HEBREOS 11 - Quichua Chimborazo Bible

1Crinaca, imata japisha nicushcata japinataj cashca yuyailla shuyanami. Manapish ricushcata chai shinataj cana cashcata crinami.

2Chashna crishpami ñaupa yayacunaca, alli crijmi nishca tucurcacuna.

3Cai pachata, jahua pachata tucui imalla tiyajcunatapish rimashpalla Dios rurashcataca, crishcamantami yachanchij. Shina cajpica ñaupamanca mana ricuipaj cajtami cunanca ricunallata rurashca.

4Crishcamantami Abelca, Caín cushcata ashtahuan yalli Dios chasquinalla sacrificiota curca. Chaimantami pai cushcata chasquishpaca cashcata rurajmi nirca. Chashnami Abel huañushca cajpipish pai alli crij cashcataca Diosca huillacunraj.

5Crishcamantami Enoctaca huañuita ama ricuchun, causajta jahua pachaman aparca. Dios apashcamantami mashcashpapish mana japircacuna. Manaraj jahua pachaman apashca cashpaca, Dios munashcata rurajmi carca ninmi Quillcachishcapipish.

6Ashtahuanpish mana crishpaca, Dios munashcataca ima shina mana rurai tucuipajmi. Diospajman maijanpish c'uchuyangapajca pai tiyashcatapish crina, paita mashcajcunamanca ima illashcata cuj cashcatapishmi crinataj can.

7Crishcamantami Noepish, Dios llaquita cachasha nijpica, chai punllacunapi manaraj ima chashna tiyashcata ricushpapish Diosta manchashpa, huambuj huasita rurarca. Chaipimi paipaj familiandij quishpirirca. Crishpallami cai pachapi causaj millaita rurajcunataca, jatun llaquiman rina cashcata ricuchirca. Crishcamantami, Dioshuan alli tucunatapish chasquirca.

8Crishcamantami Abrahampish Dios cayajpica, cazushpa paiman cuna cashca llajtata japinamanca, maiman ricushcata mana yachashpapish, paipaj llajtamanta llujshishpa rircalla.

9Crishcamantami Abrahamca Dios cusha nishca llajtapica, shujtaj llajtamanta caj shina causashca. Chai llajtallapitajmi ñaupa yaya Isaacpish, Jacobpish yaya Abrahamman Dios cusha nishcallatataj japijcuna cashpa, carpa huasicunapi causashcacuna.

10Abrahamca chai llajtapica alli sinchita shayachishca pueblotami shuyacurca. Chai pueblota ima shinalla canata alli yuyarishpa shayachijca Diosmi.

11Crishcamantami Sara huarmica mana huachaj cashpapish chichungapaj fuerzata chasquirca. Diosca pai cusha nishcataca pajtachij cashcata Sara crishcamantami, shuj c'ari huahuata huachashca.

12Chashnami Abrahammantaca yuyaj ña huañunalla cashca cajpipish, jahua pachapi tiyaj achca lucerocuna shinapish, mama cucha c'uchupi tiyaj t'iyu allpa shinapish mana yupaipaj achcata mirarirca.

13Ñaupa yayacunaca, tucuicunami paicunaman Dios cusha nishcata manaraj japishpapish cunataj cashcata crij huañushcacuna. Paicunaca ima shina crishca shinallataj cashcatami carullamanta ricushpa cushicushcacuna. Chaimantami cai pachapica shujtaj llajtamanta caj shinalla puricujllacuna cashcata huillashcacuna.

14Chashna huillajcunaca, paicunapajtaj shuj llajtata mashcacushcatami ricuchincuna.

15Paicuna maimanta llujshimushca llajtaman tigranata yuyacushca cashpaca, cai tucui huatacunapica tigranmanmi carca.

16Ashtahuanpish paicunaca, tucuita yalli alli llajtatami mashcacurcacuna. Chai llajtaca jahua pachamari. Chaimantami Diosca, paicunapaj Dios nishca canataca mana pinganachin. Diosca paicunapajca, shuj pueblotami allichirca.

17Crishcamantami Abrahamca, ima shina crij cashcata ricusha nijpi Diosmanca paipaj churi Isaacta curca. Dios cusha nishcacunata chasquij cashpapish, shujlla churitami Diosman cungapaj aparca.

18Diosca paitaca: “Isaacmantami huahua huahuacunataca achcata charingui” nishcami.

19Huañushcacunapaj chaupimantapish Diosca causachingapaj poderyujmi nishpami, Abrahamca paipaj churitaca curca. Chaimantami paipaj churitaca cutin causachishca shinatami chasquirca ni tucunchij.

