DEUTERONOMIO 21 - Quichua Chimborazo Bible

Huañuchishcata mana yachashca juchamanta Taita Diosman cunata mandashcami

1Mandaj Dios cancunapaj Taita Dios cancunapaj cachun cushca llajtapica, maijan shuj huañushca pambapi siricujta japishpa, pi huañuchishcata mana yachashpaca,

2cunaj yuyajcunahuan, juezcunahuan chai huañushca siricun muyundij pueblocunaman maijan puebloman ashtahuan c'uchulla cajta medishpa ricugrichuncuna.

3Chaita ricushpaca, ashtahuan c'uchullapi caj pueblopi causajcunata cunaj yuyajcunami manaraj yapuj, manaraj trabajaj shuj huarmi huagrata japishpa,

4chai pueblomanta caj cunaj yuyajcuna, nunca mana yapushca, mana tarpushca, achca yacu llujshicuj pambaman apamushpa chaipi cungata p'aquingacuna.

5Tucui imalla rurana cashcata rurachun, paipaj shutipi tucuicunata alli cashca cachun nichun, ima p'iñanacui tiyajpipish, ima llaquichinacui tiyajpipish allichichunca Levipaj huahua huahua curacunatami churarca. Chaimanta chaicunata ruranamanca Levipaj huahua huahua curacuna c'uchuyachun.

6Chaipica huañushcamanta ashtahuan c'uchulla pueblocunapi caj cunaj yuyajcunami pugru pambapi cungata p'aquishpa huañuchishca huarmi huagrapaj jahuapi paicunapaj maquicunata maillangacuna.

7Chaipica: Cai runapaj yahuartaca mana ñucanchij maquicuna jichashcachu. Pi huañuchijtapish mana ricushcanchijchu.

8Mandaj Dioslla, can llujshichimushca cambaj israelcunataca perdonapailla. Manapish huañuipaj yahuarta jichashcataca cambaj israelcunataca ama juchachihuaichu nichun. Chaimi chai yahuarmantaca perdonashca canga.

9Manapish huañuipaj yahuarmanta cancuna juchachishca canataca, tucui chaicunata Mandaj Dios mandashca shinataj chai tucuita rurashpami cancunapaj chaupimantaca anchuchinguichij.

Ch'ican ch'ican mandashcacunami

10Cancunata p'iñajcunahuan macanacungapaj llujshijpi, Mandaj Dios cancunapaj Taita Dios paicunata cancunapaj maquipi churajpi cancuna paicunata prezu apacushpaca,

11chai prezu apacuncunapurapi shuj sumaj huarmita ricushpa munashpaca paitaca cambaj huarmi cachun japishpa,

12cambaj huasi ucupi churangui. Chaipi paica ajchata ruturishpa, sillucunatapish p'itishpa,

13prezu japicuipi churashca cashca churanataca llujshichishpa cambaj huasipi saquirishpa, paipaj yayamanta paipaj mamamanta shuj quilla jundata huacachun. Chai q'uipaca chai huarmipi chayari tucunguimi. Canca paipaj cusami cangui, paica cambaj huarmimi canga.

14Chai huarmi can munashca shina mana tucujpica richun saquinguilla. Canllataj paita pingachishcamantaca ama cullquipi c'atunguichu, cambajta rurajtapish ama ruranguichu.

15Maijanca ishqui huarmita charijpi shujca c'uyashca cangachari, caishujca mana c'uyashca cangachari. Ishquindijpitaj huahuacunata charijpica, punta churica mana c'uyashca huarmipi cangachari.

16Pai imalla charishcacunata paipaj churicunaman chaupina punlla pajtajpica, punta churi japina cashcataca c'uyashca huarmipi charishca punta churimanca mana cui tucunchu. Mana c'uyashca huarmipi charishca huahua punta churi cashcamantami mana cui tucun.

17Ashtahuanpish mana c'uyashca huarmipaj huahuamanmi punta churi cashpa japinataca cuna. Paimanca caishujcuna japina cashcamanta ishqui cutinhuanmi cuna. Paica yayapaj punta fuerzamanta huahua cashcamanta paimi yayapaj punta churi. Chaimanta punta churi cashpa japinaca paipajmi.

18Maijanca shuj churita charingachari. Yallitaj mana cazuj, yayapish, mamapish rimashcata mana uyaj, llaquichijpipish manataj cazuj cangachari.

19Chashna cajpica yaya mamaca paicuna causacun pueblo pungupi caj cunaj yuyajcunapajman llujshichishpa apachun.

20Chai pueblopi caj cunaj yuyajcunamanca: Cai ñucanchij churica mana cazuj, c'ariyaj, ñucanchij imata nishcatapish mana uyasha nij, maipish cachun micuicunapi, machaicunapi puricujllami nishpa huillachuncuna.

21Chaipica chai pueblopi causaj tucui c'aricuna rumicunahuan shitashpa huañuchinguichij. Chashnami cancunapuramanta millaitaca tucui anchuchinguichij. Tucui israelcunami chaita uyashpaca manchangacuna.

22Maijan cashpapish huañuipaj ima juchata rurajpi shuj caspipi huarcushpa huañuchishca cashpaca,

23chai huañuchishca cuerpotaca caspipi huarcushca pacarichunca ama saquinguichijchu. Huarcushca huañuj runaca Taita Dios mana alli nishca cashcamanta chai punllallatajmi pambana canguichij. Chashna rurashpami Mandaj Dios cancunapaj Taita Dios cancunapaj cachun cushca llajtataca mana mapayachinguichij.