LAMENTACIONES 5 - Quichua Chimborazo Bible

Llaquihuan cajcuna mañashca shimicunami

1Mandaj Dioslla, ñucanchij llaqui

tucushcata yuyarihuayari.

Ñucanchijta cashna c'amishpa llaquichicujtaca

tigrashpa ricuyari.

2Ñucanchij imalla charishcacunaca mana rijsishca runacunapaj maquipimari.

Ñucanchij huasicunataca shujtajcunamari charicun.

3Yaya illajlla, shitashca huahuacunamari canchij,

ñucanchij mamacunapish viuda huarmicuna shinamari.

4Ñucanchij yacullatatajpish, cullqui jahuamari ubyanchij.

Ñucanchij yantallatatajmari randinchij.

5Ñucanchijca llashajta aparishca shina llaquinayajta,

shaicuitamari causanchij.

Samarinataca manataj charinchijchu.

6Ñucanchij huijsa micunapajpish,

Egipto llajta, Asiria llajta runacunatami

maquita chutashpa mañanchij.

7Juchata ruraj ñucanchij yayacunaca ñamari huañurca.

Ashtahuanpish ñucanchijmari paicunamanta

llaquita apacunchij.

8Servijcunamari ñucanchijta mandacuncuna.

Paicunapaj maquimantaca pi mana cacharichi tucunchu.

9Ñucanchij micunata apamunaman llujshirishpapish, shitashca pambacunapi chapashpa huañuchijcuna

japishpa espadahuan huañuchina manchaimi

purij carcanchij.

10Yaricaihuan chaquishpamari, ñucanchij

aicha carapish horno shina yanayarca.

11Sión pueblopipish, Judá llajtapi tiyaj

caishuj pueblocunapipish jatun huarmicunatapish,

c'arihuan manaraj chayarinacushcacunatapish

japirishpa llaquichircacunami.

12Mandajcunatapish maquicunapi

huatashpamari huarcurcacuna.

Yuyajcunatapish, huambracunata shinami rimarcacuna.

13Sinchiraj c'aricunataca cutachunmi churarcacuna.

Huambra c'aricunamari yantata aparinapica,

shaicushpa urmarcacuna.

14Pueblo pungucunapipish yuyajcunaca,

ña mana ricurinchu.

Huiñacuj huambracuna cantashcapish,

ña mana uyarinchu.

15Ñucanchij shungupica, ima cushicuita

ña mana charinchijchu.

Ñucanchij cushicushpa tushunaca, jatun

llaquimanmari tigrashca.

16Ñucanchij umapi tiyacushca coronamari urmashca.

¡Aij ñucanchijlla, juchata rurashcamantamari

cunanca cashna llaquipi canchij!

17Chaimantamari ñucanchijca shungu

p'aquirishpa llaquirircanchij,

ñucanchij ñahuicuna zuyuyajtamari huacarcanchij.

18Sión urcuca shitashcamari,

zorracunallamari chaitaca purincuna.

19Shina cajpipish Mandaj Dioslla, canca huiñaitamari causangui.

Huiñai huiñaitamari cambaj jatun tiyanapi mandangui.

20¿Imamantataj ñucanchijtaca manataj yuyaringuiyari?

Ña cai tucui huatacunatamari ñucanchijtaca

shitashcata saquingui.

21Mandaj Dioslla, ñucanchijtaca cambajman

tigrachihuailla, tigrarishunllamari.

Ñaupa shinallataj cambaj cangapaj,

ñucanchij causaita mushujyachihuailla.

22Ñucanchijhuanca jatuntamari p'iñarishcangui.

Chashna p'iñarishpa, can shitashcamari causacunchij.