MARCOS 11 - Quichua Chimborazo Bible

Jerusalenman Jesús yaicushcami(Mt 21.1-11; Lc 19.28-40; Jn 12.12-19)

1Jerusalenman chayamucushpaca, Betfagé, Betania pueblocuna ch'imbanij Olivocuna tiyan urcupi cashpami Jesusca, paipaj yachacujcunamanta ishquita cachacushpaca,

2cashna nirca:

–Chai ch'imbanij uchilla llajtaman richij. Chaiman chayashpaca pi manaraj tiyarishca shuj uchilla burrito huatashca shayacujtami japinguichij. Chaita cacharishpa pushamuichij.

3Cacharicujpi pi imata nijpica: “Mandaj Jesusmi pushaj cacharca, ñallami saquij cachanga”– ninguichij nircami.

4Paicuna rishpaca, ñan muyurin uri huasi canlla pungupi huatashca huahua burrotami cacharicurcacuna.

5Chaimi maijan chaipi cajcunaca:

–¿Imapajtaj huahua burrotaca cacharicunguichij?– nijpi,

6Pushacujcunaca Jesús mandashca shinallataj nijpica, pushachun saquircacunallami.

7Huahua burrota Jesuspajman pushamushpaca, churanacunatami huahua burro jahuapi churarcacuna. Jesusca chaipimi tiyarirca.

8Achca gentecunami paicunapaj churanacunata Jesús ricun ñanpi mantarcacuna. Shujtajcunaca yura ramacunata p'itishpami, ñanpi churarcacuna.

9Chai tucui catishpa ñaupashpa ricujcunaca:

–¡Hosanna! ¡Jatun Diospaj shutipi shamucujtami alli ninchij!

10¡Ñaupa yaya Davidpaj mandanapi mandangapajmari shamucun! ¡Hosanna cantaca jahua pachapipish alli nishca cachun!– nircacunami.

11Jesusca Jerusalenman chayashpaca, Taita Diospaj huasimanmi yaicurca. Tucuita ricushca q'uipaca, ñalla tutayacujpimi chunga ishqui yachacujcunandij Betaniaman rirca.

Mana p'ucuj higo yurata Jesús chaquichishcami(Mt 21.18-19)

12Cayandij punlla Betaniamanta llujshishpa ricushpami Jesusca yaricachirca.

13Chaimi carumanta shuj higo yura p'angasapa cajta ricushpaca, higo tiyanpishchari nishpa ricunaman rirca. Chaiman chayajpica, p'angacunallami junda cashca carca. Manaraj p'ucuna punlla cashcamantami higoca mana tiyashca carca.

14Chaimi Jesusca higo yurataca:

–¡Cunanmanta pacha pipish amataj canmantaca micuchuncuna!– nishpa rimarca.

Paipaj yachacujcunaca chaitami uyarcacuna.

Taita Diospaj huasipi c'atujcunata Jesús llujshichishpa cachashcami(Mt 21.12-17; Lc 19.45-48; Jn 2.13-22)

15Chai q'uipaca Jerusalenmanmi shamurcacuna. Taita Diospaj huasiman Jesús yaicushpaca, c'atucujcunata, randicujcunatapish tucuicunatami llujshichishpa cacharca. Cullquita cambiayajcunapaj mezacunatapish, palomacunata c'atujcuna tiyarinacunatapish t'angashpami pambaman shitarca.

16Shinallataj Taita Diospaj huasi canllata aparishcacuna caiman chaiman pasachunpish pita mana saquircachu.

17Chaipica cashna nishpami yachachirca:

–Taita Dios Quillcachishcapica: “Ñuca huasica, tucui llajtapi causajcuna tandanacushpa ñucata mañana huasimi canga” ninmi. Ashtahuanpish cancunaca, shuhuacunapaj jutcutamari rurashcanguichij– nircami.

18Chashna nijta mandashcacunata quillcajcunapish, curacunata mandajcunapish uyashpaca, ima shinapish huañuchinatami yuyarircacuna. Chashna yuyarinacucushpapish Jesús yachachishcataca allimi yachachin nishpa tucuicuna uyanachicujpimi, paicunata manchashcamanta mana imata rurai tucurcacuna.

19Ña tutayamujpica, Jesusca Jerusalenmanta llujshishpa rircallami.

Canmantaca pi mana imata micungachu nishca higo yura chaquirishcami(Mt 21.19-22)

20Cayandij tutamanta higo yura c'uchuta ricushpami, chai yuraca sapimanta chaquirishcata ricurcacuna.

21Chaita ricushpami Pedroca Jesús rimashcata yuyarishpaca:

–Yachachij, riquiyari can amataj p'ucuchun nishca higo yuraca chaquirishcamari– nijpi,

22Jesusca:

–Taita Diospi crichij.

23Maijanpish cai urcuta: “Caimanta anchushpa, mama cuchapi siririgri” nishpa, shungupi mana caita chaita yuyashpa Taita Dios pajtachinata crijpica, chaica pajtangallami. Ricunguichij, chashnatajmi tucunga.

24Chaimanta cashnami nini: Taita Diosta imata mañashpaca, ña japinataj cashcata crishpa mañaichij, chasquinguichijmi.

25Cancuna Taita Diosta mañacushpaca, maijan cancunapaj mana allita rurashca cajpica paitaraj perdonaichij. Chashna rurajpimi, jahua pachapi caj cancunapaj Yayaca, cancunapaj juchacunatapish perdonanga.

26Cancuna shujtajcunata mana perdonajpica, jahua pachapi caj cancunapaj Yayapish, cancunapaj juchacunataca mana perdonangachu– nircami.

Jesusca mandajmi(Mt 21.23-27; Lc 20.1-8)

27Cutinllataj Jerusalenman yaicushpaca, Taita Diospaj huasipimi Jesusca puricurca. Chaipi cajpimi curacunata mandajcuna, mandashcacunata quillcajcuna, cunaj yuyajcunapish Jesuspajman c'uchuyamurcacuna.

28Paicunaca:

–¿Pi mandajpitaj chashna rurangui? ¿Pitaj chashna rurachun, cantaca mandarca?– nishpa tapujpimi,

29Jesusca:

–Ñucapish cancunataca, shuj tapunata tapusha. Chaita cutichijpica, pi mandajpi caicunata ruracushcata ñucapish huillashami.

30Bautizaj Juan bautizachunca ¿Taita Dioschu, runacunachu pitaj cachashca canga?– nircami.

31Chaimi paicunapura parlanacushpaca cashna ninacurca:

–Juantaca Taita Dios cachashcami nijpica: “Shinashpaca ¿ima nishpataj pai huillashcataca mana crircanguichij?” ningami.

32“Shinallataj Juantaca Taita Dios cachashca huillajtaj cashcata tucuicuna yachashcamantami, runacunalla cachashcami nishpapish mana ni tucunchijchu” ninacurcacuna.

33Chaimi Jesusmanca:

–Mana yachanchijchu– nijpi, Jesusca:

–Ñucapish pi mandajpi chashna ruracushcataca mana huillanichu– nirca.