EZEQUIEL 11 - Quichua Chimborazo Bible

Millai mandajcunata rimashcamanta

1Diospaj Espiritumi ñucataca jatarichishpa, Mandaj Diospaj huasi inti llujshin ladoman caj punguman pushashpa rirca. Chai huasi punguca, inti llujshin ladomanmi carca. Chai pungu yaicunllapica, ishqui chunga pichca runacuna shayacujtami ricurcani. Chai runacunapurapica Azurpaj churi Jaazaniastapish, Benaiapaj churi Pelatiastapishmi ricurcani. Paicunaca pueblopi causajcunata pushajcunami carca.

2Chaimantaca ñucataca cashnami nirca: “Huañujlla aichayuj runalla, cai pueblopi causajcunataca cai runacunami ima shinalla millaita ruranata yachachicuncuna.

3Paicunaca cashnami nincuna: Llaquicunaca manaraj ñapish chayamungachu, huasicunataca rurashunchijlla. Cai puebloca manga shinami canga, ñucanchijca aicha shinami cashun nincunami.

4Huañujlla aichayuj runalla, chaimanta canca paicunata llaquichina cashcata huillai” nircami.

5Mandaj Diospaj Espirituca, ñucapajman shamushpaca cashnami nirca: “Mandaj Diosca cashnami nin: Caita cashna huillai: Israelcunalla, cancunaca chashnami rimashcanguichij, cancuna imata yuyacushcatapish ñucaca yachanimi.

6Cai pueblopica cancunapaj huañushcacunataca yallitajmi mirachishcanguichij, ñancunatapish huañushcacunahuanmi jundachishcanguichij.

7Chaimantami Mandaj Jatun Diosca cashna nini: Cai pueblo chaupipi churashca cancunapaj huañushcacunami aichaca canga, mangaca cai pueblomi canga. Ashtahuanpish cai pueblomantaca cancunataca llujshichishami.

8Cancunaca espadatami manchacurcanguichij, espadallatatajmi cancunapajmanca apamusha. Mandaj Jatun Diostajmi chashna nini.

9Shinallataj cancunataca cai pueblomanta llujshichishpaca, caru llajtamanta shamujcunamanmi cushpa cachasha. Cancunataca chashnami llaquichisha.

10Cancunaca espadapimi urmanguichij, Israel llajta lindepimi cancunataca llaquichisha. Chashna rurajpimi, ñucataca Mandaj Diostaj cashcataca yachanguichij.

11Cai puebloca mana cancunapaj mangachu canga, cancunapish cai pueblopajca mana aichachu canguichij. Ashtahuanpish Israel llajta lindepimi cancunataca llaquichisha.

12Chashna rurajpimi cancunaca ñucataca, Mandaj Diostaj cashcata yachanguichij. Cancunaca manamari ñuca quillcachishcapi nishca shina purircanguichijchu, manamari ñuca huillachishcacunatapish cazurcanguichijchu. Ashtahuanpish cancunapaj llajta muyundijpi causajcuna imata rurajta ricushpami, chaitataj catircanguichij ninmi ni” nircami.

13Chashna tucunata ñuca huillacujpirajmi, Benaiapaj churi Pelatiasca huañurca. Chaimantaca pambaman tupangacama cumurishpami: “¡Ñucata Mandaj Jatun Dioslla! Causaj saquirij israelcunataca ¿tucuicunatachu chingachigringui imatagari?” nishpa, sinchita caparishpa mañarcani.

Cutin allichishami nishcata Taita Dios pajtachishcamanta

14Mandaj Diosca ñucataca cashnami nirca:

15“Huañujlla aichayuj runa, cambaj huauquicunatapish, cambaj familiacunatapish, tucui israelcunatapishmi Jerusalenpi causajcunaca: Mandaj Diosmanta caruyaichij, ñucanchijmanmi cai llajtataca curca nishpa rimarcacuna.

16Chaimanta paicunamanca cashna huillai: Mandaj Jatun Diosca cashnami nin: Paicunataca caru llajtacunapi causagrichun cachashca cashpapish, shujtaj llajtacunaman caita chaita cachashca cashpapish, ñucallatajmi paicunapaj huasica casha ninmi ningui.

17Cashnapish huillangui: Mandaj Jatun Diosca cashnami nin: Cancunataca shujtaj runacunapaj chaupipi shujtaj llajtacunapi tsiraparishpa causacunmanta tandachishpami, Israel llajtataca cusha.

18Chaiman tigrashpaca rurashcalla dioscunata adoranatapish, millananacunata ruranatapish anchuchingacunami.

19Paicunamanca mushuj yuyaita, mushuj shungutami cusha. Rumi shunguta anchuchishpami, mushuj shunguta churasha.

20Chashna rurajpimi, ñuca mandashca shina causangacuna. Ñuca huillachishcacunatapish cazushpami pajtachingacuna. Paicunaca ñuca agllashcacunami canga, ñucapish paicunapaj Diosmi casha.

21Ashtahuanpish paicunapaj shungupica rurashcalla dioscunata adorana yuyaillahuan, millaita rurana munaillahuanmi purincuna. Paicuna ima shina causashca shinallatajmi llaquichisha ninmi Mandaj Jatun Diosca ningui” nircami.

22Chai q'uipaca querubincunapish jahuata jatarijpimi, ruedacunapish paicunahuan tandalla rirca. Israelcunapaj Taita Diospaj sumaj achij nicujmi paicunapica carca.

23Shinallataj Mandaj Diospaj sumaj achij nicujca pueblomantaca, inti llujshin ladoman caj urcu jahuapimi tiyarirca.

24Chai q'uipami Diospaj Espirituca, ñucata jatarichishpa pusharca. Chaimantaca Diospaj Espiritumi, ñucataca muscuipi shina caldeocuna causana llajtapi caj prezu apashcacunapajman cutinllataj pusharca. Chaimantaca muscuipi shina ricucushcaca, chingarircallami.

25Chaipica Mandaj Dios imallata ricuchishcatami, chai prezucunamanca tucuita huillarcani.