1Mandaj Dioslla, ñuca rimashcata uyahuayari, shungu llujshishpa ñuca aij, nicujta ricuhuayari.
2Ñuca Jatun Mandajlla, ñuca Dioslla, caparishpa ñuca mañashcataca uyarapangui, canllatamari mañani.
3Mandaj Dioslla, tutamantaman ñuca caparishcata uyarapangui.
Tutamantaman canman mañashpa huillashcataca shuyaracushami.
4Canca millaita ruranacunahuanca mana cushicuj Diosmi cangui.
Chaimanta millaicunaca cambaj c'uchupica mana causai tucunchu.
5Jatun tucushcacunatapish cambaj ñaupajpica, mana ricunachinguichu.
Millaita rurajcunatapish, tucuicunatami p'iñangui.
6Llullashpa rimajcunatapish chingachinguimi.
Huañuchijcunatapish, umajcunatapish Mandaj Diosca millanachinmi.
7Ashtahuanpish ñucaca can yallitaj llaquij cajpimi cambaj huasimanca yaicuni.
Cambaj huasi ladoman ñahuita churashpami, tucui shunguhuan canta adorani.
8Mandaj Dioslla, ñucata p'iñajcuna ama juchachichun cambaj cashcata ruranahuan pushahuai.
Cambaj alli ñanpi pushahuai.
9Paicunapaj shimipica imatapish cashcata rimanaca mana tiyanchu.
Shungupipish millaihuan jundami.
Paicunapaj tunguripish pambana jutcuta pascashca shinami, c'alluhuanca sumajta rimaj tucucujcunami.
10Ñuca Dioslla, paicunataca llaquichiyari.
Llaquichingapaj paicuna allichishcallapitaj urmachiyari.
Cantamari c'ariyacuncuna.
Paicuna yallitaj juchallishcamantaca anchuchishpa shitayari.
11Canpi shunguta churajcunaca tucuicuna cushicuchun.
Paicunata mitsaj cashcamanta tucui paicunapaj causaipi cushicuihuan canta cantachuncuna.
Cambaj shutita c'uyajcunaca canpi cushicuchun.
12Mandaj Dioslla, cashcata rurajcunamanca canmari allicunata cungui.
Muyujta escudohuan pacaj shinami, cambaj c'uyaihuan muyuchingui.
Who We AreWhat We EelieveWhat We Do
2025 by iamachristian.org,Inc All rights reserved.
