1Chai q'uipami Davidca, Ramá pueblopi caj Naiot pueblomanta miticushpa rishpa, Jonatanpajman rishpaca:
–Cambaj yaya ñucata huañuchisha nishpa mashcashpa purichunca, ñucaca cambaj yayata p'iñachishpa ¿imatataj rurashcaniyari? ¿ima millaitataj rurashcaniyari? ¿ima juchatataj rurashcaniyari?– nirca.
2Shina nijpi Jonatanca:
–Ni ima shinamanta mana huañunguichu. Ñuca yayaca achcatapish ashallatapish ñucaman mana huillashpaca imata mana ruranchu. Caitaca ¿ima nishpashi ñucaman mana huillashpa rurarca? Mana chashna rurashcachu canga yuyanimi– nircami.
3Cutinmi Davidca:
–Cambaj yayaca cambaj ñaupajpi ñuca alli ricurishcataca allimi yachan. Chaimantami Jonatanca llaquiringami nishpa mana huillashca canga. Mandaj Diosca causajmi, canpish yachanguimi. Ñuca huañunapajca shuj chaqui saruillami illan– nircami.
4Shina nijpi Jonatanca Davidtaca:
–Canmantaca ñucaca can imata rurai nishcatami rurasha– nirca.
5Chaimi Davidca Jonatantaca:
–Cayaca llullu lunamari. Chaipica jatun mandajpaj ladopi micuj cashca shinallataj micungapajmi tiyarina cani. Shina cajpipish ñucaca, cayapaj caya chishicamami miticugrini.
6Cambaj yaya ñucata tapujpica: “Davidca pai huacharishca Belenmanmi utca rigrini nishpami ñucata rogarca. Paicunaca tucui familiami chaipi sacrificiota huatanta cugrincuna ningui” nircami.
7Chashna nijpi cambaj yaya allimi nijpica, cambajta ruraj ñucataca mana huañuchisha nicushcatami yachangui. Ashtahuanpish pai p'iñarijpica, paica ñucata chingachingapaj millai yuyaihuan cashcatami yachangui.
8Canhuan ñucahuan alli apanacunata pajtachingapajtaj Mandaj Diospaj ñaupajpi ari nishca cashpaca, cambajta ruraj ñucata llaquihuanguiyari. Ñucapi ima millai tiyajpica, cambaj yayapaj ñaupajmanca mana apacunachu cangui. Canllataj huañuchilla– nircami.
9Shina nijpi Jonatanca:
–Allita ruranapaj randica chai mana allita ruranaca amataj tucushca cachun. Ñuca yaya canta huañuchishataj nicushcata yachashpaca ¿maitataj canmanca mana huillashari?– nircami.
10Shina nijpi Davidca Jonatantaca:
–Cambaj yaya ñucata huañuchisha nishpa canman nicujpica ¿pitaj ñucamanca huillangari?– nircami.
11Chaimi Jonatanca Davidtaca:
–Shamui, caimanta llujshishpa jacu chai nij pambaman– nishpaca, ishquindijtaj llujshishpami chai nij pambaman rircacuna.
12Chaipimi Jonatanca, Davidtaca:
–Caya cai horasllataj cashpa, cayapaj caya cashpapish, canta imata rurasha nicushcatami ñuca yayata tapusha. Imatapish cambaj alli canata nijpica, huillanata cachashpami canman yachaj chayachisha. Chaitaca israelcunata Mandaj Diospish ricucunmi chashnatajmi rurasha.
13Ashtahuanpish ñuca yaya canta llaquichisha nicushcata yachashca jahua sumajta richun mana huillajpica, Mandaj Diosca ñuca jahuamanca tucuimanta yalli jatun llaquita cachachun. Mandaj Diosca ñuca yayahuan cashca shinallataj canhuanpish cachun.
14Chaicama ñuca causacujpirajca Mandaj Dios llaquishca shina llaquishpa ñucataca ama huañuchingui.
15Cambaj llaquij canaca ñuca huasi ucupuramantaca amataj anchuchun. Davidta p'iñaj cai pachapi causajcunata shuj shuj tucuicunata Mandaj Dios chingachijpipish, Jonatanpaj shutica Davidpaj huasi familiamantaca amataj anchuchishca cachun.
16Davidta p'iñajcunataca Mandaj Diosca paicuna ima shina rurashca shinallataj llaquichishpa chingachichun– nircami.
Chashna nishpaca Jonatanca Davidtaca paipaj huasi ucupuracunata ama imata rurachunmi ari nichirca.
17Jonatanca pai ima shinami Davidta pai quiquinta shina c'uyarca chai shinallataj Davidpish paita c'uyachunmi Davidtaca cutinllataj ari nichirca.
18Chai q'uipami Jonatanca:
–Caya punllaca llullu luna cashcamanta, chai jatun micuipi can tiyarina chushajlla cajta ricushpami paica illanmari ningacuna.
19Quimsa punlla tandanacuipi mana chaipi cashca q'uipaca, llaquihuan cashna ñaupaman maipi miticushcallamantaj uriyamungui. Chaipica Ezel rumi c'uchullapi shuyangui.
20Chaipimi ñucaca shitanata yachacuj shina quimsa flechacunata can maipi canman shitasha.
21Chai q'uipami ñucapajta rurajtaca: Chai flechacunata mashcanaman ri nishpa cachasha. Pai ña mashcacujpica: Chai flechacunaca cambaj caininijllamanmi, japimui nishami. Chashna nijpica, cantaca ima millaita mana rurana cashcata yachashpa, mana manchashpa llujshinguilla. Mandaj Diosca causajmi chashnatajmi rurasha.
