NÚMEROS 10 - Quichua Chimborazo Bible

Cullqui trompetacunata rurachun nishcami

1Mandaj Dios Moisesta mandashpaca cashnami nirca:

2“Cullqui trompetacunata ishquita rurai: Chaicunataca martillohuan labrashpa rurangui. Chaicunaca israelcunata tandachingapaj, carpa huasicunata shujtajman apana cashcata huillangapajmi canga.

3Trompetacunapi tocajpica, tucui israelcunami Dioshuan tupanacuna carpa huasi punguman cambaj ñaupajpi tandanacungacuna.

4Shuj trompetallapi tocajpica, huaranga huaranga israelcunata mandajcunami cambaj ñaupajman tandanacungacuna.

5Yallitaj sinchita trompetapi tocashca uyarijpica, inti llujshin ladoman causacujcuna rinalla tucushpa shayarichuncuna.

6Chai shinallataj tocashca cutinllataj uyarijpica, ura ladoman causacujcuna rinalla tucushpa shayarichuncuna. Paicuna puri callarichunpish chai shinallataj tocachuncuna.

7Tucui israelcunata tandachingapajlla cashpaca, trompetacunapi allilla tocachuncuna.

8Trompetacunapi tocajcunaca Aaronpaj churi curacuna cachun. Tucui chai mandashcacunallatajmi cancunapaj huahua huahuacunapajpish canga.

9Cancunapaj llajtapi cajpi cancunata p'iñajcuna cancunahuan macanacunaman shamugrijpi, paicunahuan macanacunaman llujshigrishpaca yallitaj sinchita trompetacunapi tocachinguichij. Chashna rurajpimi Mandaj Dios cancunapaj Dios cancunata yuyarishpa, cancunata p'iñajcunamanta quishpichishca canguichij.

10Cancuna cushicuna punllacunapipish, jatun fiesta punllacunapipish, quilla callari punllacunapipish, Mandaj Diosman cushpa tucui rupachicushpa, sumaj causaimanta cushpa rupachicushpaca trompetacunapipish tocanguichij. Chaica cancunapaj Dios cancunata yuyarichun yuyachinapajmi canga. Mandaj Dios ñucami cancunapaj Dios cani” nircami.

Sinaí urcu c'uchumanta israelcuna llujshishcami

11Egiptomanta israelcuna llujshimushca ña ishqui huata, huatapaj ishqui quilla, chai quillapaj ishqui chunga punllapimi, Dios chaipi cashcata ricuchij p'uyuca carpa huasi jahuamanta ri callarirca.

12Chaimi israelcunaca, Sinaí shuti shitashca pambamantaca ima shina rina cashcata mandashca shinallataj huashan huashan p'uyuta catishpa rircacuna. Chai p'uyuca, Parán shuti shitashca pambapimi shayarirca.

13Israelcunaca, Mandaj Dios Moisesta ima shinalla rina cashcata mandashca shinaca, chaipimi punta cutin ri callarircacuna.

14Judá aillupaj bandera ucupi caj soldadocunami tucuicuna paicunata ima shina rinata mandashca shinallataj ñaupashpa ri callarircacuna. Judá aillupaj soldadocunataca, Aminadabpaj churi Naasonmi pusharca.

15Isacar aillupaj soldadocunataca, Zuarpaj churi Natanaelmi pusharca.

16Zabulón aillupaj soldadocunataca, Helonpaj churi Eliabmi pusharca.

17Diospaj carpa huasita pascashpa apanallata rurashca cajpica, Gersonpaj huahua huahuacuna, Meraripaj huahua huahuacunami paicuna imallata apana cashcata apashpa catircacuna.

18Chai q'uipaca, Rubén aillupaj soldadocunami paicunapaj banderahuan paicunata ima shina rinata mandashca shinallataj catishpa rircacuna. Rubén aillupaj soldadocunataca, Sedeurpaj churi Elisurmi pusharca.

