ROMANOS 15 - Quichua Chimborazo Bible

1Sinchi crijcunaca, irqui crijcuna mana apai tucushcacunataca c'uyaihuanmi apana canchij. Mana ñucanchijpajlla alli canata yuyanachu canchij.

2Cada quiquinmi ñucanchijca, shujtajpaj imapish alli canapaj, paita sinchiyachinapaj ayudana canchij.

3Cristopish paipaj allipajllaca mana rurarcachu. Ashtahuanpish cashnami quillcashca tiyacun: “Canta c'amijcuna c'amishcacunaca, ñucatami llaquichirca” nishca shinami tucurca.

4Chashna cajpica ñaupaman Quillcachishcacunaca, ñucanchijta yachachingapajmi quillcashca carca. Mana p'iñarishpalla, cushijlla, shuyana yuyailla canata yachachingapajmi quillcachirca.

5Mana p'iñarinata, cushicuita cuj Diosllataj, cancunapurapica Cristo Jesús shina shuj yuyailla causanata cuchun.

6Chashna cashpami shuj shinalla, shuj rimashca shinallapi ñucanchijta Mandaj Jesucristopaj Dios Yayataca jatunyachinguichij.

Mana judiocunaman alli huillaita huillashcami

7Chaimanta Diosta jatunyachingapaj Cristo ñucanchijta chasquishca shinallataj, cancunapish caishuj chaishuj chasquinacuichij.

8Cashnami nini: Cristo Jesusca, circunsicionta rurashcacunata servingapajmi shamurca. Ñaupa yayacunaman cusha nishcata pajtachishpaca, Diosca mana llulla cashcata ricuchingapajmi chashna shamurca.

9Mana judiocunapish paicunata Dios llaquishcamanta, paita jatunyachichunmi Jesusca shamurca. Quillcashcapipish cashnami nin:

“Mana judiocunapurapimi, canmantaca huillasha, cambaj shutitami cantasha” ninmi.

10Shinallataj:

“Mana judiocunaca, Diospaj cajcunahuan cushicuichigari” ninmi.

11Cutin shinallataj:

“Jatun Diostaca tucui mana judiocunapish, alabaichigari.

Tucui pueblocunallataj, paitaca jatunyachichigari” ninmi.

12Shinallataj Isaiaspish:

“Isaipaj sapimi retoñanga. Paimantami tucui mama llajtacunata mandangapajca llujshinga.

Mana judiocunaca paipi yuyaita churashpami shuyangacuna” ninmi.

13Cancuna pai yuyailla cashca Diosllataj paipi crijcunamanca cushi canata, sumaj causaita, jundachichun. Chashna cashpami, jucha illaj Espiritupaj poderhuanca Diospi ashtahuan shunguta churanguichij.

Pabloca Diospajta ruraj cashcamanta cunashcami

14Ñuca huauquicuna, cancunallataj allita ruranahuan, tucui yachaihuan jicharicuj cashcataca yachanitajmi. Chashna cashpami caishuj chaishuj cunanacui tucunguichij.

15Ashtahuanpish huauquicuna, mai maipica mana manchashpami, cancunata yuyachishpa cunangapajca quillcarcani. Dios ñucataca, mana c'uyaipajta c'uyashpa,

16mana judiocunapajpi Jesucristopajta rurashpa, Diospaj alli huillaita mingashcata alli apachun cushcamantami chashna yuyachini. Mana judiocunatapish jucha illaj Espíritu jucha illajta rurajpi, Dios munashca shina ofrenda cachunpishmi chashna quillcani.

17Cristo Jesuspi cashpa Diospajta rurashcamantami jatunyarinata charini.

18Ñucallamantatajca imata mana rimashachu. Ashtahuanpish Cristo imallata ñucata rurachishcatami rimasha. Mana judiocunata Diosta cazunaman pushangapaj imallata huillashcata, imallata rurashcatami rimasha.

19Diospaj Espiritupaj poder rurachijpimi poderyuj ricuchinacunata, mancharinacunatapish rurarcani. Chashnami Jerusalenmanta callarishpaca, tucui llajtacunapi Iliricocama Cristomantaca alli huillaita huillashpa jundachircani.

20Chashna huillacushpaca, shujtaj callarichishcapi ama huillangapaj nishpami, Cristomanta pi manaraj huillashca llajtacunapi alli huillaita huillana yuyaita charishcamanta chai yuyailla huillacuni.

21Ashtahuanpish cashnami quillcashca tiyacun:

“Paimanta huillashcata nunca mana chasquijcunarajmi paitaca ricungacuna.

Shinallataj paimanta nunca mana uyajcunarajmi entendingacuna” nishca shinami rurarcani.

Romaman rinata Pablo yuyarishcami

22Caicunamantami cancunapajman shamusha nicushpapish, tauca cutin jarcarircani.

23Cunanca, cai llajtacunapi huillanataca ñami tucuchishcani. Chaimanta achca huatacuna ñaupaman cancunapajman shamusha nicushcamantaca,

24Españaman ricushpami cancunata ricushpandij pasana yuyailla cani. Cancunahuan tandanacushpa cushicushca q'uipa ñucata ayudashpa cachajpica, chaimanta rishallami.

25Ashtahuanpish cunanca, jucha illajcunapaj ayudata tandashcatami saquingapaj Jerusalenmanraj rigrini.

26Jerusalenpi caj jucha illajpurapi caj huajchacunaman cunapajmi, Macedoniapi, Acayapi caj crijcunaca, alli shunguhuan ofrendata tandachishpa cachanata yuyarircacuna.

27Chaita ruranaca paicunapica allimi ricurirca. Mana judiocunaca, judiocunamanta Diospaj allicunata japijcunami tucurcacuna. Chaimantami paicunapish judiocunamanca, cai pachapi charishcacunahuan ayudanataj carcacuna.

28Cai rurana cashcata ña tucuchishpa ofrendacunata paicunapaj maquipitaj cushpami Españamanca risha. Chaiman pasacushpami cancunapajman chayashpa risha.

29Cancunapajman ñuca shamushpaca, Cristomanta alli huillai cushca yallitaj allicunahuan, shamuna cashcatami yachani.

30Ashtahuanpish huauquicuna, ñucanchijta Mandaj Jesucristomanta, Espiritupaj c'uyaimantapish ñucamanta Taita Diosta mañashpa ayudachunmi cancunataca rogani.

31Judeapi caj mana crisha nijcunamanta huaquichichun, Jerusalenpi caj jucha illajcunapajta rurangapaj ñuca apashca ofrendatapish alli chasquichun mañanguichij.

32Dios munashca shina cancunapajman cushicuihuan chayashpa, cancunapurapi samaringapaj mañapaichij.

33Sumaj causaita cuj Dios tucui cancunahuan cachun. Chashna cachun.