa quillcashpaca, pi mana yanganchinchu, mana mirachinchu.

16Chai shinallatajmi Abrahamman, paipaj huahua huahuaman Diosca cusha nirca. Achcacunaman nij shinaca, mana: “Huahua huahuaman” ninchu. Ashtahuanpish shujta nij shinallami: “Quiquinpaj huahuaman” nin. Chaica Cristomi.

17Chaimi caita nini: Cristopi Dios ñaupaman allichishpa ari nishcataca, Mandashcaca mana chingachircachu. Mandashcaca 430 huatacuna q'uipami shamurca. Chaica Dios cusha nishcataca, mana yangata rurarcachu.

18Mandashcata rurashcamanta herenciata japina cana cajpica, ña mana Dios cushallami nishcamantachu canman. Ashtahuanpish Diosca, cushallami nishcatami Abrahammanca curca.

Mandashca imapaj alli cashcami

19Shinashpaca ¿Mandashcaca imapajtaj alli? Mandashcaca mana cazujcuna cashcata ricuchichunllami, Dios cusha nishca huahua shamungacama q'uipata mirachishca carca. Chaitaca gentecunamanta rimaj Moisespaj maquipimi, angelcunata cuchirca.

20Runacunamanta Dioshuan rimajca, mana shujllamanta rimanchu. Ashtahuanpish Diosca shujllami.

21Shinashpaca ¿Mandashcaca, Dios cusha nishcacunataca jarcanchu? ¡Manataj chashnachu! Mandashcata cushca causachi tucujpica, Mandashcapi nishcata rurashpami cashcata rurajtaj caiman.

22Ashtahuanpish Jesucristopi crijpi, Dios cusha nishcata crijcunaman cushca cachunmi, Mandashcaca jucha ucupi tucuicunata huichcarca.

23Crina manaraj chayamujpica, Mandashca ucupimari huatashcacuna carcanchij. Chai crinata ricuchingacamaca, huichcashcacunami carcanchij.

24Crishcamanta justificashca cachunmi, Mandashcaca Cristopajman chayangacamalla ñucanchijman ricuchij cashca.

25Ashtahuanpish cunanca, crina shamushcamantaca ña mana ricuchishpa pushajpaj ucupichu canchij.

26Cristo Jesuspi crishcamantaca, tucuicunami Diospaj huahuacuna canguichij.

27Cristopi bautizarishcacunaca, tucuicunami Cristota churarishcacuna canguichij.

28Chaimanta judiopish, griegopish, esclavopish, mana esclavopish, c'aripish, huarmipish ña mana tiyanchu. Cancunaca tucuicunami Cristo Jesuspi shujlla canguichij.

29Cancuna Cristopaj cashpaca, Abrahampaj huahua huahuacunatajmi canguichij. Dios cusha nishcatapish japijcunami canguichij.