19Simeón aillupaj soldadocunataca, Zurisadaipaj churi Selumielmi pusharca.

20Gad aillupaj soldadocunataca, Deuelpaj churi Eliasafmi pusharca.

21Chai q'uipaca, Coatpaj huahua huahuacunami, Diospajlla carpa huasi ucupi imalla tiyajcunata apashpa catircacuna. Paicuna chayanapajca, ñaupashpa rij levitacunaca, ñami Diospaj carpa huasitaca shayachishpa shuyacurcacuna.

22Chai q'uipaca Efraín aillupaj soldadocunami paicunapaj banderahuan paicunata ima shina rinata mandashca shinallataj catishpa rircacuna. Efraín aillupaj soldadocunataca, Amiudpaj churi Elisamami pusharca.

23Manasés aillupaj soldadocunataca, Pedasurpaj churi Gamalielmi pusharca.

24Benjamín aillupaj soldadocunataca, Gedeonipaj churi Abidanmi pusharca.

25Chai q'uipaca, Dan aillupaj soldadocunami paicunapaj banderahuan paicunata ima shina rinata mandashca shinallataj tucuicunapaj q'uipa paicunata catishca rircacuna. Dan aillupaj soldadocunataca, Amisadaipaj churi Ahiezermi pusharca.

26Aser aillupaj soldadocunataca, Ocranpaj churi Pagielmi pusharca.

27Neftalí aillupaj soldadocunataca, Enanpaj churi Ahirami pusharca.

28Israelcunaca shujtajman rina tucujpica, paicunata ima shinalla rinata mandashca shinallatajmi, cada quiquin aillupaj soldadocunahuan huashanpura rijcuna carca.

Moisesca paipaj huarmipaj turi Hobabta pushashpa rishcami

29Moisesca Madianmanta caj paipaj suegro Ragüelpaj churi Hobabtami cashna nirca:

–Ñucanchijca Mandaj Dios richun nishcamanmi ricunchij. “Mandaj Diosmi ñucanchijmanca ñucami cancunamanca shuj llajtata cusha” nirca. Mandaj Diosca israelcunapajca allicunata ruranatami ari nishca. Chaimanta ñucanchijhuan jaculla. Ñucanchijpish canhuanca alli cashunllami– nircami.

30Shina nijpi Hobabca:

–Ñucaca chaimanca mana rishachu, ashtahuanpish ñuca llajtaman, ñuca familiacunapajmanmi rigrini– nircami.

31Ashtahuanpish Moisesca:

–Ama ñucanchijllata saquihuaichu. Shitashca pambacunapi ñucanchij carpa huasicunata maipi shayachinatapish canmari alli rijsingui. Canca ñucanchijpajca ñucanchij ñahui shinamari cangui.

32Can ñucanchijhuan rijpica, Mandaj Dios ñucanchijman cusha nishcata cujpica, canmanpish chaupishunmi– nircami.

33Israelcunaca Mandaj Diospaj urcumanta rishpaca, quimsa punllacunatami purircacuna. Maipi carpa huasicunata shayachinata mashcashpami, quimsa punllata purishpa Mandaj Dioshuan ari ninacushca quillcata huaquichina arcata israelcunapaj puntapi apashpa ñaupashpa purircacuna.

34Israelcuna puri callarincami, Mandaj Diospaj p'uyuca punllanta paicunapaj jahuata rirca.

35Diospaj arcahuan ña puri callarijpica, Moisesca:

“¡Mandaj Dios, jatariyari!

¡Quiquinta p'iñajcunataca caita chaita cachayari.

Quiquinta mana ricunachijcunataca quiquinpaj ñaupajmanta callpachiyari!” nijmi carca.

36Diospaj arcahuan shayarijpica, Moisesca:

“¡Mandaj Dioslla, cai huaranga huaranga israelcunata tigrarishpa ricuyari!” nijmi carca.