22Ashtahuanpish ñucapajta rurajtaca: Chai flechacunaca cambaj chaininijmanmi japimui nijpica, Mandaj Diosca cantaca shujtajman ri nicushcata yachashpa miticugringuilla.
23Canhuan ñucahuan shuj yuyailla tucushpa parlanacushcapica, Mandaj Dios tucui ñucanchij causaipi cachun– nircami.
24Shina nijpi Davidca miticunaman rircallami. Llullu luna fiesta chayajpica, jatun mandajca micungapajmi tiyarirca.
25Jatun mandaj Saulca pai tiyarij cashca shinallatajmi, pata c'uchupi caj paipaj tiyarinapi tiyarirca. Jonatán jatarijpica Abnerca Saulpaj c'uchupimi tiyarirca. Davidpaj tiyarinaca, chushajllami saquirirca.
26Chai punllaca Saulca David illashcata ricushpaca: “Ima tucushpa mapayashpa manaraj chuyayashpamari mana shamushca canga” yuyashpami mana imata nirca.
27Chai cayandij punllaca, llullu luna fiestaca ñami ishqui punlla carca. Chaipipish Davidpaj tiyarinaca, chushajllatajmi saquirirca. Chaimi Saulca paipaj churi Jonatantaca:
–¿Isaipaj churica ima nishpataj cunanpish, cainapish, micunamanca mana shamun?– nishpami tapurca.
28Shina nijpi Jonatanca Saulmanca:
–Davidca Belenmanmi rina cani nishpami,
29paica: Ñuca familiacunami chai pueblopica Diosman sacrificiota cushpa fiestata ruracuncuna. Chaimi ñuca huauquipish shamuchun nishca. Cambaj ñaupajpi ñuca alli ricurishca cajpica, ñuca huauquicunata ricunaman ringapaj cachahuai nishpami rogarirca. Chaimantami can jatun mandajhuan micungapaj mana shamurca– nircami.
30Shina nijpi Saulca nina sindirij shina Jonatanhuan p'iñarishpami:
–¡Millaita ruraj, mana cazuj huarmipaj churi! Isaipaj churihuan can apanacuj cashcataca ¿mana yachan yuyanguichu? Cambajpish, canta huachaj mamapajpish, pingaipajllami chashna ruracungui.
31Isaipaj churi cai pachapi causajpica canpish, can mandanapish manataj alli cangachu. Chaimanta cunanca huañuchingapaj mashcashpa pushamuchun cachai– nircami.
32Shina nijpi Jonatanca, paipaj yaya Saultaca:
–¿Imamantataj huañungari? ¿Ima mana allitataj rurashcari?– nircami.
33Chaimi Saulca Jonatanta huañuchisha nishpa lanzahuan shitarca. Chashna rurajpimi Jonatanca paipaj yaya Saúl Davidta huañuchishataj nicushcata yacharca.
34Jonatanca paipaj yaya Saúl, Davidta huañuchishataj nicushcata yachashpami, llullu luna fiesta ishqui punllapica, yallitaj p'iñarishpa micucunmanta jatarishpa imata mana micurca.
35Chai cayandij tutamanta utcata llujshishpami, Jonatanca paipajta ruraj shuj mosota pushashpa Davidhuan tupanacungapaj nishpa yuyarinacushca pambaman rirca.
36Ña chayashpaca, paipajta ruraj mosotaca:
–Cai flechacunata ñuca shitajpica, japinaman utca callpangui– nircami.
Chai moso callpashpa ricujpica, Jonatanca chai mosopaj chaininijman urmachunmi shuj flechata shitarca.
37Jonatán shitashca flecha maipi canman chai moso chayagrijpica Jonatanca:
–Chai flechaca ¿manachu cambaj chaininijman?– nishpami, sinchita caparirca.
38Jonatán cutinllataj chai mosota caparishpaca:
–Ama shayarishpa, utca callpailla– nijpimi, Jonatanpajta ruraj mosoca flechacunata japishcahuan paipaj amo maipi canman tigramurca.
39Jonatanpajta ruraj mosoca imapaj chashna ruracushcataca mana yacharcachu. Jonatanhuan, Davidllahuanmi imapaj chashna ruracushcataca yacharcacuna.
40Jonatanca, paipajta ruraj mosoman paipaj macanacunacunata cushpaca: “Caita apashpa puebloman ri” nircami.
41Chai moso ña rijpimi, Davidca miticushpa tiyacushcamanta jatarishpa Jonatanpaj ñaupajpi quimsa cutin pambaman tupajta cumurirca. Chaipica caishujmanta chaishujmanta muchanacushpami ishquindijtaj huacarcacuna. Davidmi yallitaj huacarca.
42Chaipimi Jonatanca, Davidtaca:
–Imata ama manchashpa rilla. Ñucanchijca ishquindijtajmi Mandaj Diospaj shutipi cashna nishpa ari ninacurcanchij. Mandaj Diosca canhuanpish, ñucahuanpish, cambaj huahuacunahuanpish ñuca huahuacunahuanpish huiñaita cashca cachun nircanchijmi– nircami.
Chashna nijpica Davidca jatarishpa rircallami. Jonatanpish pai causacun pueblomanmi tigrarca.
Who We AreWhat We EelieveWhat We Do
2025 by iamachristian.org,Inc All rights reserved.
