JEREMÍAS 27 - Quichua Chimborazo Bible

Jeremiasca Jerusalenpica yugota ricuchishpa huillashcamanta

1Josiaspaj churi jatun mandaj Joacim, Judá llajtata mandai callari huatami, Mandaj Diosca Jeremiastaca cashna huillachun mandarca:

2“Mandaj Diosca ñucataca cashnami nirca: Cinta angucunatapish, yugotapish rurashpa cambaj cunga tullupi apari.

3Chaimantaca Judá llajtata jatun mandaj Sedequiashuan parlachun Edom, Moab, Amón shuti llajtacunata jatun mandajcuna, Tiro, Sidón shuti pueblocunata jatun mandajcuna Jerusalenman cachashca mandajcunaman ricuchingui.

4Chaicunata ricuchishpaca, paicunata cachaj jatun mandajcunamanca cashna nichun cachangui: Tucuita Mandaj, israelcunapaj Diosca cashnami nishca:

5Ñucami cai pachatapish, tucui runacunatapish, animalcunatapish, allpapi tucui imalla tiyajtapish tucuita rurai tucuj ñuca maquihuan rurarcani. Chaimantami llajtacunataca ñuca piman cusha nishpapish cunilla.

6Cunanca tucui cai llajtacunata Babilonia llajtata jatun mandaj, ñucata servij Nabucodonosorpaj maquipimi churani. Sacha animalcunatapishmi, pai munashcata rurachun paipaj maquipi churani.

7Tucui llajtacunapi causajcunami paitapish, paipaj churitapish, chai churipaj churitapish servishpa causangacuna. Chai llajtapajpish jatun llaqui punlla chayangacamami chashna causangacuna. Paicunatapish tucuicunata mishaj jatun mandajcunayuj achca llajtacunami, mishashpa servichishpa charingacuna.

8Maijan runacuna, mana cashpaca maijan llajta, chai Babilonia llajtata jatun mandaj Nabucodonosorpaj yugota mana aparisha nijpica, chai llajtataca jatuntami llaquichisha. Espadahuan, yaricaihuan, ungüihuanmi llaquichisha. Chashna rurashpami paipaj maquillapitaj tucuchisha. Mandaj Diostajmi chashna nini.

9Chashna cashcamantaca cancunapaj huillajcunatapish, adivinajcunatapish, muscushcacuna imata nisha nishcata huillajcunatapish ama uyaichijchu. Shinallataj brujocunatapish, muspachij yumbucunatapish ama uyaichijchu. Chai Babilonia llajtata jatun mandajta servijcunaca mana tucunguichijchu nishpa paicuna llullashcataca ama uyaichijchu.

10Paicunaca cancunapaj llajtamanta cancunata llujshichishpa cachangapajllamari, llullashpalla imatapish huillancuna. Ñuca llujshichishpa cachajpi, cancuna chingarichunllamari chashna nincuna.

11Ashtahuanpish Babilonia llajtata jatun mandaj yugota churachun cungata ricuchishpa, paita servijcuna tucujpica, quiquin llajtallapitaj causachun saquishallami. Quiquin allpacunallapitaj chagrata rurashpa causangacunallami ninmi Mandaj Diosca nichun cachangui” nircami.

12Judá llajtata jatun mandaj Sedequiastapish, paicunata nishca shinallataj cashnami nircani: “Babilonia llajtata jatun mandaj paipaj yugota churachun cancunapaj cungata ricuchishpa paitapish, paipaj llajta runacunatapish servijcuna tucuichijlla. Chashna rurashpaca, causanguichijllami.

13Mandaj Diosca, chai Babilonia llajtata jatun mandajta mana servisha nij llajtataca espadahuan, yaricaihuan, ungüihuanmi huañunga ninmi. ¿Maitataj yangamantaca canpish, cambaj runacunapish chashna huañuna tucunguichigari?

14Chai Babilonia llajtata jatun mandajta servijcunaca mana tucunguichijchu nishpa huillajcunataca ama uyaichijchu. Paicunaca llullacunllamari.

15Paicunataca mana ñuca cacharcanichu. Llullashpallamari ñuca shutipi huillancuna. Chashna cashcamantaca cancunatapish, cancunaman huillacuj huillajcunatapishmi caimanta llujshichishpa, caita chaita cachasha. Chashna cachajpica, chingaringuichijmi ninmi Mandaj Diosca” nircanimi.

16Shinallataj curacunatapish, tucui chaipi cajcunatapish cashnami nircani: “Mandaj Diosca cashnami nin: Mandaj Diospaj huasimanta apashca charinacunataca, ñallami chai Babilonia llajtamantaca tigrachingacuna nishpa cancunaman huillacuj huillajcunataca ama uyaichijchu. Paicunaca llullanllamari.

17Paicunataca ama cazuichijchu. Babilonia llajtata jatun mandajta servijcuna tucushpa causaichijlla. ¿Maitataj cai pueblotaca yangamanta pambapi shitashcata saquinguichigari?

18Paicunaca ñucataj huillachun cachajpi huillajcuna cashpaca, ñuca huasipipish, Judá llajtata jatun mandajpaj huasipipish saquirishca charinacunamantaca, ñucata mañachuncunari. Ñuca ima nishcatataj huillajcuna cajpica, paicuna mañashcata uyashpa, chai charinacunataca cai Jerusalén pueblomanta Babiloniaman apachunca mana saquishachu. Ñucaca tucuita Mandajmari cani” nircami.

19Tucuita Mandaj Diosca, cai pueblopi saquirishca jatun pilarcunamantapish, yacuta tandana jatun pailacunamantapish, caishuj uchilla tanquecunamantapish, tucui ima shujtaj charinacunamantapish huillachun ninmi.

20Chai charinacunataca, Babilonia llajtata jatun mandaj Nabucodonosorca, Joacimpaj churi, Judá llajtata jatun mandaj Coniastapish, cai Judá llajtapi, Jerusalenpi causaj mandajcunatapish, Babilonia llajtaman prezu apai punllaca, chai charinacunataca mana apashpa saquircami.

21Tucuita Mandaj, israelcunapaj Diosca paipaj huasipipish, Judá llajtata jatun mandajpaj huasipipish, cai Jerusalenpi saquirishca charinacunamantaca Mandaj Diosca cashnami nin:

22“Babilonia llajtamanmi apangacuna. Ñucallataj rishpa tigrachimungacamami, chaipi tiyanga. Ñucallataj apamushpami, cutin caipi churasha” ninmi Mandaj Diosca.