20Crishcamantami Isacca paipaj churi Jacobmanpish, Esaumanpish shamuj punllacunapica Dios allicunata cushca cachun nirca.

21Crishcamantami Jacobpish ña huañugrishpaca, Josepaj churicunaman Dios allicunata cushca cachun nishpa, paipaj taunapi huancarishpalla Diosta adorashpa mañarca.

22Crishcamantami Josepish ña huañugrishpaca israelcuna ima shina Egiptomanta llujshinata huillacushpaca, ñuca tullucunatapish apashpa ringuichij nishpa mandarca.

23Crishcamantami Moisespaj yaya mamapish pai huacharijpica, quimsa quillacama pacashpa charirca. Paicunaca sumaj huahua cashcata ricushpami, chai llajtata jatun mandaj huañuchichun mandashcatapish mana mancharca.

24Crishcamantami Moisesca ña jatunyashpaca, Faraonpaj ushushipaj churi nishca canataca mana munarca.

25Juchata rurashpa ashacama cushicushpa causanapaj randica, Dios agllashcacunahuan llaquita apanatami agllarca.

26Cristomanta mana alli nishpa rimashca canaca, Egiptopi achcata charij canatapish ashtahuan yalli alli cajpimi, chaitaca agllarca. Dios paiman cuna cashcataca ña ricuracuj shina cashpami, chaitaca agllarca.

27Crishcamantami Moisesca, jatun mandaj p'iñarinatapish mana manchashpa, Egiptomantaca llujshishpa rirca. Paica mana ricuipaj Diostaca ricucuj shina cashpami, chashna sinchi carca.

28Crishcamantami Moisesca, israelcunapaj punta c'ari huahuacunata huañuchij ángel ama huañuchichun, yahuarta pungupi churashpa Pascuata callarichirca.

29Crishcamantami israelcunaca, Puca Cucha yacutaca, chaquishca allpa cashca shinata ch'imbarcacuna. Egipciocunapish chashnallataj ch'imbashun nishpa yaicujpica, ashtahuanpish millpurcami.

30Crishcamantami canchis punllata Israelcuna muyushca q'uipaca, Jericó muyundij pircacunaca urmarca.

31Crishcamantami Rahab shuti huainayaj huarmipish, israelcuna chai llajtata pacalla ricunaman cachashca gentecunata sumajta chasquishpa pacashcamantaca chaishuj mana cazujcunahuanca mana huañurca.

32¿Imatataj ashtahuanca nishari? Gedeonmanta, Baracmanta, Sansonmanta, Jeftemanta, Davidmanta, Samuelmanta, profetacunamantapish rimangapajca manamari pajtarinichu.

33Paicunaca macanacushpa mishanata crishpami llajtacunata quichushpa cashcata rurashpa mandarcacuna. Dios cusha nishcacunatapish japircacunami, leoncunapaj shimicunatapish huichcarcami.

34Yallitaj lunyacuj ninatapish, huañuchircacunami. Espadahuan huañuchishca canamantapish quishpirircacunami. Fuerza illajcuna cashpapish, fuerzayujmi tucurcacuna. Jatun macanacuipipish c'ari c'ari shayarishpami, shujtaj llajtamanta macanacungapaj shamuj soldadocunatapish mishashpa callpachircacuna.

35Crishcamantami huarmicunapish paicunapaj familiacuna huañushca cajpipish causachishcata chasquircacuna. Shinallataj shujtajcunaca jatun llaquita apacushpapish, Dios causachijpi ashtahuan alli causaita japina yuyailla cashcamantami, cacharishun nijpipish mana nishpa huañurcacuna.

36Shujtajcunaca mana alli nishpa c'amishcata, azotishcata, cadenahuan huatashcata, carcelpi churashcatami aparcacuna.

37Shujtajcunataca rumicunahuan shitashca, chaupipi cuchushca, ima shina crij cashcata ricungapaj llaquichishca, espadacunahuan huañuchishcami carcacuna. Chaimantami oveja carata, chivo carata churarishca caita chaita maitapish purijcuna, huajchacuna, llaquinayajta llaquichishca purircacuna.

38Chai jucha illajcunaca cai pachapica mana munashcami carcacuna. Chaimantami paicunaca shitashca pambacunapi, urcucunapi, machi ucucunapi, jatun jutcucunapi llaquinayajta causarcacuna.

39Chashna jatun llaquita apajcunaca alli crijmi nishpa Dios nishcacuna tucushca cashpapish, Dios cusha nishcataca ni maijan manaraj japircacunachu.

40Dios cusha nishcataca ama paicunalla japichun ashtahuanpish ñucanchijhuan tandalla japijcuna cachunmi Diosca huaquichishpa charicushcalla.