1Ñaupa punllacunapica ñucanchij yayacunamanca, achca cutin tucui layami profetacunata huillachishpa Diosca rimarca.
2Chai tucuipaj q'uipa cunan punllacunapica, paipaj Churitami ñucanchijmanca Diosca huillachirca. Paitami tucui imalla tiyajcunatapish japij cachun churarca. Paillahuantajmi cai pachata, jahua pachata tucui imalla tiyajcunatapish rurarca.
3Diosca achij nicuj sumaj cashcata, pai ima shina cashcatapish paipaj Churimi ricuchicun. Paipaj poderyuj rimaihuanmi, tucui ima tiyajtapish charicun. Paillapitaj ñucanchij juchacunata chuyayachishpami, jahua pachapi Jatun Mandajpaj alli ladopi tiyarirca.
4Diosca paipaj Churitaca angelcunata yalli cachunmi churarca. Angelcunapaj shutitapish yalli jatun shutitami paimanca curca.
Churica angelcunata yalli jatunmi5Diosca angelcunataca ni maijan angelta:
“Canca ñuca Churimi cangui.
Ñucaca cambaj yayami tucurcani” ninataca manataj nircachu.
Shinallataj:
Angelcunataca ni maijan angelta:
“Ñucaca paipaj Yayami casha.
Paica ñuca churimi canga” ninatapish manataj nircachu.
6Cashnapishmi nirca. Paipaj shujlla Churita cai pachaman cachashpaca:
“Diospaj tucui angelcuna, paita adoraichij” nircami.
7Angelcunata nishpaca Diosca:
“Paipaj angelcunataca, espiritucunatami rurashca, paipajta rurajcunataca nina cunyacujtami rurashca” nircami.
8Ashtahuanpish paipaj Churitaca, cashnami nirca:
“Dioslla, can mandashpa tiyanaca, huiñai huiñaipajmi.
Cambaj varaca cashcata rurashpa mandanami.
9Canca cashcata ruranatami c'uyashcangui, millaita ruranataca p'iñashcanguimi.
Chaimantami cambaj Diosca, canhuan cajcunatapish yalli canapi cushicuchun, cantaca aceitehuan llihuij shina ch'icanchishca” nircami.
10Cashnapishmi nirca:
“Jatun Dios, callaripica canmi cai pachataca rurarcangui.
Jahua pachapish cambaj maquicuna rurashcami.
11Chaicunaca chingaringacunami.
Ashtahuanpish canca huiñaipajmi cangui.
Tucui chaicunaca, churana shinami maucayangacuna.
12Chaicunataca churanata shinami pilluchingui, shujtajyachishcapishmi canga.
Ashtahuanpish canca, canllatajmi cangui.
Cambaj huatacunapish manataj tucuringachu” nircami.
13Diosca ¿maijan angeltataj:
“Ñuca alli ladopi tiyari, canta p'iñajcunata cambaj chaqui sarunapi ñuca churangacama” nishca?
14¿Manachu tucui angelcuna Diospajta ruraj espiritucuna? ¿Manachu paicunaca quishpirinata japijcunapaj allita rurachun cachashcacuna?
Who We AreWhat We EelieveWhat We Do
2025 by iamachristian.org,Inc All rights reserved.