JEREMÍAS 16 - Quichua Chimborazo Bible

Mandaj Diosca Jeremiasta imallata mandashcamanta

1Mandaj Diosca ñucamanca cashnami nirca:

2“Canca cai llajtapica ama casaranguichu. Churicunatapish, ushushicunatapish ama charinguichu.

3Cai llajtapi huacharishca churicunatapish, ushushicunatapish, paicunata huachaj mamacunatapish, yayacunatapish Mandaj Diostajmi cashna nini:

4Mancharina ungüicunahuanmi huañungacuna. Paicunamantaca pi mana huacangachu, mana pambangacunallapishchu. Majada shinallami allpa jahuapi shitashca siringacuna. Shinallataj espadahuanpish, yaricaihuanpishmi huañungacuna. Paicunapaj aichacunaca huairata purij pajarocunapaj, sacha animalcunapaj micunami canga” nircami.

5Mandaj Diosca ñucataca cashnapishmi nirca: “Maijan huañushcamanta huacacujcunapaj huasimanca ama yaicunguichu. Paicunapaj shungu samarichun imallatapish ama ninguichu. Huañushcamantapish ama huacanguichu. Cai runacunamantaca ñucatajmi sumaj causaita anchuchircani. Ña mana llaquisha, mana nanarishapishchu. Mandaj Dios ñucatajmi chashna nini.

6Cai llajtapi causajcunaca jatuncunandij, uchillacunandijmi huañungacuna. Paicunataca pi mana pambangacunachu, pi mana huacangallapishchu. Pi mana llaquirishpa churanata lliquiringachu, uma ajchatapish mana ruturingacunachu.

7Huañushcacunapaj familiapuracunatapish pi mana imallatapish carashpa cushichigringachu. Yaya, mana cashpaca mama huañujpipish, pi mana ima ubyanallahuanpish cushichigringachu.

8Maijan huasipi jatun micuita rurashca cajpipish, ama chaiman yaicushpa paicunahuan tiyarishpa micunguichu, ubyanguichu” nircami.

9Tucuita Mandaj, israelcunapaj Diostajmi cashnapish nin: “Cunan cancuna causacui punllacunapimi cai llajtamantaca cancuna cushicushpa cantanatapish, caparirinatapish, cusayuj, huarmiyuj tucushca punlla cushicushpa cantanatapish anchuchisha.

10Judá llajtapi causajcunaman tucui caicunata huillajpica, paicunaca cashnami ningacuna: Ñucanchijca ¿ima millaitataj rurashcanchigari? Mana cashpaca ¿ima juchata rurashpataj, ñucanchijta Mandaj Diostaca p'iñachishcanchigari? Mandaj Diosca ¿imamantataj ñucanchijtaca cashna jatun llaquihuan ñacachisha ninchu imamí? ningacunami.

11Chashna nijpica cashna ningui: Mandaj Diosca cashnami nin: Cancunapaj yayacunamari ñucata shitashpa, shujtajcunapaj dioscunapajman rishpa chaicunata cungurircacuna. Chaicunatami servircacuna. Chashna ñucata saquishpami, ñuca mandashcatapish mana pajtachircacuna.

12Cancunacarin cancunapaj ñaupa yayacunatapish yalli millaicunamari tucunguichij. Ñucata manataj uyashpamari, tucuicuna cancunapaj millai shungupi imata munashcata rurashpa causanguichij.

13Chaimantami cancunataca cai llajtamanta llujshichishpa, cancunapish cancunapaj ñaupa yayacunapish mana rijsishca llajtaman cachagrini. Ñuca cancunata llaquinataca ama yuyaichijchu. Chai llajtapica tutapish, punllapish shujtaj dioscunata servishpa causacunguichijlla ninmi ningui” nircami.

14Shina cashpapish, Mandaj Diosllatajmi cashnapish nin: “Cancunaca imapajpish: Israelcunata Egipto llajtamanta llujshichimuj, causaj Mandaj Diospish ricucunmi ninguichijmi. Shuj punllaca ña mana chashna ninguichijchu.

15Ashtahuanpish cancunapaj ñaupa yayacunaman cushca llajtaman ñuca tigrachimujpica, tucui imapajpish cancunaca cashnami ninguichij: Janaj llajtamanpish, tucui shujtaj llajtacunamanpish shitashcamanta israelcunata cutin tigrachimuj, causaj Mandaj Dios ricucunmi ninguichijmi” ninmi.

16Mandaj Diosca cashnapishmi nin: “Cunanca chalhuata japij achca runacunatami cachagrini. Paicunami Judá runacunataca, chalhuata japij shina japingacuna. Chai q'uipaca, sacha animalcunata japijcunatami cachagrini. Paicunami Judá runacunataca tucui urcucunamanta, lomacunamanta, c'aca ucu jutcucunamantapish sacha animalcunata shina japingacuna.

17Ñucaca paicuna imallata rurajtaca, tucuitami ricucuni. Paicunapaj juchacunapish ñuca ñahuimantaca ima mana pacallachu, ricunallami tiyacun.

18Paicuna imalla millaita, imalla juchata rurashcamantarajmi shuj cutihuan yallita pagasha. Paicunapaj huañushca dioscunahuanmi ñuca allpataca mapayachircacuna. Ñuca tucui llajtapimi, chai millananacunata jundachircacuna” ninmi.

Mandaj Diosta Jeremías cutintaj mañajpi cutichishcamanta

19Mandaj Dioslla, canmari ñucata pacajpish, ñucaman fuerzata cujpish cangui. Llaquihuan cajpipish, canmari huaquichihuangui. Tucui cai pacha llajtacunapi causajcuna cambajman shamushpamari, cashna ningacuna: “Ñucanchij yayacunaca imata mana rurai tucuj, yanga dioscunallatamari charishcacuna. Chaicunaca imata mana cui tucuncunachu.

20¿Pitaj pai quiquinpaj shuj diostatajca rurai tucungari? Paicuna rurashcacunaca, mana dioscunatajchu” ningacunami.

21Chaimantatajmari cunanca ñuca maquihuanca, ñuca tucuita rurai tucuj cashcata rijsichigrini. Chashna rurajpimi, ñucataca Mandaj Dios shutitaj cashcata yachangacuna.